Aposkạmi 16
16
Pạul ar Silạs sãote Timothi
1Tayomte Pạul do Derbe ar Lustrạ nagrahateye calaoena. Onḍe Timothi ńutuman mitʼṭen celae tahẽkana. Uniren eṅgattetʼ hõ Mạsire pạtiạu akan mitʼṭen Jihudi maejiue tahẽkana, menkhan apattetʼ do mitʼṭen Junạni hoṛge. 2Lustrạ ar Ikonium nagraharen pạtiạu akan boehako do Timothi ạḍiko sarhaoedekan tahẽkana. 3Ar Pạul do soṅgete Timothi iditoraye menjoṅante uniye khatna ocokedea, ente onako ṭoṭhare okoe Jihudikoko tahenkan tahẽkan onko doko baḍaekan tahẽkana Timothiren apattetʼ do mitʼṭen Junạni hoṛ kanae. 4Ar unkin do onako nagraha talatekin parom calaoena ar Jerusalemren apostolko ar manḍerren mukhiyạko okako ạnko goṭa akatʼ tahẽkan ona do hoṛkokin baḍae ocoketʼkoa ar pańjae lạgitʼkin metatʼkoa. 5Nonkate manḍerren hoṛko do biswạsreko keṭecʼ idiyena ar dinke dinko saṅge idiyena.
Makedoniạ disạmre Pạul
6Pạul ar uni sãotenko do sonot Jiu hoteteko mana ocoyente Asiạre do bako porcarleda. Unre onko do Phrugiạ ar Galatiạ Prodes reakʼ sanam jaegateko calaoena. 7Ado Musiạ aṛeteko hecʼen khan onko do Bethaniạ disạmte calakʼko kurumuṭukeda, menkhan Jisuren Jiu do bae sen ocowatʼkoa. 8Onate onko do Musiạ talate Troas nagrahateko calaoena. 9Ar Pạul do ńindạ mitʼṭecʼ dorsone ńelkeda, Makedoniạ disạmren mitʼṭen hoṛ do teṅgokate nehõr salakʼe meneda, “Makedoniạte parom hijukʼte dela goṛowaleme.”
10Ado Pạul noa dorsone ńelketʼ khan ale do Makedoniạte calakʼ lạgitʼ unregele sapṛaoena, entele bujhạu daṛeada Makedoniạren hoṛko ṭhen Mạsi reaṅ bhage sombat porcar lạgitʼ Isor doe hohowale kana.
Ludiạwakʼ mon ạcurokʼ
11Tayomte ale do Troas bạgikate jahajte sojhe Samothrake diptele calaoena ar dosar hilokʼ do Neapolis nagrahatele hecʼena. 12Ar onḍe khon ale do Philipi nagrahatele calaoena. Noa Philipige Makedoniạ ṭoṭha reakʼ maraṅ nagraha tahẽkana. Ar onḍenko hoṛ do Rom rajren porjako tahẽkana. Ale do thoṛa din ona nagraharele tahẽyena.
13Ado jirạukʼ mãhãre ale do nagraha reakʼ phaṭok bahre gaḍa aṛe ṭhenle calaoena; entele hudisetʼ tahẽkana onḍe do Jihudikoakʼ sunạgog menakʼtakoa mente. Ar onḍe okoeko maejiuko jarwa akan tahẽkan onko ṭhen duṛupʼkate galmaraole ehopʼena. 14Ar okoekoko ańjometʼkan tahẽkan onko modre Thuạtirạ nagraharen Ludiạ ńutuman mitʼṭen maejiue tahẽkana. Uni do beguni roṅ reakʼ kicricʼe kiriń ạkhrińetʼ tahẽkana. Ar Jihudi bae tahẽkanre hõ uni do Isore sewawaekan tahẽkana. Probhu Isor do Ludiạwakʼ ontor nonkae jhicʼketʼtaea jemon uni do Pạulakʼ katha monteye ańjom are pạtiạukʼ. 15Ar noate uni ar acʼ gharońjren sanamkogeko bạptisena. Inạ tayom uni do noa menkateye neotaketʼlea, “Probhu Isorre biswạs akanpe hudisedeń khan dela ińakʼ oṛakʼre hijukʼte tahenpe.” Ar noa katha menkate acʼakʼ oṛakʼteye idiketʼlea.
Pạul ar Silạs do hajotre
16Mitʼ din ona koejoṅ jaegatele calakʼkan tahẽkanre mitʼṭen kạ̃ṛmĩ sãotele ńapamena. Uni do mitʼṭen bạṛicʼ jiue ńamakawan tahẽkante darakan dinko reakʼ sanamakʼe lại daṛeakʼkan tahẽkana. Onate acʼren kisạ̃ṛakʼ do ạḍi lab hoyokʼkantae tahẽkana. 17Uni kạ̃ṛmĩ do Pạul ar ale tayom tayomte hijukʼte hohowateye menetʼ tahẽkana, “Nukin hoṛ do maraṅ Isorren guti kanakin. Ar cetʼlekate kại khon bańcao ńamokʼa onagekin lạiyape kana.”
18Uni do ḍher din hạbicʼe nonka idikeda. Mucạtʼre Pạul doe ạṛisen khan beṅgetʼ ạcurkate uni bạṛicʼ jiue metadea, “Jisu Mạsi ńutumteń hukumam kana, nui khon oḍok calakʼme.” Ar unrege uni bạṛicʼ jiu do uni khone oḍok calaoena.
19Ado rojgar cabayena menteko ńelketʼ khan uni kuṛiren kisạ̃ṛko do Pạul ar Silạs sapʼkate nagraharen mukhiyạ ṭhenko or idiketʼkinạ. 20Ona tayom disạm cakʼlaoyicʼ ṭhen idiketʼkinteko menkeda, “Nukin hoṛ do aboakʼ nagrahare gulmalkin ehopʼakada. Nukin dokin Jihudi kana. 21Nukin do nonkan ạri-cạli reaṅ kin cetʼako kana okaṭakʼ do Romiko hoykate abo lạgitʼ ataṅ se batao do ạn birud kạmikana.”
22Ado eṭakʼ hoṛko hõ onko sãote mitʼkate Pạul ar Silạs upạrteko teṅgoyena. Unre disạm cakʼlaoyicʼ doe hukumkeda unkinakʼ kicricʼ jemonko oṛejtạkin arko dalkin. 23Onko do kajak dalko dalketʼkinte hajotreko bhoraokatʼkinạ, ar kajakte pahrae lạgitʼ hajotren darogako hukumadea. 24Ar daroga do noa hukume ńamketʼ khan hajot reakʼ bhitri kandhareye idiketʼkinạ ar hạṛi paṭate jaṅgae tolkatʼ tạkina.
25Un jokhecʼ do tala ńindạ okte tahẽkana. Pạul ar Silạs do Isorkin sarhaoedekan tahẽkana arkin koejoṅkan tahẽkana. Ar eṭakʼ kạidiko hõ onako ańjomkan tahẽkana. 26Unre ackage ạḍi botor dhạrti laṛaoena onate hajot oṛakʼ reakʼ rehetʼko sudhạ dal dalaoena. Ar hajot oṛakʼ reakʼ sanam silpińko jhicʼtʼena ar kạidikoakʼ sikṛiko hõ raṛayena. 27Unre hajot oṛakʼren daroga doe ebhenena ar hajot oṛakʼ reakʼ silpińko jhicʼgeye ńelketʼ khan tarwaṛe bocʼkate acʼte gujukʼe menana. Uni doe hudiskeda sanam kạidikoko dạṛ cabakeda. 28Unre Pạul do ãṭ aṛaṅte hohowateye metadea, “Thirokʼme, jiwi do alom loksantama; ale sanamkoge nonḍe menakʼlea.”
29Unre daroga do mitʼ hoṛ diuhe ạguiye metadea ar acʼ do bhitriteye ńir boloyena ar botorte thar tharaokʼkan tulucʼ Pạul ar Silạs tạkinakʼ jaṅgareye giḍiyena. 30Ona tayom uni do Pạul ar Silạs tạkin bahreteye oḍok ạguketʼkinteye kuliketʼkina, “Ma lạiyạń ben, kại khon bańcao ńam lạgitʼ do cetʼ cekae hoyokʼtińạ?”
31Adokin metadea, “Am ar amakʼ gharońjrenko Probhu Jisure pạtiạukʼpe, enḍekhan kại khon bańcaope ńama.” 32Unre Pạul ar Silạs do daroga ar uniyakʼ oṛakʼren sanamko Probhu Isorakʼ kathakin galmaraoatʼkoa. 33Ar inạ ńindạge daroga do Pạul ar Silạse idiketʼkinte unkinakʼ hoṛmo reakʼ ghạlkoe ạrupʼketʼ tạkina, ar acʼ gharońjren sanamkoko bạptisena. 34Ona tayom uni do acʼakʼ oṛakʼte Pạul ar Silạse idiketʼkinte unkine jom-ńũ ocoketʼkinạ. Ar acʼ gharońjrenko do Isorreko biswạsente ạḍitetʼko rạskạyena.
35Dosar hilokʼ setakʼ jokhecʼ hạkimko do akoren kạmiyạko hoteteko roṛgotʼkada “Unkin hoṛ do aṛakʼ kạkinpe.” 36Unre daroga do Pạule metadea, “Disạm cakʼlaoyicʼ do Silạs ar am aṛakʼ ben lạgitʼe roṛgotʼ akada. Onate ma ńitokʼ do oḍokokʼ ben ar sulukte calao joṅben.”
37Unre Pạul do onko kạmiyạkoe metatʼkoa, “Ạliń do Romi hoṛ kanaliń, ar begor bicạr dusite hoṛko samaṅreko dalketʼlińạ ar hajotreko bhoraokatʼlińạ. Ar ńitokʼ disạm cakʼlaoyicʼ do hape hapete aṛakʼgotʼ kạlińe menjoṅ kana? Ona do baṅ hoyokʼa; onkoge apnarte hecʼkateko oḍok idi lińma.”
38Unre onko kạmiyạko do noa katha hạkimkoko baḍae ocoketʼkoa. Ar onko hạkimko do Romi hoṛ kanakin menteko baḍaeketʼ khan botor hecʼatʼkoa. 39Onko do Pạul ar Silạs ṭhen senkate ikạko koekeda ar hajot oṛakʼ khonko oḍok ketʼkinte nagraha bạgiyakʼ lạgitʼko nehõratʼkinạ. 40Pạul ar Silạs do hajot oṛakʼ khonkin oḍoken khan Ludiạwakʼ oṛakʼtekin senena. Onḍe unkin do biswạsi boehako sãotekin ńapamena. Ar boehakokin udgạuketʼkote onḍe khonkin calaoena.
Currently Selected:
Aposkạmi 16: SBT
Highlight
Share
Copy
Want to have your highlights saved across all your devices? Sign up or sign in
Santali Bible © Bangladesh Bible Society, 2021.
