Aposkạmi 17
17
Pạul ar Silạs doThessalonikiạ nagrahare
1Pạul ar Silạs do Amphipolis ar Appoloniạ nagraha talate Thessalonikiạ nagrahatekin calaoena. Onḍe do Jihudikoakʼ mitʼṭen sunạgog tahẽkana. 2Pạul do acʼakʼ cạli leka ona sunạgogteye boloyena ar pe jirạukʼ mãhãre sonot sostor khon hoṛkoe galmaraoatʼkoa. 3Uni doe bujhạuatʼkoa are sạbudkeda je, Mạsi do duk jojom ar gocʼko khon jiwetʼ beredokʼ reakʼ jạruṛ tahẽkantaea. Uni doe metatʼkoa, “Ape ṭhen okoe Jisu reakʼ kathań lạiyetʼkan uni kangeae Mạsi do.” 4Noa katha ańjomkate adom Jihudiko doko pạtiạuente Pạul ar Silạs tạkin sãoteko mitʼena. Ona chaḍa Isor botorae aema Junạniko ar bhodro maejiuko hõ unkin sãoteko mitʼena.
5Menkhan Jihudiko do hiskạte bajar khon adom bạṛicʼ hoṛko ńam jarwaketʼkote nagrahare gulmalko ehopʼkeda. Ona tayom Pạul ar Silạs ńamkate hoṛko ṭhen ạgukin lạgitʼ onko do Jasonakʼ oṛakʼre jhãpko emkeda, 6menkhan unkin do onḍe bako ńamletʼkina. Unre onko do Jason ar adom biswạsi boehako or oḍok idikate nagraha cakʼlaoko ṭhenko idiketʼkoa ar hohowateko menkeda, “Okoe hoṛ goṭa dhạrtiko gulmaletʼ onko do ńitokʼ nonḍe hõko hecʼakana; 7ar Jason do acʼakʼ oṛakʼre jaegae emakatʼkoa. Ar onko do sanamkoge Kạisạrakʼ hukum birudko kạmikana, arko meneda, uni chaḍa Jisu ńutumanicʼ ar mitʼṭen raj menaea.”
8Noako menketʼte onko Jihudiko do nagraha cakʼlaoko ar hoṛkoko toras ocoketʼkoa. 9Menkhan Jason ar eṭakʼko do jạmin reakʼ ṭakako emketʼ khan doko aṛakʼkatʼkoa.
Beroea nagrahare
10Ńindạyen khan biswạsi boehako do Pạul ar Silạs tạkin Beroeateko kolkatʼkinạ. Unkin do onḍe seṭerkate Jihudikoakʼ sunạgogtekin boloyena. 11Thessalonikiạren Jihudi khon Beroea nagraharen Jihudikoakʼ mon do bạ̃ṛti soṛage tahẽkantakoa. Onko do khaṛa monte Isorakʼ katha ańjomkateko ataṅkeda. Ar Pạul okae menakatʼ ona do sạri kana se baṅ ona ńel lạgitʼ dinạm hilokʼ sostorko ḍunḍhạuetʼkan tahẽkana. 12Unre ạḍi utạr Jihudiko do Jisureko pạtiạuena; ona chaḍa aema bhodro Junạni maejiuko ar herel hoponko hõko pạtiạuena.
13Thessalonikiạren Jihudiko do Pạul Beroeare Isorakʼ kathae porcareda menteko ańjomketʼ khan onko do onḍeko calaoena ar onḍenko hoṛko ạulạuketʼkote gulmalko hoyocokeda. 14Unre biswạsi boehako do jalapuri aṛe secʼ Pạulko kolgotʼkadea, menkhan Silạs ar Timothi do Beroea regekin tahẽyena. 15Ar okoeko hoṛ do soṅgete Pạulko idiyede tahẽkan onko do Athens hạbicʼko ạgu seṭerkadea. Ona tayom onko do Silạs ar Timothi lạgitʼ noa hukumante Beroeateko ruạṛ calaoena je, Silạs ar Timothi do senkate usạra jemon Pạul sãotekin midokʼ.
Athens nagrahare
16Pạul do Athens nagrahare Silạs ar Timothiye tạṅgiyetʼkin tahẽkanre ona nagraha do boṅga murtikote perecʼ akane ńelkeda. Onate uniyakʼ mon do ạḍi jal jalaoentaea. 17Uni do sunạgogre Jihudiko ar Isor botoraekan Junạniko tulucʼ galmaraoe ehopʼena. Ona chaḍa bajarte okoekoko hijukʼkan tahẽkan, onko tulucʼ hõ din ke dine galmaraokan tahẽkana. 18Unre Epikuri ar Stoik ponḍitko modren adomko do Pạul tulucʼ reṭepeṭekʼko ehopʼena. Onko modren adomkoko menkeda, “Nui galbạjạriạ do cetʼe menetʼkana?” Arhõ eṭakʼko doko menkeda, “Uni do pasecʼ ạnạ̃ṛi boṅgako reakʼ kathae porcareda.” Onko do noa iạtegeko menkeda, ente Pạul do Jisu reaṅ ar gocʼko khon jewetʼ beredokʼ reaṅe porcarako kan tahẽkana. 19Unre onko guruko do Areopagos reakʼ bạisi samaṅre Pạulko idikedea. Arko kulikedea, “Okaṭakʼ nãwã sikhnạtem emokʼkan ona do cetʼ le baḍae daṛekea? 20Ente adomakʼko nonkam galmarao ale kana one oka do ạnạ̃ṛigele ańjometʼkan. Onate baḍae sanayetʼ lea onako reakʼ mane do cetʼkana mente.” 21Onko do noa iạtegeko menkeda, ente Athensren sanam hoṛko ar ona nagrahare okoe upriạko tahẽkan onko do nãwã nãwãnakʼ babotre katha roṛ ar ańjomte okteko khemaoetʼ tahẽkana.
22Unre Pạul do Areopagos reakʼ bạisire teṅgoyenteye menkeda, “E Athens nagraharen hoṛko ańjompe. Iń doń ńeletʼ kana, ape do joto secʼ khonge deb manaoko kanape, 23ente ińiń dãṛã baṛaekan tahẽkanre apeakʼ sewa jiniskoń ạribạndhiyetʼ tahẽkana ar nonkan mitʼṭecʼ pinḍ hõń ńamkeda one ona cetanre ol akan, ‘Baṅ baḍae akadeicʼ deb lạgitʼ.’ Ar ape do bin baḍaete okoepe sewawaekan uni reaṅge iń doń porcarape kana.
24 #
1 Raj 8.27; Jes 42.5; Apos 7.48 “Isor, one uni dhạrti ar onare menakʼ jotowakʼe benao akatʼ, unige serma ar dhạrtiren Probhu Isor kanae. Uni do tite benaoakʼ okaṭakʼ mundilre hõ bae tahenkana. 25Uni do jãhãn reṅgecʼ bạnukʼtaea, onate manwakoakʼ tite pujạ hatao hõ baṅ jạruṛaea, ente unige sanam manwako jiwi, sahẽtʼ ar eṭakʼ jotowakʼkoe danako kana. 26Uni do mitʼṭen manwa khon sanam jạtren hoṛkoe sirjạu akatʼkoa jemon goṭa dhạrtireko girobasokʼ. Onko do tinre okakoreko girobasokʼa ona hõ acʼakʼ sana lekae goṭa dohoakada. 27Isor do noae kạmikeda jemon manwako ṭamḍạuate uniko ńam baṛaye. Menkhan sạrige abo khon sạṅgińre do bạnugicʼan, 28ente uniyakʼ daṛetege jion bon khemaoeda arbon dãṛãn kana ar jiwetʼ hõ menakʼ bona. Aperen adom sereń joṛaokoko menakada, ‘abon hõ uniren hoponko kana bon.’
29“Enḍekhan uniren hoponkan khan bon Isor do manwa reakʼ kạrigol ar hudis bundiskote benao akatʼ sona, rupạ se dhiriren murti leka hudise do lek baṅkan tabona. 30Ente sedaeren hoṛ do bako baḍaekan tahẽkante Isor do noako secʼ bae beṅgetʼletʼa. Menkhan ńitokʼ uni do sanam jaegare joto hoṛge kại khon mon ạcur lạgitʼe hukumako kana, 31ente uni do nonkan mitʼṭecʼ dine nenḍa akada one ona dinre acʼe bahal akade mitʼṭen hoṛ hotete manwako dhoromteye bicạrko. Uni do gocʼko khone jiwetʼ beretʼ akadete sanam manwako ṭhen noae sạbud akada.”
32Ado gocʼko arhõko jiwetʼ beredokʼa menteko ańjomketʼ khan onko modren adomko doko cigạriyadea, menkhan eṭakʼko doko menkeda, “Ale do noa reaṅ arhõle ańjoma.” 33Unre Pạul do ona bạisi khone oḍok calaoena. 34Ar unre adomko hoṛ doko Pạul secʼena arko pạtiạuena. Onko biswạsiko modre Areaopagosren Dionusios ar Damaris ńutuman mitʼṭen maejiu hõe tahẽkana, ar unkin sãote arhõko tahẽkana.
Currently Selected:
Aposkạmi 17: SBT
Highlight
Share
Copy
Want to have your highlights saved across all your devices? Sign up or sign in
Santali Bible © Bangladesh Bible Society, 2021.
