Johan 10
10
Gukʼpiyicʼ reakʼ phen
1“Sạrigeń metape kana, jãhãege bhiḍi khạṛ reakʼ duạrte baṅ bolokate eṭakʼ secʼteye bolokʼ uni do kombṛo are ḍạku kana. 2Menkhan okoe duạr secʼte bhitriteye bolokʼkan unige bhiḍikoren gupiyicʼ do. 3Bhiḍikoakʼ khạṛ okoeye horhoyetʼkan uni do gupiyicʼge duạre jhicʼaea. Bhiḍiko do uniyakʼ aṛaṅko ańjomtaea, ar gupiyicʼ do acʼren bhiḍiko ńutum ńumkateye hohowakote bahreteye oḍok idikoa. 4Ar acʼren sanam bhiḍikoe oḍokleko tayom onko laha lahateye calakʼa ar bhiḍiko do uniko pańja idiyea ente onko do uniyakʼ aṛaṅko orom akatʼtaea. 5Onko do tis hõ ạnạṛi hoṛ ohoko pańjalea bickom uni khonko ńir pharakokʼa, ente ạnạṛi hoṛakʼ aṛaṅ do bako orom akada.”
6Onko Phạrusiko cetʼako lạgitʼ Jisu do noa kathae menkeda menkhan cetʼe lạiyatʼkoa ona do bako bujhạuleda.
Jisuge boge gukʼpiyicʼ
7Onate Jisu do arhõe metatʼkoa, “Sạrigeń metapekana, ińkangeạń bhiḍiko reakʼ duạr do. 8Iń lahate okoeko hecʼlen onko sanamkoge kombṛo arko ḍạku kana, menkhan bhiḍiko onkoakʼ katha do bako ańjomleda. 9Duạr do ińge. Ente jãhãege iń secʼte bhitriteye bolokʼ uni do bańcaoe ńama. Uni do bhitriteye bolokʼa ar bahreteye oḍokokʼa ar ạtiń lạgitʼ jaegae ńama. 10Kombṛo do eken kombṛo, khũn ar nonosṭo lạgitʼe hijukʼa. Iń doń hecʼakana jemon jionko ńam, ar ona jion jemon sareṛokʼtako.
11“Boge gupiyicʼ do ińge. Boge gupiyicʼ do acʼren bhiḍiko lạgitʼ acʼakʼ jiwiye alaetaea. 12-13Eken din ṭalao lạgitʼ okoe gupi kạmiye kạmikan uni do gupiyicʼe baṅkana ar bhiḍiko hõ acʼren doko baṅkana. Uni do hunḍạr hijukʼe ńellere bhiḍikoe ńir bạgiyakoa, ente uni do eken din ṭalaotae lạgitʼ noae kạmikana ar bhiḍiko lạgitʼ hõ jãhãnakʼ bae dạndikʼa. Ar hunḍạr do onkoe ạtkirkoa ar bhiḍiko doko chirchạturokʼa.
14-15 #
Mat 11.27; Luk 10.22 “Ińge boge gupiyicʼ. Baba do cetʼleka ińe baḍaeyediń onkage iń hõ Babań baḍaeyedea ar ińren bhiḍiko hõń baḍaeyetʼkoa ar onko hõ ińko baḍaeyediń kana. Iń do ińren bhiḍiko lạgitʼ ińakʼ jiwiyiń alayetʼtińạ. 16Arhõ bhiḍiko menakʼkotińạ one okoe do noa khạṛrenko baṅkan; onko hõ ạguko hoyokʼtińạ. Onko do ińakʼ aṛaṅko ańjoma ar onate mitʼ khạṛ bhiḍiko hoyokʼa ar gupiyicʼ hõ mitʼṭenge. 17Baba do noa iạteye dulạṛedeńkana, ente iń do ińakʼ jiwiyiń alayetʼtińa jemon arhõ onań ruạṛ ạgu daṛeakʼ. 18Okoe hõ ińakʼ jiwi iń khon do bako rejeńa, menkhan iń do ińtegeń alaeyeda. Iń do jiwi alae reakʼ ektiạri menakʼtiń arhõ jiwi hatao ruạṛ reakʼ hõ ektiạri menakʼtińạ. Noa dạyik do ińren Baba ṭhen khoniń ńamakada.”
19Jisuakʼ noa katha iạte Jihudiko talare arhõ bhinạ bhini hoyena. 20Onko modren ḍher hoṛko menkeda, “Unire do bhut menaea, uni doe bạulạha akana; cedakʼ uniyakʼ katha dope ańjometʼtaea?”
21Eṭakʼko doko menkeda, “Noa do bhut capaṛ hoṛakʼ katha do baṅkana. Bhut do cetʼ kãṛã hoṛakʼ mẽtʼe beṅgetʼ oco daṛekea?”
Probhu Jisui nihạ̃t ocokʼkan
22Noa tayom Jerusalemre mundil dhorom aroy reakʼ porob seṭerena. Unre rabaṅ din tahẽkana. 23Jisu do mundilre Solomonakʼ pinḍạreye dãṛã bãṛãekan tahẽkana. 24Unre Jihudi mukhiyạko do Jisu esetʼ ạcurkedeteko metadea, “Ar tinạkʼ din digdhạrem dohokalea? Mạsi kanam menkhan enḍekhan pusṭạute lạiyaleme.”
25Jisui roṛ ruạṛatʼkoa, “Ape mań lại akawatʼpe, menkhan bape pạtiạukʼ kana. Ińren Baba ńutumte okakoń kạmikan onakoge iń reaṅ gohaye emeda. 26Menkhan ape do bape pạtiạukʼkana, ente ińren bhiḍiko dope baṅkana. 27Ińren bhiḍiko do ińakʼ aṛaṅko ańjomeda. Ar iń doń baḍae oromakatʼkoa ar onko do ińko pańjayediń kana. 28Iń do jaejug jioniń emakokana. Onko do tishõ ohoko nosṭolena ar okoe hõ iń khon ohoko recʼidi daṛelekoa. 29Ińren Baba, one okoe do onkoe emakawạdiń, uni do sanam khone maraṅa. Okoe hõ Babawakʼ ti khon do bako recʼ idi daṛeakoa. 30“Iń ar Baba doliń mitʼgea.”
31Unre Jihudi mukhiyạko do tińe lạgitʼ dhiriko halaṅkeda. 32Jisu do onkoe metatʼkoa, “Babawakʼ hukumleka ạḍi okocʼ bhage kạmikoń udukʼ akawatʼpea Onako modre okalekanakʼ kạmi iạte dhirite tińińpe menetʼkana?”
33 #
Lev 24.16
Mukhiyạkoko menkeda, “Bhage kạmi iạte tińme do bale meneda, menkhan Isor upạrte henosta reakʼ katham roṛetʼkan iạtege. Ente am do manwa hoekate hõ Isorem benaokʼkana.”
34 #
Ser 82.6
Jisui menkeda, “Apeakʼ ạnre cetʼ baṅ olakana, ‘Ińiń menleda, ape do Isor kanape?’ 35Isorakʼ katha okoe ṭhen hecʼlen onkoge coṅ uni ma Deb menteye metatʼko tahẽkan. Sonot sostor reakʼ katha do cetʼ mạutạ daṛekokʼa? Tis hõ baṅa. 36Enḍekhan Baba okoeye sonot akade ar dhạrtiteye kolkede uni ińge tinreń metapekana ‘Iń doń Isorren Hopon kana,’ unre cekatepe meneda, ‘am do Isor upạrte henosta katham roṛeda?’ 37Ińren Babawakʼ kạmiko bạń kạmiyetʼ khan alope pạtiạuạńạ. 38Menkhan ińiń kạmikan khan iń bape pạtiạuạńre hõ ińakʼ kạmiko baṛe pạtiạuakʼpe. Onatepe baḍaea arpe bujhạu daṛeakʼa, Baba do ińre menaea ar iń do Babare minạńa.”
39Unre Jihudi mukhiyạko do Jisu sabe lạgitʼko kurumuṭukeda, menkhan uni do onkoakʼ ti khone paskao calaoena. 40#Jhn 1.28 Ona tayom uni do arhõ Jordan gaḍa hanasa senkateye tahẽyena. Johan do nonḍege pạhile bạptisetʼko kan tahẽkana. 41Ar ḍher hoṛ Jisu ṭhenko hecʼena arko menkeda, “Johan do jãhãn hahaṛa kạmi bae kạmileda, menkhan enhõ nui hoṛ reaṅ cetʼkoe lạiletʼ ona joto do sạrigea.” 42Ar onḍe ạḍi utạr hoṛ Jisureko pạtiạuena.
Currently Selected:
Johan 10: SBT
Highlight
Share
Copy
Want to have your highlights saved across all your devices? Sign up or sign in
Santali Bible © Bangladesh Bible Society, 2021.
