Luk 10
10
Eaegel celakoe koletʼko
1Ona tayom Probhu Jisu do arhõ eaegel celako porcar kạmi kolko lạgitʼe bachaoketʼkoa. Ar acʼ do okako ato ar jaegakote calakʼ lạgitʼe goṭa akatʼ tahẽkan, onako jaega calakʼ lahare uni do babar hoṛkateye kolkatʼkoa.
2 #
Mat 9.37,38 Are metatʼkoa, “Sạrige phosol do ḍhergea, menkhan kạmiyạko doko thoṛagea. Onate phosolren mạlik ṭhen nehõrokʼpe, jemon uni do acʼakʼ phosol samṭao lạgitʼ hoṛe kolko. 3#Mat 10.16 Do calakʼpe; iń do hunḍạrko talare bhiḍi hoponko lekań koletʼpea. 4#Mat 10.7-14; Mrk 6.8-11; Luk 9.3-5 Ṭaka reakʼ thạilạkʼ, khuti se panahi hõ soṅgete alope idijoṅa, ar horkore okoe hõ alope joharakoa. 5Ar jãhãṭakʼ oṛakʼtegepe bolokʼ pạhil do menpe, ‘noa gharońjrenko suluk apema.’ 6Ar suluke kusiyakʼkan jãhãe hoṛ onḍe menae khan enḍekhan apeakʼ suluk do unire tahena, menkhan jãhãe onkanko bạnukʼko khan enḍekhan apeakʼ suluk do aperege ruạṛ hijukʼa. 7#1 Kor 9.14; 1 Tim 5.18 Ona oṛakʼrege tahenpe ar okako emape onage jompe, ente okoeye kạmikan uni do acʼakʼ kuṛại ńam lek kanae. Ar mitʼ oṛakʼ bạgikate eṭakʼ oṛakʼte alope calakʼa.
8“Jãhã atotepe bolokʼre ar onḍenko hoṛko ataṅlepere onko okako jom ocope onage jompe. 9Ar ona atoren ruạkʼ hasokʼkan hoṛko bogekope ar lạiyakope, ‘Isorakʼ raj do ape ṭhen sorakana.’ 10#Apos 13.51 Menkhan jãhã atotepe senlenre ar onḍenko hoṛ bako ataṅpe enḍekhan ona ato reakʼ kulhikore senkate noa katha menpe, 11‘ape ato reakʼ jaṅgare laṭkao akawatʼle dhuṛi do ape upạrtele muchạu oṭokakʼ kana. Enrehõ baḍaekakʼpe, Isorakʼ raj do sorakana.’ 12#Gen 19.24-28; Mat 11.24; Mat 10.15 Ińiń metapekana, bicạr dinre ona ato reakʼ khon Sodom nagraha reakʼge boroṅ ḍher sahaokʼa.
Bin pạtiạukʼ nagrahako
(Mathae 11.20-24)
13 #
Jes 23.1-18; Jeh 26.1—28.26; Joe 3.4-8; Amo 1.9,10; Sak 9.2-4 “Hae am do E Khorasin! Hae am do E Bethsaeda! Okako hahaṛa kạmi aben talare hoyakan, ona do Tur ar Sidon nagrahare hoylen khan honaṅ ḍher din laharege onko do gõṛẽ kicricʼ horokʼkate ar torocʼre duṛupʼkate kại khon monko ạcurketakoa. 14Sạrige, bicạr dinre abenakʼ khon Tur ar Sidon reakʼge boroṅ ḍher sahaokʼa. 15#Jes 14.13-15 Ar am E Kapharnạhum, am do cetʼ serma hạbicʼ usul ocokʼem meneda? Tishõ baṅa, bickom am do patal puritem giḍi ocokʼa.”
16 #
Mat 10.40; Mrk 9.37; Luk 9.48; Jhn 13.20 Jisu do arhõ celakoe metatʼkoa, “Okoe apeakʼ kathako ańjometʼkan onko do ińakʼ kathageko ańjomeda. Okoe apeko nihạ̃tetʼpe onko do ińgeko nihạ̃tediń kana. Ar okoe ińko nihạ̃tedińkan onko do kol akadińicʼgeko nihạ̃tedekana.”
Eaegel celako ruạṛ hecʼen
17Ado onko eaegel celako do rạskạte ruạṛ hecʼkateko metadea, “E Probhu Isor, amakʼ ńutumle ńumetʼ khange bhutko hõ aleakʼ kathako ańjometʼ kana.”
18Jisui metatʼkoa, “Soetan do serma khon bijli leka ńurokʼkaniń ńel akadea. 19#Ser 91.13 Ńelpe, iń do biń ar kidińko cetanre lebedokʼ reakʼ daṛe, ar aperen bạiri Soetanakʼ sanam lekan daṛe cetanre hõ ektiạriń em akatʼpea. Onate jãhãnakʼtege ohope hạ̃nlena. 20Menkhan bhutko apeakʼ kathako ańjometʼkante alope rạskạkʼa, bickom sermare apeakʼ ńutum ol caṛhao akan iạte hulạsokʼpe.”
Jisui rạskạkʼkan
(Mathae 11.25-27; 13.16,17)
21Unre Jisu do sonot Jiu reakʼ rạskạte hulạsenteye menkeda, “E Baba, am do serma ar dhạrtiren Probhu Isor kanam. Sarhaoetʼme kạnạń, ente am do noako reaṅ ạkilan ar budanko khonem oko dohoakada menkhan albudạha lekanko ṭhen dom sodor akada. Hẽ Baba, amakʼ sana lekage noa do hoyakana.
22 #
Jhn 3.35;
Jhn 10.15
“Ińren Baba do ińakʼ tire sanamakʼe jimạ akada. Baba chaḍa okoe hõ bako baḍaea Hopon doe okoe kana, arhõ Hopon chaḍa okoe hõ bako baḍaea Baba doe okoe kana mente. Ona chaḍa Hopon okoe ṭhen Baba sodoreye menetʼkan eken unigeye baḍaea.”
23Uni do celako secʼe ạcurente hape hapeteye metatʼkoa, “Bhạgangea onako mẽtʼ do, one okakope ńeletʼkan ar ona ńel ńametʼkanko hõ. 24Ińiń metapekana, okakope ńeletʼkan, ona do ạḍi utạr nạbi ar rapajko ńeńelko menletʼre hõ bako ńelletʼa; ar okakope ańjometʼkan, ona ańjom sanaletʼkore hõ bako ańjomlakʼa.”
Mãyãwan Samariạ hoṛakʼ phen
25 #
Mat 22.35-40; Mrk 12.28-34 Mitʼṭen dhorom guru do Jisu ṭhene hecʼena. Ar biḍạue lạgitʼe menkeda, “E Guru, iń do cetʼ iń cekalere jaejug jioniń ńam daṛekea?
26Jisu do uniye metadea, “Moseyakʼ ạnre cetʼko ol menakʼa? Onḍe do cetʼem paṛhao akada?”
27 #
Bib 6.5;
Lev 19.18
Uni dhorom guru doe roṛ ruạṛkeda, “Probhu amren Isor do amakʼ goṭa ontorte, amakʼ goṭa jiwite, ar amakʼ goṭa daṛete dulạṛem, ar am aḍepaseren hoṛ apnar leka dulạṛem.”
28 #
Lev 18.5
Jisu do uniye metadea, “Am do ṭhikgem roṛ ruạṛ akada. Arem onka idiyetʼkan khan enḍekhan jionem ńama.”
29Uni dhorom guru do dhorome ṭarhaokʼa mente Jisui kulikedea, “Okoe kanae iń aḍepaseren hoṛ do?”
30Jisui roṛ ruạṛadea, “Mitʼṭen hoṛ do Jerusalem khon Jerikho nagrahateye calakʼkan tahẽkan jokhecʼ ḍạku talareye paṛaoena. Unre onko do uni hoṛakʼ kicricʼko totʼketʼtaea ar dal admạrwạkateko bạgi oṭowadea. 31Khan bhạg leka mitʼṭen naeke do ona horteye calakʼkan tahẽkana. Menkhan uni hoṛe ńelkede khan naeke doe sa paromena. 32Ṭhik onkage ar mitʼṭen Lewi hoṛ hõ ona jaegareye hecʼena ar uni hoṛe ńelkede khane sa paromena. 33#2 Bõs 28.15 Ona tayom Samariạren mitʼṭen hoṛ do ona horteye calakʼkan tahẽkanre uni hoṛ ṭhene hecʼ sorena. Ar uni hoṛ ńelte mãyã hecʼadea. 34Ar uni ṭhen senkate dal ghaokore sunum ar darkha rasae dulatʼteye bedhaokatʼtaea. Ona tayom acʼren gadhareye ladekedete mitʼṭecʼ sạrạite idikedeteye jotonkedea. 35Ado dosar hilokʼ bar Dinar oḍokʼkate sạrạiren mạlik emadeteye metadea, ‘nui hoṛ jotonem. Ar noa khon bạ̃ṛti khoroclen khan, iń do ruạṛokʼreń emkatama.’ ”
36Mucạtʼre Jisui menkeda, “Am do ńitokʼ cetʼem hudiskea? Noko pene hoṛ modre okoeṭakʼ do ḍạku tireye paṛaolen hoṛren aḍepaserene hoyena?”
37Uni dhorom gurui menkeda, “Uni mãyãwạdiyicʼ hoṛge.”
Jisu do uniye metadea, “Enḍekhan am hõ calaokate onkaeme.”
Jisu do Martha ar Mạriạme hiriyetʼkin
38 #
Jhn 11.1
Niạ tayom Jisu ar acʼren celakoko dãṛãnkan tahẽkanre mitʼṭecʼ atoteko boloyena. Ar Martha ńutuman mitʼṭen maejiu do rạskạte acʼakʼ oṛakʼte Jisui ataṅ aderkedea. 39Martharen do Mạriạm ńutuman mitʼṭen boeha kuṛiye tahẽkana. Uni do Probhu Isorakʼ jaṅga pheḍre duṛupʼkate kathae ańjomkan tahẽkana. 40Menkhan Martha do jom ńũ tear lạgitʼe udhuṛ dhupuṛ baṛaekan tahẽkana. Onate uni do hecʼkateye menkeda, “E Probhu Jisu, boehań kuṛi sapʼsosore bae goṛowạńkan do cetʼ bam moneyakʼ kana? Ado ma metaeme, jemon kạmireye goṛowạń.”
41Unre Jisu do Marthae metadea, “Martha, E Martha, am do ạḍi okocʼ reaṅem dạndikʼ kana, arem uduṛ dhupuṛ baṛae kana, 42menkhan mitʼṭecʼge jạruṛakʼ do menakʼa. Ente Mạriạm do bhage bakhrageye bachao akawana. Ona do uni ṭhen khon baṅ rejogokʼa.”
Currently Selected:
Luk 10: SBT
Highlight
Share
Copy
Want to have your highlights saved across all your devices? Sign up or sign in
Santali Bible © Bangladesh Bible Society, 2021.
