Luk 9
9
Gelbar celakoe koletʼko
(Mathae 10.5-15; Mark 6.7-13)
1Niạ tayom Jisu do gelbar celako mitʼ ṭhene hoho jarwaketʼkoa ar sanam bhutko cetanre ektiạriye ematʼkoa. Ar rugiko bogeko reakʼ daṛe hõe danatʼkoa. 2Ona tayom Isorakʼ raj porcar ar rugiko bogeko lạgitʼe kolkatʼkoa.
3 #
Luk 10.4-11
Uni doe metatʼkoa, “Horte lạgitʼ ṭheṅga, khuti, piṭhạ se ṭaka cetʼge alope iditora joṅa, ar babar goṭecʼ aṅgrop hõ alo. 4Ar jãhãṭakʼ oṛakʼregepe bolokʼ onḍege tahenpe ona ato ạuripe bạgiyakʼ hạbicʼ. 5#Apos 13.51 Ar hoṛko bako ataṅpe khan, enḍekhan onkoakʼ ato khonpe oḍokʼ hijukʼre apeakʼ jaṅga reakʼ dhuṛi hõ koṭa giḍi oṭokakʼpe, jemon onage onko upạrte gohae teṅgokʼ.”
6Unre celako do ato ato dãṛãkate Isorakʼ raj reakʼ bhage sombat porcar ar rugiko bogekoko ehopʼena.
Herode ạndukʼ mạndugokʼkan
(Mathae 14.1-12; Mark 6.14-29)
7 #
Mat 16.14; Mrk 8.28; Luk 9.19 Ado Jisui kạmi akatʼakʼko reaṅ ańjomkate disạm cakʼlaoyicʼ Herod do cetʼge bae bujhạu daṛeakʼkan tahẽkana. Ente adom hoṛko menetʼ tahẽkana, Johan bạbạptisicʼge gocʼko khone jiwetʼ beretʼ akana; 8arhõ adomko doko menetʼ tahẽkana, Eliại sodor akana; arhõ adomko doko menetʼ tahẽkana, ḍher din laharen mitʼṭen nạbigeye jiwetʼ beretʼ akana.
9Herode menkeda, “Johanakʼ bohokʼ mań makʼ ńur ocoakatʼtae. Enḍekhan okoe reaṅ iń ańjometʼkan, uni doe okoe kana?” Ar Herod do Jisu ńele reakʼ kurumuṭui ehopʼena.
Jisu mõṛẽ hajar hoṛe jom bi ocoyetʼko
(Mathae 14.13-21; Mark 6.30-44; Johan 6.1-14)
10Ado oneye kolletʼko celakoko ruạṛ hecʼen khan cetʼ cetʼko kạmiketʼ ona joto do Jisuko lạiyadea. Unre Jisu doe soṅgeketʼkote Bethsaeda sor mitʼṭecʼ nisun jaegateye senena. 11Menkhan gadel hoṛ do ona khoborko baḍaeketʼ khan Jisuko pańjakedea. Uni do onko hoṛkoe ataṅketʼkote Isorakʼ raj reakʼe lạiyatʼkoa. Ona chaḍa okoekoakʼ boge ocokʼ reakʼ jạruṛ tahẽkan onkoe bogeketʼkoa.
12Ado ber hạsurokʼkan tahẽkan jokhecʼ onko gelbar celako do Jisu ṭhen hecʼkateko menkeda, “Abo okare menakʼ bon noa do mitʼṭecʼ nisun jaegakana. Onate gadel hoṛko bidạkakome jemon onko do sorteakʼ ato ar nagrahate senkate jomakʼ ar tahen lạgitʼ jaegako sendra ńam daṛeakʼ.”
13Jisui metatʼkoa, “Onko do apege jomakʼ emakope.”
Adoko metadea, “Ale ṭhen do eken mõṛẽ goṭecʼ piṭhạ ar barea hako chaḍa ar cetʼge bạnukʼa. Menkhan ale do senkate jomakʼle kiriń ạgule anecʼle jom oco daṛeakoa.” 14Onḍe do mõṛẽ hajar gan herel hoponko tahẽkana.
Jisu do acʼren celakoe metatʼkoa, “Mimitʼ dolre mõṛẽgel mõṛẽgelkate pantete duṛupʼ ocokope.”
15Ado onkage celako do sanam hoṛko duṛupʼ ocoketʼkoa. 16Ar Jisu do ona mõṛẽ goṭecʼ piṭhạ ar barea hako ataṅkate serma secʼ beṅgetʼ rakapʼkateye bhorada are kecakʼkeda. Ona tayom gadel hoṛko emako lạgitʼ celakoakʼ tireye calatʼkoa. 17Ar sanam hoṛko jomkeda arko biyena. Ar okako kecakʼ hiricʼ pạsir ńur tahẽkan onate celako do gelbar phạtiạkʼko halaṅ jarwakeda.
Patrasakʼ aṅgocʼ Jisu doe Mạsi kana
(Mathae 16.13-19; Mark 8.27-29)
18Mitʼ dhao Jisu do mitʼṭecʼ nisun jaegareye koejoṅkan tahẽkana. Unre uni soṅgete eken acʼren cela motogeko tahẽkana. Adoe kuliketʼkoa, “Iń doń okoe kana, ar noa reaṅ hoṛko do cetʼko meneda?”
19 #
Mat 14.1,2; Mrk 6.14,15; Luk 9.7,8 Celakoko metadea, “Adomko doko meneda am dom Johan bạbạptisicʼ kana; ar adomko doko meneda Eliạ kanam; arhõ adomko doko meneda sedaeren mitʼṭen nạbigeye jiwetʼ beretʼ akana.”
20 #
Jhn 6.68,69 Jisui metatʼkoa, “Menkhan ape do okoe kạnạń mentepe meneda?”
Patrase menkeda, “Am do Isorren uni Mạsi kanam.”
Jisu acʼakʼ gujukʼ reakʼe lại lahayetʼ
(Mathae 16.20-28; Mark 8.30—9.1)
21Unre Jisu doe sontorkatʼkoa are hukumatʼkoa, okoe ṭhen hõ jemon noa katha aloko lại baṛae. 22Uni do arhõe metatʼkoa, Manwa Hopon do aema duk jojom hoyokʼtaea. Ar murubbiko, maraṅ naekeko ar sostor baḍaeko do uniko nihạ̃tea. Are gocʼ ocokʼa ar pe din hilokʼre gocʼko khon jiwetʼ beredokʼ hoyokʼtaea.
23 #
Mat 10.38; Luk 14.27 Ona tayom sanamkoe metatʼkoa, “Jãhãege ińakʼ horte hijukʼe menetʼ khan uni do acʼakʼ kusileka aloe calakʼma; ar dinạmge acʼakʼ kurus gokʼkate ińe pańjańma. 24#Mat 10.39; Luk 17.33; Jhn 12.25 Jãhãege acʼ lạgitʼ bańcao tahene menetʼ khan uni do acʼakʼ jiwiye khuạutaea; menkhan okoe iń lạgitʼ acʼakʼ jiwiye khuạutae, uni do onae bańcaotaea. 25Ar jãhãege goṭa dhạrtiye lab iạte acʼakʼ jiwiye khuạutae enḍekhan uniyakʼ do cetʼ porho hoyokʼtaea? 26Jãhãege iń ar ińakʼ katha iạteye lajaokʼ khan, Manwa Hopon hõ tinre acʼ ar acʼren Apatakʼ ar sonot goḍetkoakʼ ṭhonokanteye hijukʼa unre acʼ hõ uni hoṛ iạteye lajaokʼa. 27Sạrigeń metapekana, nonḍe adom hoṛ menakʼkoa, onko do Isorakʼ raj ạuriko ńel hạbicʼ bako gujukʼa.”
Burure borone pheraokʼkan
(Mathae 17.1-13; Mark 9.2-13)
28 #
2 Pat 1.17,18 Ado noako kathae roṛketʼ mitʼ hapta tayom Jisu do koejoṅ lạgitʼ Patras, Johan ar Jakobteko soṅgekate mitʼṭecʼ buruteye rakapʼena. 29Are koejoṅkan tahẽkanrege Jisuakʼ mẽtʼãhã do bodolena ar uniyakʼ kicricʼko hõ pĩṛĩtʼ pĩṛĩtʼ ponḍentaea, 30ar uni tulucʼ bar hoṛ galmaraokan kin ńelena. Unkin do Mose ar Eliạge. 31Onko do ṭhonokanteko ńelena. Ar Jerusalemre purạu lạgidokʼkan Jisuakʼ gujukʼ reaṅko galmarokan tahẽkana.
32Unre Patras ar uniren soṅgetenko do jhap jhap dudṛumetʼko tahẽkana. Adoko beṅgetʼ pharnoen khan Jisuakʼ ṭhonokko ńelkeda ar soṅgete bar hoṛ teṅgo akan hõko ńelketʼkinạ. 33Ado unkin hoṛ tinre Jisu ṭhen khonkin calakʼkan tahẽkana unre Patras do Jisui metadea, “E Guru, bhagege hoyakana nonḍe menakʼle iạte. Ale do nonḍe pea kumbạ oṛakʼle benaoa, mitʼṭecʼ do am lạgitʼ, mitʼṭecʼ do Mose lạgitʼ ar mitʼṭecʼ do Eliạ lạgitʼ.” Menkhan uni do bae bujhạuleda acʼ do cetʼe meneda mente.
34Patras kathae roroṛkan tahẽkanrege mitʼṭecʼ rimil do rakapʼ hecʼente onkoe umul esetʼketʼkoa. Ar rimilteko danaṅen khan celako do botor caṛhaoatʼkoa. 35#Jes 42.1; Mat 3.17; 12.18; Mrk 1.11; Luk 3.22 Ona rimil khon noa katha ańjomena, “Nuige ińren Hopon do, one uniń bachao akade; ape do uniyakʼ ańjomtaepe.”
36Ado katha roṛ thiren khan eken Jisu eskargeye ńelena. Ar celako do oneko ńelketʼ reaṅ okoe hõ bako lại baṛaletʼte hapegeko tahẽyena.
Bạṛicʼ jiu capaṛ akawade koṛae bogeyen
(Mathae 17.14-18; Mark 9.14-27)
37Ado dosar hilokʼ Jisu ar onko celako buru khonko pheḍ hecʼen khan ạḍi utạr hoṛ do Jisu sãote ńapamokʼ lạgitʼko hecʼena. 38Unre gadel hoṛ bhitri khon mitʼ hoṛ do ãṭ aṛaṅte hohowate Jisui metadea, “E Guru, dayakate hoponiń baṛe ńeleme. Uni doe sadher hopon kantińạ. 39Uni do mitʼṭen bạṛicʼ jiue sabea ar ackageye kikiạu goda. Are mocṛa mucṛiyea ar uniyakʼ moca khon photo photo oḍokokʼa; ar ona tayom do garal garal huruṛ baṛakateye aṛagea. 40Iń do amren celako ṭheniń nehõrlena jemon uni jiuko oḍok giḍikae, menkhan bako daṛeada.”
41Unre Jisui menkeda, “E bepạtiạu ar peṛta piṛhirenko! Ar tinạkʼ din ape tulucʼ iń tahena ar tinạkʼ diniń sahaokatapea? Dini hoponme nonḍe ạguiyem.” 42Ado tinre koṛa do Jisu ṭhene hijukʼkan tahẽkana unre bạṛicʼ jiu do uniye mocṛao bhinḍạṛkedea. Onate Jisu do bạṛicʼ jiue dhomkaokedea ar koṛae bogekedete eṅgat-apat ṭhene jimạkadea. 43Unre sanam hoṛ do Isorakʼ maraṅtetʼ iạteko hahaṛayena.
Jisu do acʼakʼ gujukʼ ar jiwedokʼ reakʼ arhõe lại lahayetʼ
(Mathae 17.22,23; Mark 9.30-32)
Ado Jisui cekaketʼakʼ babotre hahaṛa tulucʼko hudisokʼkan tahẽkanre, uni do acʼren celakoe metatʼkoa, 44“Ińakʼ noako katha monre rebetʼ dohoype, ente Manwa Hopon do hoṛkoakʼ tireko soprotea.”
45Menkhan celako do ona katha bako bujhạuleda. Isor do onko ṭhen khone danaṅ akatʼ tahẽkana jemon onko do ona aloko bujhạu daṛeakʼ. Ar celako hõ noa reakʼ jãhãnakʼ katha kuliyeko botorokʼkan tahẽkana.
Nindhạnokʼ reaṅ
(Mathae 18.1-5; Mark 9.33-37)
46 #
Luk 22.24
Ado celako modre okoeṭakʼ sanamko khone maraṅa ona reaṅ ako talareko reṭepeṭekʼkan tahẽkana. 47Jisu do onkoko hudisokʼkan reakʼe bujhạuketʼtako khan mitʼṭen kạṭicʼ gidrạ ạgukate acʼ ṭhene teṅgokedea. 48#Mat 10.40; Luk 10.16; Jhn 13.20 Ona tayome metatʼkoa, “Jãhãege iń ńutumte nui gidrại ataṅe, uni do ińgeye ataṅińạ. Ar okoe ińe ataṅiń, uni do kol akadińicʼgeye ataṅea. Apeko modre okoe sanamko khone huḍiń utạricʼkan, unigeye maraṅa.”
Acʼ upạrte okoeko baṅkan ko
(Mark 9.38-40)
49Johane menkeda, “E Guru, am ńutumte mitʼṭen hoṛ do bạṛicʼ jiukoe oḍok giḍikanle ńelakadea. Ar abo dolrene baṅkante uni dole mana akadea.”
50Jisu do uniye metadea, “Alope manayea, ente okoe ape upạrtene baṅkan uni do ape secʼren kangeae.”
Samariạko bako ataṅlede
51Ado sermate calakʼ reakʼ okte hoyentae khan uni do Jerusalemte calakʼ lạgitʼe mon murukkeda. 52Uni do laharege onḍe hoṛkoe kolketʼkoa. Onko do Jisu sanamakʼ tearae lạgitʼ Samariạkoakʼ mitʼṭecʼ atoteko boloyena. 53Menkhan Jisu do Jerusalemteye calakʼkante ona atoren hoṛko do bako ataṅledea. 54#2 Raj 1.9-16 Ona ńelte acʼren cela Jakob ar Johan dokin menkeda, “E Probhu Jisu, Eliạ leka serma khon seṅgel ńurakote marao giḍikako lạgitʼ hukum liń emamem khojkana?”
55Jisu do unkin secʼ ạcurkate dhomkao ketʼkinteye metatʼkinạ, “Abenre cetʼlekan jiu menaea ona do baben baḍaea, ente Manwa Hopon do manwa nosṭoko lạgitʼ do bae hecʼakana, bickom bańcaoko lạgitʼge.” 56Ona tayom onko do eṭakʼ atoteko calaoena.
57Ar horteko calakʼkan tahẽkanre mitʼ hoṛ do Jisui metadea, “Jãhãtegem calakʼ iń hõ am sãote onḍegeń calakʼa.”
Jisu pakʼńjako reaṅ
(Mathae 8.19-22)
58Jisu do uniye metadea, “Toyoko do bhugạkʼ menakʼtakoa ar cẽṛẽkoakʼ do tukạ menakʼa, menkhan Manwa Hopon do bohokʼ dohoytae reakʼ jaega hõ bạnukʼtaea.”
59Ado eṭakʼ mitʼ hoṛe metadea, “Dela iń soṅgete hijukʼme.”
Menkhan uni hoṛ doe menkeda, “E Probhu, ạpuń topaye lạgitʼ sen maṛaṅ ocowạńme.”
60Jisu do uniye metadea, “Gocʼkoge akoren gocʼko topa ocowakome, menkhan am do hijukʼte Isorakʼ raj lại pasnaome.”
61 #
1 Raj 19.20
Ado arhõ eṭakʼ mitʼ hoṛe menkeda, “E Guru, iń do am sãoteń calakʼgea, menkhan iń oṛakʼrenko ṭhen bidạ hatao maṛaṅ ocowạńme.
62Jisu do uniye metadea, “Nahel kãṛbare ti capokate tayom secʼ beṅgetʼicʼ do Isorakʼ raj lạgitʼ lek doe baṅkana.”
Currently Selected:
Luk 9: SBT
Highlight
Share
Copy
Want to have your highlights saved across all your devices? Sign up or sign in
Santali Bible © Bangladesh Bible Society, 2021.
