Luk 21

Rạnḍi maejiuakʼ dan

(Mathae 12.41-44)

1Niạ tayom Jisu do kisạ̃ṛ hoṛko mundil reakʼ dan sundukre onkoakʼ dan dohokane ńelketʼkoa. 2Ar mitʼṭen reṅgecʼ rạnḍi maejiu hõ hecʼkate barea huḍiń poesa dohoy ńelkedea. 3Unre Jisu do acʼren celakoe metatʼkoa, “Sạrigeń metapekana, nui reṅgecʼ rạnḍi maejiu do eṭakʼ sanamko khon bạ̃ṛtiye dohoakada, 4ente eṭakʼko do akoakʼ sareṛokʼakʼ dhon khonko dohoakada, menkhan nui maejiu doe reṅgecʼgere hõ bańcao tahen lạgitʼ oka tahẽkantae ona jotogeye emkeda”

Mundil dhaṅdhaserokʼ reaṅ

(Mathae 24.1,2; Mark 13.1,2)

5Celako modren adomko do mundil reaṅko galmarao kan tahẽkana. Onko doko menetʼ tahẽkana, mońj mońj dhiri ar dan reakʼ jiniskote dolan do cetʼleka sajao akana. Unre Jisui metatʼkoa, 6“Ape ma noakope ńeletʼkan, menkhan nonkan dinge hijukʼa, unre dhiri cetan dhiri do baṅ tahena; jotoge rạputʼ giḍi ocokʼa.”

Be suluk ar santao

(Mathae 24.3-14; Mark 13.3-13)

7Celako do Jisuko kulikedea, “E Guru, tis noako do hoyokʼa ar okaṭakʼ cinhạ ńeltele bujhạu daṛeakʼa, noako hoyokʼ reakʼ okte do seṭer akana mente?”

8Jisui roṛ ruạṛatʼkoa, “Ńelpe, okoe hõ jemon aloko bulạupe, ente ḍher hoṛge iń ńutumte hecʼkateko metapea, ‘iń kangeạń’ ar ‘okte do sorakana.’ Onko do alope pańjakoa. 9Ape do lạṛhại ar gulmalpe ańjomlere alope botorokʼa, ente pạhilre noako do hoyokʼgea; menkhan unrehõ mucạtʼtetʼ do baṅ hoy hodokʼa.”

10Ona tayom Jisui metatʼkoa, “Mitʼ jạtrenko do eṭakʼ jạtrenko upạrte, ar mitʼ rajosṭi do eṭakʼ rajosṭi upạrteko lạṛhạiya. 11Ạḍi ãṭ dhạrti laṛao hoyokʼa ar jaega jaegakore akal ar mahamạriko hoyokʼa. Ona chaḍa sermare nonkan ghoṭnako hoyokʼa ar cinhạko ńelokʼa, oka do ạḍi botorge.

12“Noako hoyokʼ lahare hoṛko do apeko sapʼpea arko santaopea. Ar bicạrpe lạgitʼ sunạgogreko idipea ar hajotreko bhoraopea. Iń iạte rapajko ar disạm cakʼlaoko samaṅreko idipea, 13onate iń reaṅ goha emokʼ reakʼ ạt hoyokʼtapea. 14#Luk 12.11,12 Ńitge monre niṭ joṅpe, ar roṛ dogokʼ lạgitʼ do alope sapṛaokʼa, 15ente iń do nonkan katha ar nonkan akeliń emapea, onape roṛ ruạṛakore aperen bạiriko do cetʼhõ bako roṛ daṛeakʼa, ar onahõ bako baṅ daṛeakʼa. 16Aperen gogo-baba, boehako, gateko ar peṛa pạrbhạko do apeko sapʼocopea. Ar ape modre adomko doko gocʼ ocokoa. 17Iń iạte joto hoṛko hirkhạwapea, 18menkhan apeakʼ do mitʼṭecʼ upʼ hõ baṅ loksanokʼtapea. 19Ape do ṭarhao akaepe tahente sạri jionpe labjoṅa.

Jerusalem dhaṅdhaserokʼ reaṅ

(Mathae 24.15-21; Mark 13.14-19)

20“Tinre Jerusalem do palṭonko hotete esetʼ ạcurakatʼpe ńela unre bujhạupe, Jerusalem dhaṅ dhaserokʼ din do sorakana mente. 21Unre okoe Jihudạreko tahen onko do buruteko ńirjoṅma. Ar okoe nagrahareko tahen onko do nagraha bahreteko oḍok calakʼma. Ar okoe atoreko tahen, onko do nagrahate aloko hijukʼma, 22#Hos 9.7 ente noako din do sạjạiyokʼ dinge hoyokʼa, ar onate sonot sostorre oka ol menakʼ ona do purạukʼa. 23Unre bhạrti hoṛmoanko ar okoe do gidrạko nunuako kan onkore do hae hae! Unre dhạrtire do maraṅ dorloe hoyokʼa ar Jihudiko cetanre Isorakʼ sạjại pheḍ hijukʼa. 24Onko do tarwaṛeteko gocʼ ocokʼa ar sanam jạtrenko talare bondi akan leka chirchạturko tahena. Ar por jạtrenkoakʼ okte ạuri purạukʼ hạbicʼ Jerusalem do onkoakʼ jaṅgate lebetʼ gańjaokʼa.

Manwa hopon hijukʼ reaṅ

(Mathae 24.29-31; Mark 13.24-27)

25 # Jes 13.10; Jeh 32.7; Joe 2.31; Sod 6.12,13 “Unre siń cando, ńindạ cando ar ipilkore ạḍi lekan cinhạko ńelokʼa. Dhạrtiren sanam jạtrenko do kosṭoko ńama ar jalapuri reakʼ hudhud saḍe ar ḍheoko iạte onko do jiwi oṭaṅokʼtakoa. 26Ar dhạrtire darakanakʼko reakʼ botorte hoṛko doko keklesedokʼa, ente siń cando, ńindạ cando ar ipilko do ar bako ṭarhao tahena. 27#Dan 7.13; Sod 1.7 Unre Manwa Hopon do maraṅ daṛe ar ṭhonokante rimilte hijukʼkanko ńelea. 28Noa ghoṭnako hoyokʼre ape do sojhete teṅgokʼpe ar bohokʼ rakabtape, ente apeakʼ chaḍaokʼ do sorakana.”

Loa dare khon sikhạuna

(Mathae 24.32-35; Mark 13.28-31)

29Ona tayom Jisu do acʼren celako cetʼako lạgitʼ noa phene lạiyatʼkoa, “Loa dare ar eṭakʼ dareko beṅgetʼakʼpe. 30Sakam sagenlen khanpe bujhạu daṛeakʼkana, hoe lolo din do seṭer akana mente. 31Onkage noako hoyokʼpe ńellere bujhạupe, Isorakʼ raj do sorakana. 32Sạrigeń metapekana, noako hoylenre hõ niạ piṛhiren thoṛa hoṛ do jiwetʼko tahena. 33Ot ar serma do cabakʼa, menkhan ińakʼ kathako do jaejug hạbicʼ tahena.

Jagwar akae tahen reaṅ

34“Sontor akae tahenpe, jemon apeakʼ mon do rij roṅ, ńũ bulokʼ ar gharońj reakʼ dạndite ten alo tahentape. 35Ar baṅkhan cetʼleka pạsi ackage bond godokʼ onkage ona din hõ ackage apere hecʼ paṛaokʼa, ar onka leka dhạrtiren sanam hoṛko cetanre hõ hecʼ paṛaokʼa. 36Onate jagwar tahenpe ar koejoṅpe jemon jãhãnakʼge hecʼape onakope parom idite Manwa Hopon samaṅrepe teṅgo daṛeakʼ.”

37 # Luk 19.47 Onako dinre Jisu do dinạmge mundilreye cetʼakokan tahẽkana, menkhan ńindạ do bahrete senkate Jạitun burureye tahenkan tahẽkana. 38Ar sanam hoṛ uniyakʼ katha ańjomtae lạgitʼ setakʼ khonge mundilteko hijukʼkan tahẽkana.

Currently Selected:

Luk 21: SBT

Highlight

Copy