Luk 22
22
Jisu upạrte soṛojontro
(Mathae 26.1-5,14-16; Mark 14.1,2,10,11; Johan 11.45-53)
1 #
Exo 12.1-27
Ona oktere Jihudikoakʼ bin khạmiyanakʼ piṭhạ porob do hecʼsor akan tahẽkana. Noage bańcaokʼ porob hõko metakʼkan tahẽkana. 2Ar maraṅ naekeko ar sostor baḍaeko do hape hapete Jisu goje reakʼ ạtko ńam baṛayetʼ tahẽkana, ente onko do disạm hoṛko botorako kan tahẽkana.
Jihudạ do Jisu soprote lạgitʼe rebenen
(Mathae 26.14-16; Mark 14.10,11)
3Unre okoe Jihudạ Iskạriotko metaekan tahẽkan unire do Soetane boloyena. Nui do Jisuren gelbar celako modren mitʼ hoṛe tahẽkana. 4Uni do senkate maraṅ naekeko ar mundilren kạmiyạko sãoteye galmaraokeda cetʼlekate onkoakʼ tire Jisui soprotea mente. 5Onate onko do ạḍiko rạskạyena ar ṭaka emae reakʼko gokʼadea. 6Unre Jihudạ doe rebenena ar ạt ńam baṛaye ehopʼena jemon hoṛ bako tahenre Jisui soprot daṛeae.
Bańcaokʼ porob reakʼ bhoj sapṛao
(Mathae 26.17-25; Mark 14.12-21; Johan 13.21-30)
7-8Ado bin khạmiyanakʼ piṭhạ porob reakʼ dinre bańcaokʼ porob bhojre lạgitʼ bheḍa hoponko gocʼetʼko kan tahẽkana. Ado ona din seṭeren khan Jisu do Patras ar Johan noa menkateye kolkatʼkinạ, “Do senkate abo lạgitʼ bańcaokʼ porob reakʼ bhoj tearben, jemon bon jom daṛeakʼ.”
9Unkin do Jisukin kulikedea, “Okareliń tearama mentem menjoṅ kana?”
10-11Jisui metatʼkinạ, “Ńelben, nagrahate ben bolokʼre mitʼṭen baba hoṛ do kanḍate dakʼ idikan ben ńelea. Aben do uni ben pańja idiyea ar okaṭakʼ oṛakʼteye bolokʼa, ona oṛakʼren mạlik ben metaea, ‘Guru baḍae sanayedea, celako sãote bańcaokʼ porob reakʼ bhoj okareye jom, ona peṛa kandha do okaṭakʼ kana?’ 12Unre uni do sajao akatʼ mitʼṭecʼ koṭha kandhae udukʼ abena; ar onḍege jotowakʼ ben teara.”
13Ado Jisui metatʼkin lekage, unkin do senkate sanamakʼ onkage kin ńamkeda ar bańcaokʼ porob reakʼ bhojkin sapṛaokeda.
Probhu kedokʼ
(Mathae 26.26-30; Mark 14.22-26; 1 Korinthiko 1.23-25)
14Ona tayom okte hoyen khan Jisu do apostolko tulucʼ jojome duṛupʼena. 15Uni doe metatʼkoa, “Duk ạuriń jomre, bańcaokʼ porob reakʼ noa bhoj ape tulucʼ jojom ạḍi sana tahẽkantińạ. 16Ińiń metapekana, Isorakʼ rajre noa reakʼ ạuri purạukʼ hạbicʼ, iń do noa ohogeń jomlea.”
17Inạ tayom Jisu do bạṭi ataṅkate Isor gunmanao joharadeteye menkeda, “Ape do noa reakʼ hạṭińjoṅpe, 18enteń metapekana, ńit khon Isorakʼ raj ạuri hijukʼ hạbicʼ iń do darkha rasa bạń ńũiya.”
19Ona tayom uni do piṭhạ halaṅkate Isore gun manao joharadea. Ar ona kecakʼkate celako ematʼkoteye metatʼkoa, “Noa do ińakʼ hoṛmo kana oka do apeko lạgitʼ emogokʼkan. Nonkaepe iń disạyiń lạgitʼ.”
20 #
Jir 31.31-34
Ado jom tayom onkage bạṭi hõ ataṅkateye metatʼkoa, “Ińakʼ mãyãm hotete Isorakʼ oka nãwã bondobos bahalokʼkan, ona bondobos reakʼ cinhạ do noa bạṭi kana. Ińakʼ noa mãyãm do apeko lạgitʼ emogokʼa. 21#Ser 41.9 Ńelpe, okoe ińe soprotiń uniyakʼ ti hõ ińakʼ ti sãote noa mejre menakʼa. 22Isor okae niṭ dohoakatʼ onkage Manwa Hopon do gujukʼ hoyokʼtaea; menkhan hae uni hoṛ lạgitʼ do, one okoe do uniye soprot ocoye!”
23Khange celako do ako akore kupulikʼko ehopʼena, nonkae kạmi lạgidokʼ kạnicʼ doe okoe kana mente.
Okoe kanae maraṅicʼ do
24 #
Mat 18.1; Mrk 9.34; Luk 9.46 Ado okoeṭakʼe maraṅa ona reaṅ ako talareko reṭepeṭekʼ kan tahẽkana. 25#Mat 20.25-27; Mrk 10.42-44 Jisui metatʼkoa, “Boṅgan hoṛ jạtrenko modre rapajkoge mạlikiko calaoeda ar onkoren ektiạriankoge onko do bhạkʼlạikoko metakokana, 26#Mat 23.11; Mrk 9.35 menkhan apeko talare nonka hoyokʼ do lek baṅkana. Ape modre joto khon maraṅicʼ do huḍińicʼ lekae hoyokʼma, ar ạyuricʼ do sapʼdapʼicʼ leka. 27#Jhn 13.12-15 Okoeṭakʼe maraṅa, jojom duṛupʼ akanicʼ se sapʼsosoricʼ guti? Uni jojom duṛupʼ akanicʼge cetʼ baṅa? Menkhan iń do apeko talare sapʼsosoricʼ lekań hoyakana.
28Ińakʼ sanam harket saset oktere ape do bape bạgi akawạdińạ. 29Ińren Baba cetʼleka ektiạriye emakawạdiń onkage iń hõ apeko ektiạriń dan akawatʼpea. 30#Mat 19.28 Onate ińakʼ rajre ape do iń tulucʼpe jom ńũiya ar siṅghạsonre duṛupʼkate Israelren gel bar khũṭrenkoakʼpe bicạrtakoa.
Patrasakʼ ńurokʼ reakʼe lại lahayetʼ
(Mathae 26.31-35; Mark 14.27-31; Johan 13.36-38)
31E Simon, E Simon, ńelpe, Soetan do guhum leka calape lạgitʼe khojakada. 32Menkhan iń do am lạgitʼ iń koeyeda, jemon amakʼ biswạs alo ḍigạukʼtam. Am do iń ṭhenem ruạṛ hijukʼre amren noko boehakom keṭecʼkoa.”
33Patras do Jisui metadea, “E Probhu Isor, am tulucʼ hajot ocokʼ ar gujukʼ hõń sapṛaogea.”
34Jisui roṛ ruạṛadea, “E Patras, ińiń metamkana, teheń sim sạnḍi ạuriye ragre am do pe dhaoem baṅeńa.”
Darakan biḍạu reaṅ
35 #
Mat 10.9,10; Mrk 6.8,9; Luk 9.3; 10.4 Ona tayom Jisu do acʼren celakoe metatʼkoa, “Ṭaka reakʼ thạilạkʼ, khuti ar panahi chaḍań koletʼpere cetʼ jãhãnakʼtepe ṭonṭa emanlena?”
Celakoko menkeda, “Cetʼte hõ baṅa.”
36Jisui metatʼkoa, “Menkhan ńitiń metapekana, jãhãege ṭaka reakʼ thạilạkʼ se khuti menakʼtae khan uni doe iditora joṅma. Ar okoeyakʼ tarwaṛe bạnukʼtae uni do acʼakʼ oyonakʼ ạkhrińkate mitʼṭecʼ tarwaṛeye kirińjoṅ ma. 37#Jes 53.12 Sonot sostorre ol akana, ‘uni do kại hoṛko tulucʼe lekha mitʼena.’ Ińiń metapekana, noa katha do ińrege purạukʼa, ente iń reaṅ okako olakan ona do purạu lạgidokʼ kana.”
38Unre celakoko menkeda, “E Probhu Isor, ńelme, nonḍe do barea tarwaṛe menakʼa.”
Jisui roṛ ruạṛatʼkoa, “Inạge ḍhera.”
Jạitun burure Probhu Jisu
(Mathae 26.36-46; Mark 14.32-42)
39Ado Jisu ona jaegae bạgi oṭowatʼte acʼakʼ cạli leka Jạitun buruteye rakapʼena. Ar acʼren celako hõ uniko pańjakedea. 40Ar ṭhik jaegareye seṭeren khan Jisu do onkoe metatʼkoa, “Koejoṅpe jemon biḍạure alope paṛaokʼ.”
41Ona tayom Jisu do celako ṭhen khon thoṛa sạṅgiń ńokʼ senkate ikhṛumente koejoṅe ehopʼena, 42“E Baba, amem moneyakʼkan khan, noa duk reakʼ bạṭi do iń khon pharakme baṛe. Enhõ ińakʼ monejoṅ leka do baṅ, menkhan amakʼ sana lekage hoyokʼma.”
43Unre serma khon mitʼṭen goḍet do hecʼkate Jisui daṛe ocokedea. 44Ar Jisu do ala jhalareye paṛaoente arhõ jidkateye koekeda. Uniyakʼ hoṛmo reakʼ balbal dakʼ do mãyãm leka otre ṭhopʼ ṭhopʼ jorokʼ ehopʼena.
45-46Ado koejoṅ tayom beretʼkate uni do acʼren celako ṭhene hecʼena. Ar mon reakʼ duk ar laṅgate jạpitʼ akatʼe ńelketʼkoteye metatʼkoa, “Cedakʼpe jạpitʼ joṅkana? Ma beretʼpe ar koejoṅpe jemon biḍạure alope paṛaokʼ.”
Jisuko griptarede kan
(Mathae 26.47-56; Mark 14.43-50; Johan 18.3-11)
47Jisu do kathae roroṛkan tahẽkanrege onḍe ạḍi utạr hoṛko hecʼena. Ar Jihudạko metae gelbar celako modren mitʼ hoṛ do onko laha lahateye hijukʼkan tahẽkana. Uni do Jisu ṭhene hecʼ sorena cokʼae lạgitʼ. 48Unre Jisu do uniye metadea, “E Jihudạ, cokʼate Manwa Hoponem soprotede kana?”
Bạirikoakʼ tire Probhu Jisu
(Mathae 26.47-56; Mark 14.43-50; Johan 18.3-11)
49Ado Jisu beṛhaete okoeko tahẽkan onko do cetʼ hoyokʼ lạgidokʼkana menteko bujhạukeda. Onate onko do Jisuko metadea, “E Probhu Isor, ale do cetʼ tarwaṛele calaoa?”
50Ar celako modren mitʼ hoṛ do tarwaṛete maraṅ naekeren gutiyakʼ jojom luture hese ńurketʼtaea. 51Jisui menkeda, “Inạkʼ kakʼme, ar baṅa.” Ar noa menkate uni hoṛakʼ luture joṭetʼketʼteye bogekedea.
52Ado acʼ upạrte hecʼakan maraṅ naekeko, mundilren kạmiyạko ar murubbikoe metatʼkoa, “Iń do cetʼ ḍạku kạnạń, onate tarwaṛe ar ṭheṅgawante iń ṭhenpe hecʼakana? 53#Luk 19.47; 21.37 Iń do mundilre dinke din ape samaṅreń tahẽkana, menkhan unre ma bacope sapʼlediń. Menkhan ńitokʼ do apeakʼ okte kangea; ar ńut reakʼ ektiạri hõ ńelokʼkana.”
Patras Jisui baṅe kan
(Mathae 26.59-75; Mark 14.54,66-72; Johan 18.15-18,25-27)
54Unre onko do Jisu sapʼkate maraṅ naekeakʼ oṛakʼteko idikedea. Ar Patras do pharak pharakre tahẽkate uniye pańja idikedea. 55Ar bakher raca talare okoe do seṅgel jolkateko jorogokʼkan tahẽkan onko ṭhen hecʼkateye duṛupʼ panteyena. 56Unre mitʼṭen kạ̃ṛmĩ do seṅgel reakʼ marsalte Patrase ńel ńamkede khan beṅgetʼ uricʼadeteye menkeda, “Nũi hoṛ hõ uni sãoteye tahẽkana.”
57Menkhan Patras do baṅketʼteye menkeda, “Uni do bạń oromakadea.”
58Thoṛa ghạṛicʼ tayom ar mitʼṭen hoṛ hõ uni ńelteye menkeda, “Am hõ onko modren mitʼ hoṛ kanam.”
Patrase menkeda, “Baṅ, iń doń baṅkana.”
59Ado mitʼ ghonṭa tayom ar mitʼ hoṛ jorkateye menkeda, “Nui hoṛ do khạṭige uni sãoteye tahẽkana, ente nũi hõe Gạlilren kana”
60Patrase menkeda, “Am okam roṛetʼkan ona do bạń bujhạueda.”
Patrasakʼ katha ạuri mucạdokʼrege sim sạnḍi doe rakʼgotʼkeda. 61Unre Probhu do ạcurente Patrase beṅgetʼadea. Onate Patras do one Probhui metade tahẽkan kathae disạgotʼkeda, “Teheń sim sạnḍi ạuriye ragre pe dhaoem baṅeńa.” 62Unre Patras do bahrete senkate hũk hũke rakʼkeda.
Jisu do siṛog are dal ocokʼkan
(Mathae 26.67,68; Mark 14.65)
63Ado okoeko Jisuko horhoyede tahẽkan onko do uniko siṛogadea arko dalkedea. 64Ar mẽtʼko betʼketʼtaete uniko metadea, “Mase lạime, okoeye dalketʼmea? 65Nonkate onko do arhõ ạḍi utạr kathakote uniko henostawadea.
Jisu do maraṅ bạisi samaṅre
(Mathae 26.59-66; Mark 14.55-64; Johan 18.19-24)
66Ado setakʼen khan Jihudikoren murubbiko, maraṅ naekeko ar sostor baḍaekoko jarwa mitʼena ar maraṅ bạisi samaṅre Jisu ạgukedeteko metadea, 67-68“Mạsi kan khanem, enḍekhan lạiyaleme.”
Jisui menkeda, “Ińiń menlere hõ ape do bape pạtiạukʼa ar apeń kuli lepere hõ bape roṛ ruạṛạńạ. 69Menkhan Manwa Hopon do ńit khon sanam daṛeanicʼ Isorakʼ jojomsa aṛere duṛupʼ akane tahena.”
70Unre sanamkoko kulikedea, “Enḍekhan am do cetʼ Isorren Hopon kanam?”
Uniye metatʼkoa, “Ape do ṭhikgepe meneda, iń doń uni kangea.”
71Unre mukhiyạkoko menkeda, “Goha reakʼ do ar cetʼ jạruṛabona? Abo sanamkoge coṅ uniyakʼ moca khon bon ańjomketʼ.”
Currently Selected:
Luk 22: SBT
Highlight
Share
Copy
Want to have your highlights saved across all your devices? Sign up or sign in
Santali Bible © Bangladesh Bible Society, 2021.
