Yoa 11

Yésus a wômôlô Lazar

1Môt éziñ a mbe a konôk, e Lazar ya Bétani, e jal Marie baa monyañe wé Martha. 2Marie ate a mbe minga a nga wo'o Nti mbone menyum a fimine nye mebo a ésile ya nlô wé, ndôme minga ate, Lazar, e nje é mbe é konôk. 3Ane bekale be nga lôme nye mbañete na: A Nti, yeme na nyômvôé a kon. 4Awô'ô Yésus a nga wô'ô nalé, nye na: Okon ôte ô nji bo ôkon awu, ô ne asu Duma Zambe, ane Mone Zambe a ye nyoñe duma été. 5Yésus a mbe a nyeke'e Martha baa monyañ a Lazar. 6Eyoñe ñhe Yésus a maneya wô'ô na a kon, e nde a nga beta tabe vôm ate tañe melu mebaé, 7e mvuse valé ane a nga jô beyé'é bé na: E nkelan, bi bulan e Yudé. 8Beyé'é ki be nga jô nye na: A Rabbi, ke beyude be ndôme jeñ ana'ana na ba lume wo *mekok, éyoñe te wo téé na wo beta ke wôé' 9Ane Yésus a nga yalane na: Ye *mewolo me nji bo awôm a mebaé e ngumba *môs? Nge môt a wulu a *môs, a ye bo te kolé ôbak, amu a wulu a yene éfufub ya *si nyô. 10Nge môt a wulu a alu, a kolé ôbak, amu éfufub é nji bo be nye. 11Eyoñ a maneya kobô mejô mete, mvus éte nje a zu jô be na: Mvôé jam Lazar, a ne ôyo; ma ke vele nye ôyo. 12Ane beyé'é be nga jô nye na: A Nti, nge a ne ôyo, ke a ye ñhe nyiñ. 13Yésus nye a mbe a jô'ô na a wuya, be ke be buni'i na a kobô ajô zezé nya ôyoo. 14Eyoñe te ñhe Yésus a zu kate be ne ngeññ na: Lazar a wuya, 15ve ma yene de mvaé asu denan na mi buni'i, amu me nji ke tabe wôé. Nkelane ñhe vôm a né. 16Ane Thomas nye ba loone Didime a nga jô beébe beyé'é na: Bia fe nkelan, bia be nye bi ke wu.

Yésus Nwômôlô bôt a ényiñ

17Ake ñhe Yésus a nga ke kui, a kooé na a mbôô soñ melu menyin. 18Bétani baa Yérusalém be mbe fo'o zañ bebé tañe kiliméta éla. 19Beyude abui be nga ke fe tabe Martha baa Marie ébeñese na be volô be minlem ajô awu ndôme jap. 20Eyoñe Martha a wô'ôya na Yésus a zu, e nde a nga ke tôbane nye. Marie ki a li'i a to si e *nda. 21E nde ñhe Martha a nga jô Yésus na: A Nti, nge ô to tabe va, ve nge ndôme jam é nji ke wu. 22Ve, éyoñ ébiene ji, ma yeme fe na e jôm ése ô ne sili Zambe, Zambe a ye ve wo je. 23Ane Yésus a nga jô na: Nyo ndôm a ye wômô. 24E nde Martha a nga jô nye na: Ma yeme fo'o na a ye wômô éyoñe ñwômane ya môse wo su'ulan. 25Ane Yésus a nga jô nye na: Ma me ne ñwômôlô, me to fe ényiñ. E môt a buni ma, ja'ane a wu, a ye nyiñ, 26a môt ase a nyiñ a buni'i ma, a se ngule ya wu nnôm éto. Ye wo buni jame te' 27E nde a nga jô Yésus na: Owé, a Nti, me buniya ayab na wo ô ne Krist Mone Zambe, e nye a zuya e si ndône mu.

Yésus a yi

28Aman a nga mane kobô nalé, e nde a nga ke loone Marie monyañ wé a la'a nye ôfôfoé na: Nye'ele a ntoo va, a loone wo. 29Eyoñe nye ki a wô'ôya nalé, ane a nga kôlô si ne vup, a ke mfa'a a mbe. 30Valé Yésus a ngenane teke kui e nlam, a ngenane ve vôme Martha a nga ke tôbane nye. 31E Beyude baa be Marie be nga too e *nda été valé na ba ve nye ayôñe nyô, ayene be nga yen ane a kôlô si avôl avô a kui atan, be nga ke ba tôñe nye, be si'ako na a ke soñ na a ke yôn. 32Eyoñe Marie a nga kui e vôme Yésus a mbe, ayen a nga yene nye, ane a nga bibane si e mebo mé été a jô'ô nye na: A Nti, nge ô nga ye tabe va, ve ndôme jam é nji ke ye wu. 33Eyoñe Yésus a yeneya ane a yôn, Beyude baa be nye be nga zu nsamba be fe be yônôk, ane *nlem ô nga tôlé nye abum, a nga fô'ôban 34a jô na: Mi nga jame nye vé? E nde ba jô nye na: A Nti, za'a yen. 35Ane Yésus a nga yi. 36Beyude be nga ke ba jô na: Mi lôô abim avé a mbe a nyeke'e nye! 37Bôte bevo'o ya été ki ba ke ba kobô na: E ne môt a nga bo ndindime na mise me yombô nye, a nga kate bo aya na môte nyô a bo te wu'

Lazar a bulan ényiñ

38E nde *nlem ô nga beta tôlé Yésus, ane a nga téé a ke e soñ. Soñ éte é mbe mbas akôm, akok e butu été yôp. 39Ane Yésus a nga jô na: Feneka'an akok! Ane Martha, kale môt a nga wu a zu jô nye na: A Nti, ke a nga nyum, amu k'a wu den melu menyin. 40Ane Yésus a nga jô nye na: Ye me nji kate wo na nge wo buni wo ye yene duma Zambe' 41E nde ñhe be nga vaa akok. Ane Yésus a nga bete mise yôb a jô na: A Tat, ma ve wo akéva, amu ô wô'ôya ma. 42Me ma zu ma yeme na wo wô'ô ma kom ése, ma te kobô kobô ve asu ba bôtô a tele me mbôma'ane nyôl na be buni fo'o na wo fo'o ô nga lôme ma. 43Eyoñ a maneya kobô mame ma, ane a nga yôtane tyiñe yôb ngu a jô na: A Lazar, kui atan! 44Ane môt a nga wu a nga kui atan, mo a mebo nka'an a bibab biyé, ndombo é to nye ñyalan asu. E nde Yésus a nga jô be na: Ti'ane nye biôme nyôl, mi jô'é fe nye a ke.

Emo'o ya wôé Yésus

(Mt 26:1-5; Mk 14:1-2; Lk 22:1-2)

45Abui ba Beyude be nga zu be Marie, éyoñe be yeneya mame Yésus a nga bo, be nga buni nye. 46Ane bevo'o ya été be nga ke yene Befarizieñ a mane kañete be mame Yésus a nga bo. 47E nde Minlô Betuni baa Befarizieñ be nga bañete Ekôane Bôbenen a jô na: Bia ye bo aya, e môte nyô a bo'ok abim abui bitua bi mame di' 48Nge bia jô'é nye nalé, bôte bese ba ye buni nye, éyoñe te bôte ya Rôm ba ye so, be mane wôlé afôla si dangan a ayoñe bôte dangan. 49Ane môte wua ya be be, Kayifa, Nlô Betuni ya mbu ôte, a nga jô be na: Mi nji fo'o yeme jam éziñ. 50Ye miaa simesane ke na, e ne mia mfi nge môte wua wua nye a wu asu babôtô, a lôte na ngum ayoñe bôt ôse ô jañ' 51A nji kobô jame te e so'o be émien, ve amu e nye a mbe Nlô Betuni ya mbu ôte, e nde a nga kobô a kulu mejô na Yésus a ye wu asu ayoñe bôt, 52sake ve awu ya asu ayoñe bôt étam, a ye fe bo na, e bone be Zambe be nga mane tyamelan, a tôkane be a bo be jôme jia. 53Ataté *môs ôte, bôte bete be nga bu ñhe fe'e ya wôé nye. 54Yésus a nto teke fe beta wulu éngengeñ, e Beyude été, e nde ñhe a nga kôlô valé, a ke e jal e mbe afane bebé, e tison ba loone na Efrayim, a ntoo wé, baa beyé'é bé. 55Valé Pak Beyude a nto bebé, ane bôte abui be nga téé dulu be so'o mefôla ya si éte ôsusua Pak, a bet a ke e Yérusalém na ba ke fubu bebien. 56E bôte be mbe e Nda Zambe été be nga jeñe ñhe Yésus e mis, ba ke ba kobô e zañe jab na: Mia simesan aya? Ye a ye fo'o zu abôk ye momo' 57Bivet betuni a Befarizieñ ki be nga mane ve abendé na nge môt éziñ *a yem e vôm a né, a kula'ane de, be bi nye.

Currently Selected:

Yoa 11: BDCB

Highlight

Copy