Yoa 10
10
Nkana mba'ale mintômba
(Besam 23; 1Pi 2:24-25; 5:1-4)
1Bebela, bebela émien fo'o, ma jô mia na e môt a nji dañ e *mbé a nyiin abemba mintômba été, ve viane ke dañ afôla afe, môt ate a ne ñwuwub a ze mimfaka. 2Ve nyô ki a ke dañ e *mbé, e nye a ne mba'ale mintômba. 3Môt a nonô *mbé a diine nye wô, a mintômba mia yeme *tyiñ jé, a loone fe mintômba mié biyôlé biab a kulu mie atan. 4Eyoñ a maneya kulu mintômba mié mise e nseñ, a téé ñhe dulu a ke tebe ôsu, mintômba mi nga tôñe nye, amu mia yeme nye *tyiñ. 5Ve nneñe ki, mintômba mi se ngul ya ye'e tôñe nye, mia ye viane tube nye a ke ôyab, amu mi nji yeme *tyiñ beyeñ. 6Nkana te ñwô Yésus a nga ku be, ve bôte bete be teke yeme wôk e mam a nga kobô be. 7E nde Yésus a nga beta jô na: Bebela, bebela fo'o, ma kate mia na ma me ne *mbé mintômba. 8E bôte bese be nga zu me ôsu be ne miñwuwub a beze mimfaka, ajô te mintômba mi nga bo te vô'ôlô be. 9Ma me ne *mbé, nge môt éziñ a nyiin e be ma a ye bi ényiñ, a ye nyiin a kui fe nseñ, a yene fe bidi ya di. 10Môt a wub nye a zu fo'o ve na a wup, a wôé a ndaman; mfa'a wome ki me nga so na bôte be bi ényiñ, be bi je abui abui. 11Ma me ne mbamba mba'ale. Mbamba mba'ale a ju ényiñe jé amu mintômba. 12Ve nsaé moné ki, mbôl a nji bo nya mba'ale, amu mintômba mi nji bo émié, ane a yene ze é za'ak, a li'i mintômba, a tubi, ze ki é nga bi mintômba a tyamelane mi mivok. 13Amu môt ate a ne ve nsaé moné, a ne teke bisi ajô ya mvamane mintômba. 14Ma me ne mbamba mba'ale, a ma yeme mintômba miam, mintômba miame fe mia yeme ma, 15aval Esaa wom a yeme ma, ma fe ma yeme Esaa wom, e nde ma ve ényiñe jam asu mintômba. 16Me bili fe mintômba mife, mi nji bo abemba dina été. Ma yiane fe ke ma nyeñele mie, mia ye wô'ô tyiñe jam, éyoñe te mia ye bo mbame wua, mba'ale fe ve wua.
17Ajô te Esaa wom *a nye'e ma, amu ma ve ényiñe jam e nde ma ye beta bulane nyoñe je. 18Môt éziñ a nji wôlé me je, ve mamiene ma vañe ve je, amu me bili ngule ya ve je, me bili fe ngule ya beta bulane nyoñe je. Atiñ me nga nyoñ e be Esaa wom e nde le. 19E nde metyiñe metyiñ me nga beta bo e zañe Beyude amu mejô mete. 20Abui avok e nga ke da jô na: A bili mbia *nsisim, e nde fe a nga so'akut, amu jé mia vô'ôlô nye' 21E bôte bevo'o ki be jô'ô na: Mejô ma me nji bo mejô me môt a bili mbia nsisim; ye mbia *nsisim a ne ngule ya bo na mise mindindim me yombô'
Beyude ba bene Yésus
22Eyoñ abô'ô fubu Nda Zambe e nga kpwaan e Yérusalém, a ôyôn, 23Yésus a nga ke ñhe a lôtan e Nda Zambe été, e beta éyas ya *mbé si Solômon. 24E nde Beyude be nga bômane nye élunga e nyôl a jô nye na: Wo ye tyelé bia minleme yôb akui nté *mbé? Nge wo ô ne Krist, kate bia de ne ngeññ. 25Ane Yésus a nga yalane be na: Ke me kateya mia, mi teke buni; ve jame da mimboone ma bo a jôé Esaa wom, mimboone mite mia tyi'i mva'a ya be ma. 26Ve mfa'a wônan, mi nji buni, amu mi nji bo mintômba ya be ma. 27Mintômba miam mia wô'ô tyiñe jam, ma yeme mie a mia zu mia tôñe ma, 28e nde fe ma ve mie ényiñe ya melu mese, teke mi ye'e jañ ajañ ajañ, a teke môt éziñ a ne vaa mie e mo mam a ngu. 29Esaa wom Nyô a nga ve ma mie a dañe bôte bese, a teke môt éziñ a ne ngul ya wôlé mie e mo m'Esaa wom. 30A mamien a Esaa wome ki bi ne jôme jijia. 31Ane Beyude be nga beta to'é *mekok na ba lume nye. 32E nde Yésus a nga jô be na: Abui abeñe mame ya be Esaa wom me litiya mia, jam avé ya été e nde mia lume me dee *mekok' 33Ane Beyude be nga yalane nye na: Bi nji kômbô lume wo *mekok amu mbamba jam, ve amu wo ta Zambe, amu na wô zezé môt, wo viane bo womien ane Zambe. 34E nde Yésus a nga yalane be na: Ye e nji bo ntilan e Kalate Metiñe wonane na: Ma me nga jô na mi ne bezambe' 35Nge bôte Zambe a nga kobô be, émien a loone be na bezambe, ntilane ki ô se ngule ya bo momo, 36ve môte Esaa ki a nga fubu, a lôme fe nye e si ndôn, e nye mia jô na a ta Zambe, amu na ma jô na: Me ne mone Zambe' 37Nge me nji bo e mame m'Esaa wom, te bunane ma. 38Ve nge ma bo me, ja'ane mi ne te buni ma, buna'ane mimboon mite, nde mia ye yem a buni na Tate a ne be ma, a me ki me ne be Tate. 39Nde be nga beta jeñe na be bi nye, ane a nga sendé be e mo été valé. 40Ane a nga beta dañ e kindi'i Yordan yat, e vôme Yôanes a nga taté bo a du bôt, a ntoo ñhe wé. 41E nde bôt abui be nga ke be nye be jô'ô na, Yôanes a nji fo'o bo étua jam éziñ, ve mame mese a nga jô, ajô môte nyôl, me mbe bebela. 42Ane bôt abui be nga buni nye vôm ate.
Currently Selected:
Yoa 10: BDCB
Highlight
Share
Copy
Want to have your highlights saved across all your devices? Sign up or sign in
Bible en langue Bulu © L'Alliance Biblique du Cameroun, 2007, 2015.
