Yoa 9
9
Yésus a bo môt a nga bialé ndim mvo'é
(Mk 8:22-25; 10:46-52)
1Valé Yésus a lôtôk, ane a nga yene môt a nga bialé ndindim. 2E nde beyé'é bé be nga sili nye na: A Rabbi, ye môte nyô, ye bebiaé bé, za nye a nga sem, nde a nga bialé de ndim' 3Ane Yésus a nga yalane na: To'o môte nyô, to'o ke bebiaé bé, môt éziñ a nji sem, e ne fo'o ve amu na mimboone mi Zambe mi yené e be nye. 4Bi bili na bi bo'o bisaé bi môt a nga lôme ma e nté *môs ô ngenan. Alu da zu, éyoñe môt éziñ a se fe ngule ya bo ésaé. 5Eyoñe me nee si ndône mu, me ne éfufub ya si ndôn. 6Akobô a nga kobô nalé, a tui mendene si, a nga fu'u étek a menden, a wo'o nye ndobo'o te e mis, 7a jô nye na: Kele woban étame ya Silôé (nalé a tinane na: Nlôman). E nde ñhe a nga téé, a mane ke woban, a nga bulan a yenek *mvo'é. 8E bôte baa be nye be nga too vôme wua, a ba be mbe be yene nye ôsusua a too nzezak, be nga ke ñhe ba jô na: Ye sa môte nyô e nye a mbe a too ve si a jaké'é bôte biôm' 9Bôte bevo'o be nga jô na: Emiene le, e ba bevo'o ke na teke jôm, baa nye ba funa funan. E môte nyuna ki a jô'ô na: Mamiene fo'o nyô. 10Ane be nga jô nye na: E mise môé ma te kuiban aya' 11E nde a nga yalane na: E môte ba loone na Yésus a nga fu'u étek, a wo'o me je mis a jô me na, Kele Silôé, ô wobaan. Ake me nga ke, me mane woban, ane me nga yen. 12Ane be nga jô nye na: Môte ate émien a ne vé? Nye na: Me nji yem.
Befarizieñ ba fas ajô *mvo'é ndindim
13E nde be nga kee môt a mbe ndime nyuna e be Befarizieñ. 14E môse Yésus a nga fu'u éte'e wu a kui nye mis, ô mbe môse Sabat. 15Ane Befarizieñ be fe be nga sili nye na mis mé me nga kôme bo *mvo'é aya? E nde nye k'a nga jô be na: A nga wo'o ma éte'e mis, me mane woban, ayene te ma yene di. 16Ane Befarizieñ bevo'o b'éziñ be nga jô na: Môt ate a nji so be Zambe, amu a nji ba'ale atiñe Sabat! E ba bevo'o na: E môt a ne nseme minsem a ne bo bitua bi mam ana aya? Ane nkandan ô nga bo e zañe jap. 17E nde be nga beta jô ndindime na: Wô wo jô ajô dé aya, amu na e nye a te kui wo mis? Ane nye k'a nga jô na: K'a ne *nkulu mejô! 18Ve da Beyude be teke yebe ajô dé na a mbe ndim, e nde a nga yen, akekui be nga bañete bebiaé be môte mise me nga yombô. 19E nde be nga sili be na: Ye môte nyô e nye a ne mone wônan mia jô na a nga bialé ndim? A yen éyoñe ji aya' 20E nde bebiaé bé be nga nyoñe nkobô a jô na: Bia yeme na e môte nyô a ne mbiane mone wongan, a na a nga bialé ndim. 21Aval avé a nga yen éyoñe ji, bi nji yem, a za émien ki a nga yooé nye mis, bi teke yem. Sila'ane émien, a nto môt, émien a ye kañete ajô dé. 22Bebiaé be môt ate be nga jô mame ma, be koo Beyude woñ, amu éyoñe te Beyude be maneya kui tyiñe na nge ba ye wô'ô môt éziñ a meme na Yésus a ne Krist, ba ye titane nye *aba Zambe. 23Ajô te nde ñhe bebiaé be nga viane kobô na: Emien a nto môt, sila'ane nye minsili.
24E nde ñhe, éyoñe baa, be nga beta loone môt a mbe ndim a jô nye na: Va'a Zambe duma; ve mfa'a wongan, bia yeme na môt ate a ne nseme minsem. 25Ane ndindim ô nga yalane na: Nge a ne nseme minsem, me maa yem kik; e jam dada ma yem e ne ve na me mbe ndim, ve éyoñe ji ma yen. 26E nde be nga beta jô nye na: A nga bo wo jé? A nga yooé wo mis aya' 27Ane a nga yalane be na: Me maneya kañete mia ajô di, ve mi teke yebe; jé éfe e nje mia kômbô beta wôk? Ye na mia fe mi nga kômbô bo beyé'é bé, nga' 28Ane be nga kpwe'ele nye be jô'ô na: Nge w'ô ne ñye'é wé, bi bi ne beyé'é be Môze. 29Mfa'a wongan, bia yeme na Môze nye Zambe a nga kobô nye, ve nyuna ki bi nji yeme mfa'a a so. 30E nde môt ate a nga nyoñe nkobô a jô be na: E jame ma semé e ne na mi mi nji fo'o yem e mfa'a a so, ve nye a te yooé me mis. 31Bia tu'a fe yeme na Zambe a ne te wô'ô bebo mam *abé, ve nge môt a ko Zambe woñ a bo'o fe nkômbane wé, Zambe a wô'ô nye. 32Bi ngenane teke tame wô'ô foé na, môt éziñ a nga yooé e môt a nga bialé ndindime mis. 33Nge e nga ye bo na môt ate a nji so be Zambe, a nji ke ye bo jam éziñe nalé. 34Ane be ke be nga nyoñe nkobô a jô nye na: E wo ô nga bialé e minsem été ngumba ngumba, wo zu ye'ele bia jé? E nde be nga titane nye, be kulu nye nseñ.
Ndim ya Nsisim
(2Ko 4:3-6; 1Pi 2:6-8)
35Yésus a nga mane wô'ô na be kuluya nye atan. Eyoñ a nga tôbane nye, ane a nga jô nye na: Ye wo buni fo'o Mone Môt' 36Ane nye k'a nga yalane na: A ne za a Nti, ane me ne buni nye' 37E nde Yésus a nga jô nye na: Ke ô maneya yene yen nye, amu e nye ate a laane wo nyô. 38Ane a nga jô na: Ma buni, a Nti: e nde a nga kute meboñ si a kañe nye. 39Eyoñe te Yésus a zu jô na: Me nga zu tyi'i ajô ya si ndône nyô, a ntoo na e bôte be nji yen, be nga yen, a ba ba yene ki be nga viane ku ndim. 40Awô'ô Befarizieñ baa be nye be nga too be wô'ôya mame ma, ane be nga jô nye na: ye na bia fe bi ne mindindime nga' 41Nde Yésus a nga jô be na: Nge mi too bo mindindim, ve mi nji bi nsem. Ve éyoñ ji mia jô na, bia yen, nsem wônan ô tootoo.
Currently Selected:
Yoa 9: BDCB
Highlight
Share
Copy
Want to have your highlights saved across all your devices? Sign up or sign in
Bible en langue Bulu © L'Alliance Biblique du Cameroun, 2007, 2015.
