Luka 1
1
Mazu akubalikila
(Milimo 1:1)
1Kuli wakuhakiwa Tiyofwilashi,
Bantu babengi banatende mulimo wakutikita ebye binatendiwi hakatiketu. 2Batikitile ngonehe batutongwezele bayo bamonene byuma ebye na meho, kufuma ku kutatika kami bengile bakakushimikila lizu. 3Nohobene, obe wakukangana Tiyofwilashi, ndaba ami nashingishishi shikuma byuma nimwabyo kufuma ku kutatika, nahanganiki ngayi shuma shashiwahe kukwami kami kukutikitila byuma ebye mu muhoko wabyo. 4Natende ebye ngayi ulimuke kupwisha kwa byuma ebye banakulongeshe.
Lingeloyi likulubulula kuhemuwa kwa Yowano Mukakuzubilisha
5 # 1 Bya 24:10. Ha shikati sha Helonda oho engile mwene wa Yundeya, kwekalile mukankombela lizina lyendi Zekaliya, wa kanzunga ka bakankombela ba Abiya. Mukazendi Elizabeta* wengile wa bana ba Aloni. 6Nibo babili bengile bakwoloka ku meho a Nyambi, bombatalile ndayano na mazu a Nyambi nimwawo. 7Ngoboni babulile mwana ndaba Elizabeta wengile mumba, kami nimwabo bakulumpalile.
8Oho baka kanzunga ka Zekaliya bekalile ha mulimo, naniye watendelenga mulimo wa mukankombela kuli Nyambi. 9Ngonehe shiheka sha mulimo wa bakankombela, Zekaliya wahatiwile na kukuna nyela kwingina mu Litala lya Nyambi mukuhokesha incence. 10Oho shikati shakumine shakuhokesha incence, likunge lya bantu bekalile hamunkanda hibalombela.
11Niho lingeloyi lya Mwene lyaholokele kuli Zekaliya hinga lyemana ku shilyo sha shihanda sha incence. 12Oho Zekaliya alimonene wabazumukile, pe wekalile na bowa. 13Ngoboni lingeloyi lyambile kukwendi ngayi, “Hinga utina Zekaliya! Nyambi nayuvwu malombelo wobe. Mukazobe Elizabeta ukakubelekela mwana wa mulume, ukamutumba ngayi Yowano. 14Mukawahilila nakutangala, bantu babengi bakawahilila ha kuhemuwa kwendi! 15#Kul 6:3. Ukenga wamulemu ku meho a Mwene. Kukanwa waine hinge shuma nimwasho sha shikali wufwako. Ukenzala na Moyo Wakuyela kufuma ha kuhemuwa kwendi. 16Ukabwesha bantu babengi ba Ishalela kuli Nyambi yabo. 17#Mala 4:5-6. Niye ukaya kumbili ya Mwene mu moyo na mu ngovu za Eliya. Ukawanika bahemi na bana babo, ukatengulula baka mashewinizi ku ngana zakwoloka. Ukabalakanya bantu ngayi batatilile Mwene.”
18Zekaliya wambile kuli lingeloyi ngayi, “Nikalimuka nahiti ngayi eshe shinengi shakupwisha? Ndaba ami nili kakulukazi na mukazami wakulumpalakale.”
19 # Ndan 8:16, 9:21. Lingeloyi lyakumbwile ngayi, “Ami Ngambuliyele, nikwimana ku meho a Nyambi, kami natumiwi kwiza nakwamba kukwobe na kukutongweza eze ncango zaziwahe. 20Ndaba unabulu kukulupila mazu ami awa akatendiwa ha shikati shawo, ukenga shimumu nakubula kwamba kutwala ku mutena uya byuma bikatendiwa.”
21Shikati bene shiyo bantu batatilile Zekaliya kami bakomokele ndaba wehalile shikuma mu Litala lya Nyambi. 22Oho atutikile, kaliha watweshele kwamba nabo, pe balimukile ngayi unamono shimono mu Litala lya Nyambi. Wakwangile kwamba niho abalabizile na maboko.
23Oho shikati shendi sha mulimo shamanine, wabokele ku litala lyendi. 24Munyima ya shikati shiyo mukazendi Elizabeta wemitile, pe waliholekele zingonda mutanu. 25Wambile ngayi, “Mwene nantendele ebye ha shikati shino nanyuvwili nceshe namfumishi lisheni ku bantu.”
Lingeloyi likutongweza Maliya bya kuhemuwa kwa Yeshu
26Oho Elizabeta emitile zingonda mutanu na imo, Nyambi watumine lingeloyi Ngambuliyele kuya ku munzi wa mu Ngalileya ukutumbiwa Nazaleta, 27#Mat 1:18. ku kankanga wakubula kulimona na mulume abalikilile ku mulume lizina lyendi Yoshefwa wa lihumo lya Ndavita. Lizina lya uya kankanga Maliya. 28Lingeloyi lyezile kukwendi niho lyambile ngayi, “Shangwe, obe wakuyamiziziwa shikuma! Mwene uli hamo nanobe!”
29Maliya watinine shikuma na mazu a lingeloyi, niho akomokele ngayi oku kushangwisha kwa nahiti. 30Ngoboni Lingeloyi lyambile kukwendi ngayi, “Hinga utina obe Maliya, ndaba Nyambi unakuyamizizi. 31#Mat 1:21. Mona, ukemita, kami ukabeleka mwana wa mulume, ukamutumba lizina ngayi Yeshu. 32#2 Sham 7:12, 13, 16; Isha 9:7. Ukenga wamunene, ukatumbiwa ngayi Mwana Nyambi Wakukangana. Mwene Nyambi ukamupana litanda lya tatiyendi Ndavita, 33ukenga Mwene ha litala lya Yakobo mwayile myaka. Wene wendi kukamana wufwako.”
34Niho Maliya wakumbwile lingeloyi ngayi, “Shuma eshe shikenga sha nahiti, ndaba ami nili kankanga wakubula kulimona na mulume?”
35Lingeloyi lyamutongwezele ngayi, “Moyo Wakuyela ukashulumukila hahobe, na ngovu za Nyambi Wakukangana zikakufwika. Nohobene mwana wakuyela ukahemuwa kukwobe, ukatumbiwa ngayi Mwana Nyambi. 36Mona, kawushinda wobe Elizabeta, ou wengile mumba, naniye kami nemiti mu wukulukazi, yino ngonda niyo ya wumutanu na yimo. 37#Shit 18:14. Ndaba kuli Nyambi kowa shuma shikukwangana.”
38Maliya wambile ngayi, “Ami nili mukamulimo wa Mwene, shitendiwe kukwami ngonehe unamba.” Niho lingeloyi lyamushiyile.”
Maliya ukuzingula Elizabeta
39Ha shikati shiyo Maliya wakatukile wayile na kunyankupa ku litunga lya binkanda ku munzi wa Yundeya. 40Wenginine mu litala lya Zekaliya, washangwishile Elizabeta. 41Oho Elizabeta ayuvwile kushangwisha kwa Maliya, mwana wanyenkanine mu livumo lyendi. Elizabeta enzalile na Moyo Wakuyela, 42pe wakatwile ku lizu wambile ngayi, “Uli wakutandala mukati ka bambuyama na mwana ukabeleka wakutandala! 43Kati ninayamiziziwi nahiti, ngayi manda Mwene yami azingule? 44Ndaba oho nayuvwu kushangwisha kwobe, mwana unanyenkana mu livumo lyami na kuwahilila. 45Unatandala obe ukukulupila ngayi ebye anamba Nyambi kukwobe bikatendiwa!”
Lwimbo lwa Maliya lwa kuyemeza
46Maliya wambile ngayi,
“Mutima wami ukulemesha Nyambi,
47kami moyo wami ukuwahilila muli
Nyambi Mupulwishi wami,
48Ndaba unatilamini kushepwa
kwa mukamulimo wendi!
Kumbili bihemunwino nimwabyo bakantumba ngayi
nili wakutandala,
49ndaba Nyambi wa ngovu,
unatende kukwami byuma byabinene,
lizina lyendi lyenga lyakuyela,
50ukumonesha nceshe zendi ku baya
bakumuyuvwila bowa,
kufuma ku mukoka umo kutwala ku mukoka wamina.
51Unamoneshe ngovu na liboko lyendi,
unapanzanishi bakakuliyemeza
baya bakulilundumika mu mitima yabo.
52 # Yob 5:11, 12:19. Unafumishi bamyene ba ngovu ha matanda abo,
unakatulu bakakulilimbwilisha.
53Unekutishi baka nzala na byuma byabiwahe,
unabweshe bakakuheta mabokoboko.
54Unayavwa mukamulimo wendi Ishalela,
unalama shikulupisho atendele na bankaka zetu.
55Unanuku kumonesha nceshe kuli Abulahama
na ku mukoka wendi mwayile myaka.”
56Maliya wekalile na Elizabeta zingonda zihatu, niho abokele ku litala lyendi.
Kuhemuwa kwa Yowano Mukakuzubilisha
57Shikati sha Elizabeta sha kubeleka shakumine, pe wabelekele mwana wa mulume. 58Oho bandambo bendi na bawushinda wendi bayuvwile ngayi Mwene namuyuvwili nceshe zazinene, bawahililile nendi.
59Ha mutena wa wumutanu na ahatu batwalile mwana ku mukanda. Bashingile kumutumba lizina lya Zekaliya tatiyendi. 60Ngoboni mandiyendi wambile ngayi, “Byo! Ukatumbiwa Yowano.”
61Bambile kukwendi ngayi, “Ngoboni kowa kawushinda wobe watumbiwile na lizina elye!” 62Balabizile tatiyendi ngayi abatongweze lizina akushinga kutumba mwanendi.
63Zekaliya wanyepele litapa hakutikita niho atikitile ngayi “Lizina lyendi niye Yowano.” Nimwabo bakomokele shikuma! 64Wanguwangu kanwa kendi kashinkulukile na lulimi lwendi lwamangulukile, watweshele kwamba kami na kulemesha Nyambi. 65Bandambo nimwabo bekalile na bowa. Ebye byatendiwile nimwabyo byashimikiwile mu litunga lya binkanda lya Yundeya nimwamo. 66Nimwabo aba bayuvwileko, bahanganikile mu mitima yabo, niho bambile ngayi, “Kati ou kanuke ukenga wa nahiti?” Ndaba liboko lya Mwene lyekalile hahendi.
Kulubulula kwa Zekaliya
67Zekaliya tatiyendi Yowano wenzalile na Moyo Wakuyela, pe walubulwile ngayi,
68“Kuyemeziwe Mwene, Nyambi wa Ishalela!
Ndaba nazingulu kami nalamwini bantu bendi.
69Unatupaniki Mulamwini wa ngovu,
wa liziko lya mukamulimo wendi Ndavita.
70Nehi ambilile mu bamiluwe bendi
bakuyela ba kushikale,
71ngayi ukatulamwina ku bamalamo betu,
na ku maboko a baya batuzimba.
72Ukamonesha nceshe ku batatizetu,
na kwanuka kulimama kwendi kwakuyela.
73Luhaho olwe ahahile kuli tatiyetu Abulahama.
74Ukatulamwina ku maboko a bamalamo betu,
kami ukatutweshesha kutenda mulimo wendi
kwakubula bowa,
75mwanga tukenge bakuyela na kwoloka kukwendi,
matena nimwawo akuyoya kwetu.
76Nobe kami mwanami,
ukatumbiwa ngayi muluwe wa Nyambi
Wakukangana. Ndaba ukaya kumbili ya
Mwene na kuwahisha nzila yendi,
77ukatongweza bantu bendi ngayi bakapuluka
ha kubayatila ku wubi wabo.
78Nyambi yetu wa nceshe zazinene,
ukatumunikila lumuni lwa kupulwisha kufuma kuyilu,
79ukamunika ha baya bali mu
mincimpwe na mu mumvulu wa lufu,
ukatwaminina mawulu wetu mu nzila ya kumwena.”
80Kanuke wakulile mu mwimo na mu moyo, wekalile mu libelelengwa kutwala ku mutena uyo aliholwele ku bantu ba Ishalela.
Currently Selected:
Luka 1: KK2008
Highlight
Share
Copy
Want to have your highlights saved across all your devices? Sign up or sign in
New Testament in Nkoya © The Bible Society of Zambia, 2008.
