Luka 2
2
Kuhemuwa kwa Yeshu
(Mateo 1:18-25)
1Mu matena ayo Nkeshali Ongashitashi* wapanine ndayano ngayi kulabiwe baka litunga lya Loma nimwabo. 2Oku kwengile kulaba kwa kutatika kwekalileko oho Kwiliniyashi engile kalela wa Shiliya. 3Niho muntu nimwendi wayile na kulitikitisha ku munzi wendi mwine mu kutela.
4Na Yoshefwa kami wafumine ku Ngalileya ku munzi wa Nazaleta, wayile ku Yundeya ku munzi wa Mwene Ndavita ukutumbiwa Mbetelehema, ndaba niye wengile wa liziko lya Ndavita. 5Wayile na kulitikitisha hamo na Maliya owu abalikilile kami wekalile na livumo. 6Oho bekalile ku Mbetelehema shikati shendi shakubeleka shakumine. 7Wabelekele mweli wendi wa mulume, wamuvungilile mu likwiza, wamuyakile mu linkuluba, ndaba kaliha bawanine mwanya mu litala lya bayeni.
Balishani na mangeloyi
8Mu litunga liyo mwekalile balishani balaminenga matanga abo mu mbuwa wushiku. 9Lingeloyi lya Mwene lyaholokele kukwabo, pe wuwahe wa Mwene wabamunikile. Niho batinine shikuma. 10Ngoboni lingeloyi lyambile kukwabo ngayi, “Hinga mutina! Ndaba nikuleta kukwenu ncango zaziwahe za kuwahilila kwakunene ku bantu nimwabo. 11Lelo mu lukena lwa Ndavita munahemuwu Mulamwini wenu, niye Kilishitu Mwene. 12Eshe nisho shikenga shilimukisho kukwenu, mukawana mbututu banamuvungilili mu likwiza hinga alangana mu linkuluba.”
13Wanguwangu litanga lya baka mayilu lyekalile hamo na lingeloyi, pe balemeshele Nyambi nakwamba ngayi,
14“Wuwahe kuli Nyambi muyilu ya mayilu,
na kumwena kwikale hano hanci ku bantu baya anawahilili!”
15Oho mangeloyi afumine kukwabo ayile muyilu, balishani bambile ku umo na wamina ngayi, “Tuyenunga ku Mbetelehema tukamone shuma eshe shinatendiwi, eshe anatutongweze Mwene.”
16Bayile na kunyankupa, pe bakawanine Maliya na Yoshefwa na mbututu hinga alangana mu linkuluba. 17Oho balishani bamumonene, batontwelele kukwabo nimwabyo biya abatongwezele lingeloyi bya mwana. 18Nimwabo obo bayuvwileko, bakomokele ebye babatongwezele balishani. 19Ngoboni Maliya walamine ebye nimwabyo, na kubihanganika mu mutima wendi. 20Balishani babokele, bayemezele na kulumbeza Nyambi ndaba ya byuma nimwabyo biya bayuvwile kami bamonene ngonehe abatongwezele lingeloyi.
Yeshu ukutwaliwa ku Litala lya Nyambi
21 # Bal 12:3; Luk 1:31. Ha mutena wa mutanu na yihatu, oho shengile shikati shakumutwala ku mukanda. Bamutumbile ngayi Yeshu, lizina lingeloyi amutumbile oho shilolo emitiwe.
22 # Bal 12:6-8. Oho shikati shakuyeleshiwa kwabo shakumine ngonehe mwayila Ndayano za Moshesha, Yoshefwa na Maliya na mwana bayile ku Yelushalema ngayi bakamutwale kuli Mwene, 23#Kut 13:2, 12. nehi kwatikitiwile mu mazu a Mwene ngayi, “Mweli wa mulume nimwendi ukuhemuwa ukafunguliwila kuli Mwene.” 24Kami bayile na kutupula nkombela ngonehe mwayile ndayano za Mwene ngayi, “Batupule matela abili, hinge bana ba bankilimba babili.”
25Ha shikati shiyo kwekalile mulume mu Yelushalema, lizina lyendi Shimiyoni, wengile wakwoloka na mukakutina Nyambi. Watatililenga kulamwina kwa Ishalela, kami Moyo Wakuyela wekalile hahendi. 26Moyo Wakuyela walubulwile kukwendi ngayi kukafwa wufwako hantu namono Kilishitu wa Mwene. 27Moyo wamutwaminine, pe Shimiyoni wezile ku Litala lya Nyambi. Oho bahemi bengizile mbututu Yeshu na kumutendela ngo shiheka sha ndayano, 28Shimiyoni washimbile Yeshu mu maboko wendi niho ayemezele Nyambi nakwamba ngayi,
29“Mwene, haya yitabila ngayi
mukamulimo wobe afunzuke mu kumwena,
ngonehe wakulupishile.
30Ndaba meho wami anamono kulamwina kwobe,
31oku unawahishi ku meho a bantu
ba matunga nimwawo.
32 # Isha 42:6, 49:6, 52:10. Nengi mwaana ukaholola shifungo shobe ku Bakamatunga,
na kuleta wuwahe ku bantu bobe Baishalela.”
33Tatiyendi na mandiyendi bakomokele byuma ebye byambiwile hahendi. 34Shimiyoni wabafuywelele niho ambile kuli Maliya mandiyendi ngayi, “Mona, ou mwana unahatiwi kwinga kunonga na kupulwishiwa kwa babengi mu Ishalela. Ukenga shimonekesho shakufuma kuli Nyambi eshe shikakaniwa ku bantu babengi, 35nohobene ngayi bihanganiko bya mu mitima ya babengi mwanga bikaholoke. Unginga ukukuyaha ku mutima ngonehe mukwale wa utwe.”
36Kami kwekalile muluwe wa Nyambi wa mbuyama, Ana mwana Fwaniwelu wa mushobo wa Asha. Wengile kakulukazi. Wayoyele hamo na mukokwendi myaka mutanu na yibili. 37Kufuma haya, wengile mfwile kukuma na ku myaka makumi mutanu na ahatu na inaa. Kaliha wafuminenga mu Litala lya Nyambi, ngoboni walemeshelenga Nyambi wushiku na mwana, wazililenga kulya, kami walombelenga. 38Ha shikati shiyobene, wenginine, pe wayemezele Nyambi, kami watontwelele bya mwana kukwabo nimwabo batatilililenga kupulwishiwa kwa Yelushalema.
Kuboka ku Nazaleta
39 #
Mat 2:23. Oho Yoshefwa na Maliya batendele byuma nimwabyo ngonehe ku ndayano za Mwene, babokele ku Ngalileya ku munzi wabo wa Nazaleta. 40Mwana wakulile, pe wengile wa ngovu. Wekalile na ngana zazingi, kami shishemo sha Nyambi shekalile hahendi.
Kanuke Yeshu mu Litala lya Nyambi
41 # Kut 12:1-27; Nday 16:1-8. Bahemi bendi bayilenga ha mwaka na mwaka ku Yelushalema ku Shimbo sha Kupitilila. 42Oho Yeshu ekalile na myaka likumi na yibili, bayile ku Yelushalema ku shimbo, ngonehe batendelenga. 43Oho bamanishile shimbo, bahemi bendi oho babokelenga ku munzi, kanuke Yeshu washalile kunyima mu Yelushalema. Bahemi bendi kaliha balimukile. 44Ngoboni bahanganikile ngayi kampe wekalile mu likunge, pe bayile mukala wa mutena umo, niho batatikile kumushinga mukati ka bawushinda wabo na bahoni babo. 45Oho babulile kumuwana, babokele ku Yelushalema na kumushinga. 46Oho kwapitile matena ahatu, bamuwanine mu Litala lya Nyambi hinga ekala na balongeshi hayuvwilila kukwabo kami habepula mayipu. 47Nimwabo baya bamuyuvwile bakomokele ku kalimukisho kendi na kukumbula kwendi. 48Oho bahemi bendi bamumonene, balikomokelele. Mandiyendi wambile kukwendi ngayi, “Mwanami, shumangani unatende nehe kukwetu? Tatiyobe nanami tunakushinga-shinginga shikuma.”
49Yeshu wambile kukwabo ngayi, “Kati mwancingilinga bishini? Kulimuka ngayi nikufwanina kwikala mu Litala lya Tate mufwako ndi?” 50Ngoboni kaliha bayuvwishishile ebye ambile kukwabo.
51Niho Yeshu abokele nabo ku Nazaleta, wabombatalile. Ngoboni mandiyendi walamine ebye nimwabyo mu mutima wendi.
52 # 1 Sham 2:26; Zing 3:4. Yeshu wakulile mu ngana na mwimo na kuyamiziziwa kwa Nyambi na bantu.
Currently Selected:
Luka 2: KK2008
Highlight
Share
Copy
Want to have your highlights saved across all your devices? Sign up or sign in
New Testament in Nkoya © The Bible Society of Zambia, 2008.
