Luka 8
8
Bambuyama baya bayile na Yeshu
1Kunyima yanebye, Yeshu wayile na kupita mu minzi yayinene na mu tuminzi na kushimikila ncango zaziwahe za Wene wa Nyambi. Bandongesha likumi na babili bekalile hamo nendi, 2#Mat 27:55, 56; Mak 15:40, 41; Luk 23:49. na bambuyama bamo baya banyongomanine ku mayimbwe na ku malweli, Maliya (watumbiwile Mangandalena) ou afumishile mayimbwe mutanu na abili 3na Njowana mukaza Ncuza shamanga sha Helonda na Shushana na babengi bamina bamuyavwile na wuheti wabo.
Nguli ya mukakukuba
(Mateo 13:1-9; Mako 4:1-9)
4Likunge lyalinene lya bantu bafumine ku minzi nimwayo bakungulukilile kuli Yeshu. Pe wabatongwezele eye nguli ngayi,
5“Mukakukuba wayile na kukuba mbuto yendi. Oho akubilenga, mbuto yamina yawililile mu nzila, omo bayilyatangilile na mawulu na tuyoni twezile na kuyilya. 6Mbuto yamina yawililile ha mamanya. Oho yamenene, yalebukile ndaba limvu lyabulile mbombweshi. 7Yamina yawililile mukati ka mihongela, oho mihongela yakulile hamo na mbuto, yaitintishile. 8Ngoboni mbuto yamina yawililile mu limvu lya wilo, yamenene, pe yayimine mwanda.”
Oho amanishile, wambile kukwabo ngayi, “Ou uli na matu akuyuvwa, ayuvwe!”
Shifungo sha zinguli
(Mateo 13:10-17; Mako 4:10-12)
9Bandongesha bepwile Yeshu ngayi abatontolwele eye nguli, 10#Isha 6:9. pe Yeshu wambile kukwabo ngayi, “Kukwenu kunapanikiwi kulimuka ncimpi za Wene wa Nyambi, ngoboni ku bamina nikwamba mu zinguli mwanga bamone, ngoboni kumoneshesha bafwako, kami mwanga bayuvwe, ngoboni kuyuvwishisha bafwako.
Yeshu ukutontolola nguli ya mukakukuba
(Mateo 13:18-23; Mako 4:13-20)
11“Haya nguli eye yikutontolola nehi ngayi, mbuto yenga lizu lya Nyambi. 12Mbuto yiya yawililile mu nzila yinengi bantu baya bakuyuvwa lizu, niho kami Shatana ukwiza na kufumisha lizu linakubiwi mu mitima yabo, kutina bakulupila ngayi bapuluke. 13Mbuto yiya yawililile ha mamanya yinengi bantu baya bakuyuvwa lizu, bakulitambula na kuwahilila, ngoboni lizu kuzika mipishi mumwabo lifwako, bakukulupila kashikati kakashe tuhu, oho shikati sha byezeko shakeza bakashiya kukulupila kwabo. 14Mbuto yawililile mu mihongela yinengi bantu baya bakuyuvwa lizu, ngoboni bya kulifulankana na wuheti na nyumwa ya byuma bya wumi uno bikatintisha lizu ngayi mikabo yabo yifwako kukula. 15Ngoboni mbuto yawililile ha limvu lya wilo inengi bantu baya bakuyuvwa lizu na kulilama mu mitima yakwoloka na kupwisha, kami bakwikala na lunzewe hantu banayimi mikabo.
Lumuni lwa kufwikiwa lulonga lwa kukunama
(Mako 4:21-25)
16 #
Mat 5:15; Luk 11:33. “Kowa muntu wamunikanga lumuni na kulufwika lulonga lwa kukunama, hinge kuluyaka munceto ya wulili, ngoboni ukuluyaka haya lukutwesha kumoneka ngayi baya bakwinginamo batweshe kumona liyeye.
17 #
Mat 10:26; Luk 12:2. “Ndaba kowa shuma shakuholekiwa shikabula kuholoka, hinge shakulimbiwa shikabula kutumpuka.
18 #
Mat 25:29; Luk 19:26. “Nohobene keyenu hanebye mukuyuvwa, ndaba ou ulinabyo bakamuwezelelako, kami ou unabibulu bakamuyanga nanaka alinako.”
Bamanda Yeshu na bakonzobendi
(Mateo 12:46-50; Mako 3:31-35)
19Niho mandiyendi Yeshu na bakonzobendi bezile kukwendi, ngoboni kaliha batweshele kukuma kukwendi ndaba ya likunge lya bantu. 20Muntu wamina wamutongwezele ngayi, “Bamandiyobe na bakonzobobe bali hamunkanda, bakukushinga kukumona.”
21Yeshu wabakumbwile ngayi, “Bamawa na bakonzobami banengi baya bakuyuvwa lizu lya Nyambi na kulyombatala.”
Yeshu ukumwenesha nkuli
(Mateo 8:23-27; Mako 4:35-41)
22Ha mutena wamina Yeshu wenginine mu wato hamo na bandongesha bendi, wambile kukwabo ngayi, “Twombokelenu munciza ya liziba. Niho bayile. 23Ngoboni oho bavuwilenga, niye walanganine mu tulo. Kwezile nkuli yayinene ha liziba wato wenzalile na mema, niho bekalile mu malamo. 24Bezile kukwendi, bamutoneshele ngayi, “Hekulu, Hekulu! Tulinakufwa!”
Niho apindukile, wambilile nkuli na wukali wa mankanyi ngayi amwene, pe kwekalile kumwena shikuma.
25Yeshu wambile ku bandongesha bendi ngayi, “Kukulupila kwenu kuli kuti?”
Niho batinine na kukomoka, bambile umo ku wamina ngayi, “Kati ou muntu wanahiti? Ndaba ukwambila nkuli na mankanyi, kami bikumwombatala!”
Yeshu ukunyongomanisha mulume wa mayimbwe
(Mateo 8:28-34; Mako 5:1-20)
26Yeshu na bandongesha bendi bakumine ku litunga lya Bangalashena, liyo lyalipenzele na Ngalileya. 27Oho Yeshu akumine ha shibumbo, walihanganine na mulume wa mayimbwe wafumine mu munzi. Wekalile na mayimbwe, shikati shashitali kaliha wavwalilenga bivwalo, hinge kwikala mu litala, ngoboni wekalilenga ha binzimbi. 28Oho amonene Yeshu, washinkamine kumbili yendi, niho abilikizile na lizu lyalinene ngayi, “Ukushinga kutenda bishini obe Yeshu Mwana Nyambi Wakukangana? Nikunyepa ngayi hinga unyandisha!” 29Wambile nahiyo ndaba Yeshu wambilile mayimbwe ngayi afume mumwendi. Ndaba bikati byabingi amuyandishilenga, pe bamulaminenga hinga amangiwa mawenge na mu bikulo, ngoboni wabimungwilenga kami mayimbwe amutwalilenga mu libelelengwa.
30Yeshu wamwipwile ngayi, “Lizina lyobe obe yani?”
Wakumbwile ngayi, “Lizina lyami ami ‘Litanga,’ ” ndaba mayimbwe amengi enginine mumwendi. 31Mayimbwe niho anyepele Yeshu ngayi hinga awatandila mu kalunga.
32Kwekalile litanga lya zingulube zazingi zalilenga ha shinkanda, pe mayimbwe anyepele Yeshu etabile ngayi akengine mumwazo. Yeshu wetabilile. 33Niho mayimbwe afumine ku mulume, enginine mu zingulube. Litanga lyetukile na kuliyumbila mu liziba, pe lyandokamine.
34Balishani oho bamonene eshe shatendiwile, betukile kuya na kutongweza bantu mu minzi na mu litunga. 35Bantu bayile mukumona eshe shatendiwile, oho bezile kuli Yeshu, bawanine mulume ou afumine mayimbwe hinga ekala ku mawulu a Yeshu, navwala, kami uli shiwahe. Pe batinine shikuma. 36Obo bamoneneko batongwezele bantu eshe shatendiwile ku mulume wa mayimbwe. 37Niho bantu nimwabo ba hahepi na litunga lya Bangalashena banyepele Yeshu ngayi afume kukwabo, ndaba bekalile na bowa wawunene shikuma. Yeshu wenginine mu wato, pe wabokele. 38Mulume uya afumine mayimbwe wanyepele Yeshu ngayi aye nendi, ngoboni wamubweshele ngayi, 39“Boka kukwenu, ukabatongweze ebye anakutendele Nyambi.”
Mulume wayile na kutongweza bantu mu munzi nimwawo ebye amutendelele Yeshu.
Mwana Yailashi na mbuyama wakwatile ku shivwalo sha Yeshu
(Mateo 9:18-26; Mako 5:21-43)
40Oho Yeshu abokele ku mbalila yamina ya munciza ya liziba, bantu bamutambwile ndaba bekalile na kumutatilila. 41Niho Yailashi umo wa bakulwane ba shinangonge wezile kuli Yeshu, wawililile hanci ku mawulu a Yeshu, wamulambililile ngayi aye ku litala lyendi, 42ndaba wekalile na mwanendi wa mbuyama umo pele, wa myaka likumi na yibili, washingile kufwa. Oho Yeshu ayilenga, likunge lyamushinanishile. 43Pe hekalile mbuyama wekalile na wulweli wakututika mukeza myaka likumi na yibili, wayumbile ebye ekalile nabyo nimwabyo ku banganga, ngoboni kowa watweshele kumunyongomanisha. 44Wezile kunyima ya Yeshu mu likunge lya bantu, pe wakwatile ku mungundo wa shivwalo shendi, wanguwangu wulweli wendi wakututika mukeza waketukile. 45Yeshu wambile ngayi, “Kati yani ou nankwata?”
Oho nimwabo bakanine, pe Pita wambile ngayi, “Mulongeshi, likunge lya bantu linakubumbilili na kukunkuntula.”
46Ngoboni Yeshu wambile ngayi, “Kuli umo nankwata, ndaba nikuyuvwa ngayi ngovu zinafumu mumwami.” 47Mbuyama uya oho amonene ngayi kuholama wufwako, wezile na kulikankila, pe wawililile hanci ku mawulu a Yeshu, wamutongwezele ku meho a bantu nimwabo shumangani eshe anamukwatili na neshe ananyongomana wanguwangu. 48Yeshu wambile kukwendi ngayi, “Mwanami, kukulupila kwobe kunakunyongomanishi. Yanga mu kumwena.”
49Oho Yeshu ushili kwamba, umo wafumine ku litala lya mukulwane wa shinangonge, wa mutongwezele ngayi, “Mwanobe unafu, hinga ukabakanisha Mulongeshi kami.”
50Ngoboni Yeshu hakuyuvwa eshe, wambile ku mukulwane wa shinangonge ngayi, “Hinga utina, kulupila tuhu, mwana ukanyongomana.”
51Oho Yeshu akumine ku litala, kaliha wetabilile ngayi umo engine nendi, ndele tuhu Pita na Yakoba na Yowano na tatiyendi na mandiyendi. 52Nimwabo balililenga na kutuwa mbingo, ngoboni Yeshu wambile ngayi, “Hinga mulila, ndaba mwana shilolo afwe, ngoboni nalangana tulo!”
53Nimwabo bamuhepele, ndaba balimukile ngayi mwana unafu.
54Ngoboni Yeshu wamukwatile ku liboko, niho amwihanine ngayi, “Mwanami, pinduka!” 55Moyo wendi wabokelemo, wanguwangu wapindukile, pe Yeshu wabatongwezele ngayi bapane mwana byakulya. 56Bahemi bendi bakomokele, ngoboni Yeshu wabakanishile ngayi hinga batongweza muntu hinge umo ha shuma eshe shinatendiwi.
Currently Selected:
Luka 8: KK2008
Highlight
Share
Copy
Want to have your highlights saved across all your devices? Sign up or sign in
New Testament in Nkoya © The Bible Society of Zambia, 2008.
