Luka 7
7
Yeshu ukunyongomanisha mukamulimo wa mukulwane wa bakanzita
(Mateo 8:5-13)
1Oho Yeshu amanishile kwamba ebye nimwabyo ku bantu, wayile ku Kapenauma. 2Mukulwane wa bakanzita wekalile na mukamulimo wendi ou ahakile shikuma, wakolele, pe washingile kufwa. 3Oho mukulwane wa bakanzita ayuvwile mpupo ya Yeshu, wamutuminine bakulwane ba Bayunda na kumulomba ngayi eze na kunyongomanisha mukamulimo wendi. 4Oho bakumine kuli Yeshu, bamulombele shikuma ngayi, “Ou muntu unafwanini ngayi umuyavwe, 5ndaba wahaka ba mushobo wetu, kami niye watutendelele shinangonge.”
6Niho Yeshu ayile hamo nabo. Oho akumine hahepi na litala lyendi, uya mukulwane wa bakanzita watumine bahoni bendi kuli Yeshu na kumutongweza ngayi mukulwane wa bakanzita unamba ngayi, “Mwene, hinga uliyandisha. Ndaba ami kufwanina nifwako ngayi obe wingine mu litala lyami. 7Nisho nahanganiki ngayi ami kufwanina nifwako kwiza kukwobe, ngoboni amba tuhu lizu ku mukamulimo wami, pe ukanyongomana. 8Ndaba ami kami nili munceto ya baya bali na ngovu hahami, kami nanami nili na banzita munceto yami. Pe nambanga ku umo ngayi, ‘Yanga!’ Pe ukuya, kami nambanga ku wamina ngayi, ‘Yeka!’ Pe ukwiza, kami nambanga ku mukamulimo ngayi, ‘Tenda eshe!’ Pe ukushitenda.”
9Oho Yeshu ayuvwile mazu awa, wakomokele, wafutukile, wambile ku likunge lya bantu bamukonkelenga ngayi, “Nikwamba kukwenu ngayi, mu Ishalela, shilolo niwane kukulupila kwakunene kwanehe.”
10Nibo aba batumiwile babokele ku litala, pe bawanine ngayi mukamulimo ou wakolelenga unanyongomana.
Yeshu ukushangula mwana mfwile wa mulume
11Kunyima yanebye, Yeshu wayile ku munzi ukutumbiwa Nayina, na bandongesha bendi hamo na likunge lyalinene lya bantu. 12Oho akumine hahepi na lipangati lya munzi, balihanganine na bantu bashimbile muntu wakufwa, ou wengile mwana umo tuhu wa mulume mu livumo lya mandiyendi, ou wengile mfwile. Likunge lyalinene lya bantu ba mu munzi bekalile nendi. 13Oho Mwene amumonene wamuyuvwilile nceshe, wambile kukwendi ngayi, “Hinga ulila.” 14Niho akwatile liboko lyendi ku mubanda, baya bashimbile mubanda bemanine. Yeshu wambile ngayi, “Ndumbana! Nikwamba kukwobe ngayi, pinduka!” 15Mufu wapindukile, watatikile kwamba. Niho Yeshu wamubweshele kuli mandiyendi.
16Bantu nimwabo bekalile na bowa niho bayemezele Nyambi ngayi, “Muluwe wamunene unezi mukatiketu.” Kami bambile ngayi, “Nyambi unazingulu bantu bendi!”
17Mpupo yendi yatumbalalile mu Yundeya nimwamo na mu litunga lya hahepi nimwalyo.
Yeshu na Yowano Mukakuzubilisha
(Mateo 11:2-19)
18Oho bandongesha ba Yowano bamutongwezele byuma ebye nimwabyo, wehanine bandongesha bendi babili, 19pe wabatumine kuli Mwene na kumwipula ngayi, “Kati obe uya watoyiwile ngayi ukeza ndi? Hinge tutatile wamina kami?”
20Oho bandongesha bezile kuli Yeshu, bambile ngayi, “Yowano Mukakuzubilisha unatutumu kukwobe na kwipula ngayi, “Kati obe uya watoyiwile ngayi ukeza ndi? Hinge tutatile wamina?”
21Ha shikati shiyo wanyongomanishile bakakukola babengi, bakamalweli wabo na bakamayimbwe, kami watoneshele tushishitwa babengi. 22#Isha 35:5, 6, 61:1. Niho Yeshu akumbwile kukwabo ngayi, “Bokenu mukatongweze Yowano ebye munamono nanebye munayuvwu. Tushishitwa bakumona, bakakupenga bakwenda, bakabimakwa bakunyongomana, bizikamatu bakuyuvwa, bafu bakushanguka, kami ncango zaziwahe zikushimikiwa ku bakakushepwa. 23Bali na mfuywezi baya bakubula nkani hahami!”
24Oho bantumwana ba Yowano bayile, Yeshu watatikile kwamba ku likunge lya bantu ngayi, “Kati bishini mwayile mukumona mu libelelengwa? Kati lyengile litete likunyenkanishiwa na mpepo ndi? 25Ndi kaliha noho bishini boni mwayile mukumona? Mwakamonene muntu wavwalile bivwalo byabiwahe ndi? Byo, obo bakuvwala bivwalo byakulelema na kuyoya mu myelembo bali mu misheke ya bamyene. 26Ngoboni bishini mwayile mukumona? Mwayile mukumona muluwe wa Nyambi ndi? Ingoi, nikwamba kukwenu ngayi, uya mwamonene ukupitakana muluwe wa Nyambi. 27#Mala 3:1. Ndaba Yowano niye ou kwatikitiwile byendi ngayi, ‘Nikatuma ntumwana wami kumbili yobe, ou ukawahisha nzila yobe!’ 28Nikumitongweza ngayi, ku bantu nimwabo bakuhemuwa hano hanci, kowa wakupitakana Yowano Mukakuzubilisha, ngoboni ou wamushe mu Wene wa Nyambi nengi wakupitakana Yowano.”
29 #
Mat 21:32; Luk 3:12. Bantu nimwabo, hamo na bakakutelesha, oho bamuyuvwile, betabilile kwoloka kwa Nyambi ndaba bazubilishiwile kuli Yowano. 30Ngoboni Bafwalishi na bakakulongesha ndayano bakanine shifungo sha Nyambi mukatikabo, pe kaliha bazubilishiwile kukwendi.
31Yeshu wambile ngayi, “Haya bantu ba mukoka ou nikabafwanikiza na bayani? Bakufweka ngo bayani? 32Bakufweka ngo batwanuke banekala ha mwanya wakulandishila bakubilikiza baminabo ngayi, ‘Twamishibili mpeta, ngoboni shilolo mushinde! Tunamimbetele tukonkobele, ngoboni shilolo mu lile!’ 33Oho Yowano Mukakuzubilisha ezile wazilile kulya mankende na kunwa waine, pe mwambile ngayi, ‘Uli na mayimbwe!’ 34Mwana Muntu unezi mukulya na kunwa, ngoboni mukwamba ngayi, ‘Monenu muntu wa mutongo na mukakukolwa, muhoni wa bakakutelesha na bakawubi!’ 35Ngoboni ngana za Nyambi zikulimonekesha shiwahe ku bantu banazitambulu.”
Yeshu ku litala lya Shimoni Kafwalishi
36Umo wa Bafwalishi wehanine Yeshu kuya mukulya nendi, pe Yeshu wayile ku litala lya nou Kafwalishi, wakekalile ku tebulu na kulya. 37#Mat 26:7; Mak 14:3; Yow 12:3. Muya mu munzi mwekalile mbuyama ou wengile mukawubi, oho alimukile ngayi Yeshu wekalile na kulya mu litala lya Kafwalishi, waletele mushashi wa mazi. 38Wemanine kunyima ya Yeshu ku mawulu wendi halila, niho azabishile mawulu a Yeshu na mihozi yendi. Wakunkumwine mawulu na huki za ku mutwe wendi, pe wawazupezele na kuwawabisha mazi. 39Oho Kafwalishi ou wamwihanine amonene noho, wambile mu mutima wendi ngayi, “Shinge ou muntu wenga muluwe wa Nyambi, shinga nalimuku ngayi ou mbuyama ulinakumukwata wa nahiti, ndaba wenga mukawubi!”
40Yeshu wakumbwile ngayi, “Shimoni, kuli ebye nikushinga kukutongweza.” Shimoni wakumbwile ngayi, “Ingoi, Mulongeshi ntongweze.” 41Yeshu wamutongwezele ngayi, “Kwekalile muntu wamina wakoloteshele mali wendi ku bantu babili. Umo wekalile na shikoloti sha mali a myanda ya mutanu, wamina sha makumi a mutanu. 42Oho babulile mali akumuhingishila, wabayatilile bikoloti byabo wubili wabo. Nohobene ntongweze, kati yani hakati kabo ukumuhaka shikuma?”
43Shimoni wakumbwile ngayi, “Nikuhanganika ngayi ou ayatilile shikoloti shashinene.”
Yeshu wakumbwile ngayi, “Unayata shiwahe.” 44Watengulukilile kuli mbuyama, niho ambile kuli Shimoni ngayi, “Ukumona ou mbuyama ndi? Nengini mu litala lyobe, ngoboni shilolo umpane mema akuyowela ku mawulu. Ou mbuyama nayoweshe mawulu wami na mihozi yendi na kuwakunkumuna na huki za ku mutwe wendi. 45Shilolo unzupeze, ngoboni ou mbuyama hinga nenginina, kuleha kuzupeza mawulu wami wufwako. 46Shilolo ungwabishe mazi ku mutwe wami, ngoboni ou mbuyama unangwabishi mazi ku mawulu. 47Nohobene nikukutongweza ngayi wubi wendi wawingi unayatiwili ndaba wahakile shikuma, ngoboni ou ukuyatiwila shashishe, ukuhaka shashishe.”
48Wambile kuli mbuyama ngayi, “Wubi wobe unayatiwili.”
49Niho baya bekalile kukulya hamo nendi, batatikile kwamba mukati kabo ngayi, “Kati yani ou ukuyatila wubi?”
50Ngoboni Yeshu wambile kuli mbuyama ngayi, “Kukulupila kwobe kunakupulwishi, yanga mu kumwena.”
Currently Selected:
Luka 7: KK2008
Highlight
Share
Copy
Want to have your highlights saved across all your devices? Sign up or sign in
New Testament in Nkoya © The Bible Society of Zambia, 2008.
