Zaŋ 10
10
Dan mə gəgan wa bə ji cime mə ɓaya
1«Na in mi ne, kəzini: Swə məni cu pâ wə vun vari kədan mum ze də rawti giɗ cime mi, ama mum dam wa kəŋga' giɗ rum kədan mum ze də han, bə rum nə hura ɓay bə bargu kwa. 2Ama swə məni pâ wə vun vari, bə rum nə bə ji cime. 3Bə ji vun giɗ cime wə ar vun vari zə rum, ɓay cime mun wor rumu. Mum ɗe cime um kə semɗe nday ɗaw ɗaw daŋ' ɓay wur mbə rawti giɗ də rəka kə ndaya. 4Kəri məni mum wur ta rəka kə nday daŋ', mum ta wə kor nday ɓay cime kuni ji zu rum, zə handay mun wor rum si. 5Ama handay cu ji zu rəkway mi. Zawa, handay də pik ne seŋ kə rum, zə handay cu mun wor rum mi.»
6Zezu in dan mə gəgan rum ne nday, ama handay cu mun zu dan rum mi.
Zezu nə bə ji cime mə ɓaya
7Zezu faŋ in kəreme: «Na in mi ne kəzin', na nə vun vari giɗ cime. 8Sôwâ daŋ' məni mbə cop kə rin, handay hura ɓay sum bargu kwa, ama cime cu mun wor nday mi. 9Na nə vun vari: Swə məni pâ wə vun vari rum, bə rum də fe siɗ, mum gak də ze ɓay pâ, ɓay mum də za' kwati. 10Hura mbə kədan mum kəy hura, kə ci swə, ɓay ɗənok kwa sara. Ama mə na, na mbə kədan sôwâ fe nyî, ɓay fe nyî rum ɓayrumu.»
11«Na nə bə ji cime mə ɓaya: Bə ji cime mə ɓay wə mar zə cime umu. 12Swə məsin wə ji cime zə wa' po' tawa. Bə rum cu bə ji cime mə kəzin' mi, ɓay cime rum mə mum cu mi. kəri məni swə nə we dəghaw' wə mbə, mum ɗâ ne ar cime, ɓay dəghaw' kaw cime ɓay pla' wa ndaya. 13Mum ɗâ ne zə mum wə gi sin zə wa' po' taw, ɓay mum cu ɗik dan wa cime rum mi. 14Na nə bə ji cime mə ɓay, na we cime man, ɓay cime man we nan, 15ce' ndə məni Ba man we nan, ɓay na we Ba man, na wə mar zə cime mana#Mat 12.27; Luk 10.22. 16Na kə cime məsin məni cu wə giɗ məni nə mi, say na də nday keɓ mbə kə nday ta'a. Handay də mun wor rin, ɓay handay də faŋ kul mə ɗaw kə bə ji cime mə ɗawa. 17Ba man bə nan zə na də ne nyî rin kədan na faŋ fe kəreme. 18Swə ɗaw cu gak tle nyî rin mi, ama na də ne nyî rin kə bə tu rini. Na kə vari ne rum, ɓay na kə vari fe rum kəreme. Ba man ne vari ne nan kədan na gi ndəna'a.»
19Sôwâ Zuwif faŋ ɓul nji kərem wa dan rumu. 20Sôwâ juk du nday ini: «Mum kə gam wa rumu! Mum laya! Zə mi hi wə mun dan um su?» 21Sôwâ məsin du nday ini: «Swə məni kə gam wa rum cu gak ge dan ndəna' mi. Gam gak ar i ne kə dəŋâr su?»
Sôwâ Zuwif vaɗ Zezu
22Sôwâ Zuwif wə gi cer ar vun so Ifray wə so Jeruzalem kə wakaya. 23Zezu wə gaŋ zə daŋki Salomoŋ məni wə vun so po' fur sôwâ Zuwif. 24Kəri rum, sôwâ Zuwif ɓawa mbə gay' gan wa rum ɓay ci vun rumu: «Ha də mba ar wə du cik məni nə ndəna' hâ su? Ha la' Kris si, a in ne mba təlak ye!» 25Zezu ɗam vun ndaya: «Na in ne ni si, ama hi cu ve dan man mi. Sin məni na wə gi kə semɗe Ba man, sin rum wə in njeŋ dan wa rini, 26ama hi cu ve dan man mi, zə hi cu wə du kul cime man mi. 27Cime man wə mun wor rin, na we nday, ɓay handay wə ji zu rini. 28Na wə nday ne nyî mə də hâ. Handay cu mar kpe mi, ɓay swə ɗaw cu gak nday ɓar ɓa rin mi. 29Ba man məni ne nday ne nan, mum kə mbra' pâ kwa daŋ', ɓay swə ɗaw cu gak nday ɓar ɓa Ba man mi. 30Ba man kə na, namba ɗawa.»
31Sôwâ Zuwif faŋ ra' gway' kərem kədan handay um ge kə ndi. 32Zə rum, Zezu la' ne ndaya: «Na gi sin mə ɓay juk wə kor ri kə gbəgboŋ Ba mana. Zə sin mə ka wə du nday hi wa' kədan hi man ge kə gway' su?» 33Sôwâ Zuwif ɗam vun rumu: «Namba cu wa' kədan namba wû ge kə gway' wə zə sin mə ɓay mi, ama zə ha wə ge dan mə bro' wa Ifray, zə ha sumra', ama ha wə gi tu ru ce' ndə Ifraya#Lev 24.16.» 34Zezu ɗam vun ndaya: «Swə məsin wây' wə du ɗerwa dan dlay mi i Ifray ini: Hi ifraya#Nye 82.6. 35Namba we si, swə ɗaw cu gak par dan məni wây' wə du Ɗerwa Ifray nə də rəka mi. Ifray ɗe sôwâ məni mum ne dan um ne nday kə ifraya. 36Ɓay mə na, Ba man par nan ɓay sin nan mbə wə du sôwâ nya, gi ma hi gak in i na wə ge dan mə bro' wa Ifray kəri məni na wə in i na Vay Ifray nə su? 37Na la' cu gi sin Ba man mi si, i ve nan mi. 38Ama na la' wə gi sin rum si, ko hi la' cu ve nan mi laŋ, i ve sin man kədan hi we njeŋ i Ba man kəta' wə du rin, ɓay na kəta' wə du Ba mana.» 39Handay keɓ kədan handay um kaw kərem, ama mum siɗ mbə ɓa ndaya. 40Zezu faŋ 'ya ta dapa ga' sin ze Zurdeŋ kərem, wə ri məni Zaŋ ke gi baptem ne kə sôwâ han ɓa', ɓay mum suk wə hana. 41Sôwâ juk mbə hay' rumu. Handay ini: «Zaŋ cu gi yew mi, ama dan daŋ' məni mum in wa swə məni nə kəzini.» 42Ɓay sôwâ juk ve Zezu wə hana.
Currently Selected:
Zaŋ 10: KMN
Highlight
Share
Copy
Want to have your highlights saved across all your devices? Sign up or sign in
Le Nouveau Testament et Psaumes en Peve © Alliance Biblique du Tchad, 2014.
