Zaŋ 11

Lazar car mbə mara

1Swə mə ɗe kə Lazar suk wə so Betani, mum kə gaɓa. Mari kə njar sə Marta gay' wə so rum ta'a#Luk 10.38-39 . 2Mari, ma məti ke wu' urdi ta sem Bârî ɓay faŋ kutu sem rum kə sâ wa sa. Njər sə Lazar kə məni kə gaɓ na#Zaŋ 12.3. 3Njar rum mə hoɓ kuni sin swə məsin ta hay' Zezu kədan nə in ne numu: «Bârî, bây wû kə gaɓa.» 4Kəri məni Zezu mun dan rum, mum ini: «Gaɓ Lazar cu də um ci mi: Ama gaɓ rum wə də ta' mbra' Ifray ɓay wə də ne mbra' ne kə Vay Ifray ta'a.»

5Zezu bə Marta kə njar sə, ɓay Lazar ta'a. 6Kəri məni mum mun i Lazar kə gaɓ, mum faŋ gi bəka hoɓ wə ri məni mum wə hana. 7Mum faŋ la' ne kə sum ta zə rumu: «Mə faŋ də nya Zude.» 8Sum ta zə rum ɗam vun rumu: «Bə ta' kwa, cu bar bəka juk mi, sôwâ Zuwif wə keɓ kədan handay wû ge kə gway', ɓay ha wa' kədan ha faŋ də han kərem su?» 9Zezu ɗam vun ndaya: «Wə du bəka ɗaw, ler fəta guɓ wa hoɓ wə ke han, cu ndəna' mi su? Swə la' wə ta kə fəta si, mum cu dle wa sem mi zə mum wə weri mə ɓu mə wa nya. 10Ama swə la' wə ta kə dukri si, mum dle wa sem zə mum cu kə ri mə ɓu mi.» 11Zezu in dan rum ne nday, ɓay mum faŋ ini: «Bây mba Lazar wə nde sen, ama na wə də um dla'a.» 12Sum ta zə rum ɗam vun rumu: «Bârî, mum la' wə nde sen si, mum də cara.» 13Zezu wa' dan in i Lazar mar si, ama sum ta zə rum ɗik i mum in dan wa sen mə kəzini. 14Zə rum, Zezu la' ne nday təlaka: «Lazar mar si. 15Ama ɓay zə ri zə na cu wə han kəri rum mi. Ndəna' hi də man ve. Mə də hay' rum ye!» 16Kəri rum, Tomas məni sôwâ um ɗe kə nyerwa la' ne kə sum ta zə Zezu məsini: «Namba ta', mə də kə rum kədan namba mar kə rumu.»

Zezu nə bə ra' sôwâ mbə mar, ɓay mum nə bə ne nyî ta'a

17Kəri məni Zezu mbə day so Betani, mum za' Lazar gi bəka fəɗi' wə rawti zra si. 18So Betani kə so Jeruzalem seŋ ce' ndə kilometrə hinji', 19ɓay sôwâ Zuwif juk mbə so Marta kə Mari kədan handay nday ɓu ɗumwa mar njər ndaya.

20Kəri məni Marta mun i Zezu mbə day, ta 'ya ta ndewa kə rum, ama Mari suk wə so. 21Marta la' ne kə Zezu: «Bârî, ha la' kəzə wə ti si, njər rin cu mar mi. 22Ama na we si, ko mgbaŋ ni nə, Ifray də wû ne kwa daŋ' məni ha wə də o ɓa rumu.» 23Zezu la' ne sa: «Njər riŋ wə də car mbə mara.» 24Marta ɗam vun rumu: «Na we si mum də pâ mbə mar kə bəka ndo' nya.»

25Zezu la' ne sa: «Na nə bə car sôwâ mbə mar, ɓay na nə bə ne nyî ta'a: Swə məni ve nan, bə rum də ke kə nyî, ko mum la' mara. 26Ɓay swə məni kə i, ɓay bə rum ve nan, mum cu də mar kpe mi. Həŋ ve dan rum si su?» 27Ta ɗam vun rumu: «Awo, Bârî, na ve si, ha nə Kris, Vay Ifray məni mbə wə du sôwâ nya.»

Zezu ci' zə Lazar

28Kəki məni Marta in dan ndəna', ta faŋ 'ya ta hay' njar sə Mari ɓay la' ne sə 'yeŋe: «Bə ta' kwa kəta' kəna, ɓay mum wə maŋ ɗe.» 29Kəri məni Mari mun dan rum, ta car ɓay ɗəma ta hay' Zezu. 30Zezu cu ze mbok so məto', ama mum wə ri məni Marta ta ndewa kə rum han nə ɓo. 31Kəri məni sôwâ Zuwif məni gay' wə so kədan handay ɓu Mari ɗumwa mar njər sə kuni we sə car ɓay pâ kə ɗəma, handay wur ra' zə sa. Handay ɗik i ta wə də vun zra kədan ta də ci' wə hana. 32Kəri məni Mari ta day ri məni Zezu wə han ɓay we num, ta kuduk ta nya kor rum ɓay la' ne numu: «Bârî, ha la' kəzə wə ti si, njər rin cu mar mi.» 33Zezu we ta wə ci', ɓay sôwâ Zuwif məni mbə kə sə wə ci' ta', vunduk par num ɓay mum ɗik dan juku. 34Mum ci vun ndaya: «Hi mo' num wə ka su?» Handay ɗam vun rumu: «Bârî, a mbə kar ye.» 35Zezu ci'i. 36Zə rum, sôwâ Zuwif ini: «I kar ri'i: Mum bə num dle tu si!» 37Ama sôwâ məsin du nday ini: «Mum ar i ne kə dəŋâr, mum cu gak tak mar Lazar ta' mi su?»

Zezu par Lazar mbə mara

38Vunduk Zezu wə ɗik dan də kofo. Mum 'ya ta vun zra, zra rum nə nyir gway', ɓay vun rum ta' kə gway'i. 39Zezu la' ne ndaya: «I pla' gway' rum də rəka.» Marta, njar bə mar, la' ne numu: «Bârî, mum wə səsî sar ye, zə mum gi bəka fəɗi' wə rawti zra si.» 40Zezu ɗam vun sa: «Na in naŋ si, həŋ la' ve nan si, həŋ də we mbra' Ifray, cu ndəna' mə su?» 41Sôwâ faŋ pla' gway' rum ta rəka. Zezu tle i ta fray ɓay ini: «Bəba, na gi soko ne nu zə ha wə man munu. 42Na we si, ha wə man mun bəka daŋ', ama na in ndəna' zə sôwâ məni gay' gan wa rin kədan handay ve i ha sin nana.» 43Kəki məni mum in dan rum, mum ka' dan kə gbəgboŋo: «Lazar, a pâ mbə ti rəka!» 44Mar nə pâ, sem rum kə ɓa rum ɗəlak kə zim, ɓay vuk rum ku' kə zim ta'a. Zezu la' ne ndaya: «I ulay' num ɓay ar num də ye!»

Sum rôwâ kawvun kədan ci Zezu

(Mat 26.1-5; Mak 14.1-2; Luk 22.1-2)

45Sôwâ juk wə du sôwâ Zuwif məni wə so Mari we kwa məni Zezu gi, ɓay handay ve numu. 46Ama sôwâ məsin du nday ta hay' kul sôwâ Zuwif mə ɗe kə Farisiyen ɓay in dan kwa məni Zezu gi nə ne ndaya. 47Kul sôwâ Zuwif mə ɗe kə Farisiyen kə sum rôwâ mə du sum po' fur ɓa kuni wa sum rôwâ Fada mə Mbri ɓay ci vun ndaya: «Namba də gi ma su? Zə swə nə wə gi yew juku. 48Namba la' ar num wə gi ndəna' si, sôwâ daŋ' də um ve, ɓay sum rôwâ nya Romə də mbə, ɓay handay də bru so po' fur mba ɓay sôwâ nya mba ta'a!» 49Swə ɗaw du nday mə ɗe kə Kayif, mum nə toŋ po' fur kə kim rum, la' ne ndaya: «Hi cu mun zu kwa məsin mi! 50Hi cu we i ɓay zə ri kədan swə ɗaw mar zə sôwâ, pâ məni sôwâ daŋ' mar nə mi su?» 51Mum cu in dan rum kə bə tu rum mi, ama zə mum toŋ po' fur kə kim rum, mum ka' dan i Zezu wə də mar zə sôwâ Zuwif, 52cu zə sôwâ nya rum taw mi, ama kədan mum də ɓawa daw Ifray daŋ' məni pla' wa faŋ tu mə ɗawa. 53Daka fəta rum, sum rôwâ mə du sôwâ Zuwif kawvun kədan handay ci Zezu. 54Zə rum, Zezu cu gaŋ wə du sôwâ Zuwif takram za' mi: Mum 'ya ta nya məni həre' kə igop, wə so mə ɗe kə Efrayim, mum bar han kə sum ta zə rumu.

55Cer Zuwif mə ɗe kə Pakə nə həre', ɓay sôwâ nya rum juk ta so Jeruzalem kədan handay wok tu nday zə cer rumu. 56Handay wə keɓ Zezu, ɓay kəri məni handay ɓawa wə so po' fur sôwâ Zuwif, handay ci vun nji mbok nji: «Hi ɗik ma su? Mum cu də mbə ri cer kpe mi!» 57Sum rôwâ mə du sum po' fur kə kul sôwâ Zuwif mə ɗe kə Farisiyen ne kuni vari ne kə sôwâ kədan swə la' we ri məni Zezu wə han nə si, say bə rum ta' ri rum ne nday kədan handay um kawa.

Currently Selected:

Zaŋ 11: KMN

Highlight

Copy