Zaŋ 12

Mari wu' urdi ta sem Zezu

(Mat 26.6-13; Mak 14.3-9)

1Bəka gwa' kanki' kədan cer sôwâ Zuwif mə ɗe kə Pakə nə gi, Zezu ta so Betani, so məni Lazar məni Zezu par mbə mar nə suk wə hana. 2Sôwâ gi kwati ne num wə han, ɓay Marta kə məni ɓul kwati rumu. Lazar kəta' wə du sôwâ məni gay' wə vun tablə kə Zezu. 3Kəri rum, Mari tle urdi məni coɓ rum kəcik kə reta litrə. Urdi rum gi kə wəɗi kwa mə ɗe kə «nar», ta wu' urdi rum ta sem Zezu ɓay ta faŋ kutu sem rum kə sâ wa sə, ndəna', sî urdi nə nduɓ wə rawti so rum daŋ'ŋ#Luk 7.37-38. 4Swə ɗaw mə du sum ta zə Zezu, Yudas Iskariyot, swə məni wə də um ar də ɓa sôwâ nə ini: 5«Zə mi handay cu gi coɓ urdi rum fe səlay kis hinji' kə ndi kədan handay ne səlay rum ne kə sum ca mi su?» 6Mum in ndəna' cu zə mum wə ɗik dan wa sum ca mi, ama zə mum nə hura, mum nə bə ji mbu səlay, ɓay mum wə kəy hura səlay məni handay ar ne num ɓa. 7Ama Zezu la' ne numu: «A ar sə 'yeŋe! Ta gi ndə na' zə ta wə ɗik dan wa bəka məni sôwâ wə də man mo' kə ndi. 8Hi də ke kə sum ca hay' ri bəka daŋ', ama mə na, hi cu də ke kə rin hay' ri bəka daŋ' mi#Ddd 15.11.»

Sôwâ kawvun kədan handay ci Lazar

9Raw sôwâ Zuwif mun i Zezu wə so Betani, handay ta wə han, cu zə Zezu taw mi, ama kədan handay kar Lazar məni Zezu car mbə mar nə ta'a. 10Kəri rum, sum rôwâ mə du sum po' fur kawvun kədan handay ci Lazar ta', 11zə sôwâ Zuwif juk wə nday ar ɓay ve Zezu zə dan Lazar.

Zezu ze ta so Jeruzalem

(Mat 21.1-11; Mak 11.1-11; Luk 19.28-40)

12Siw rum, raw sôwâ məni mbə kədan handay gi cer sôwâ Zuwif mə ɗe kə Pakə mun i Zezu wə mbə so Jeruzalem. 13Zə rum handay tum tlap məna' ɓay wur ta ndewa kə rumu. Handay do dana: «Mbra' hay' Ifraya! Ifray nə kuswa' swə məni mbə kə semɗe Bârî! Ifray nə kuswa' jwə sôwâ Israyel#Nye 118.25-26!» 14Zezu za' kor ɗaw, ɓay mum ur suk ta wa rum ce' ndə məni Dan rum wây' wə du ɗerwa:

15«So Siyoŋ, əŋ ne wəlok mi!

Əŋ kar ri'i: Jwə maŋ wə mba.

Mum suk wa vay koro#Zak 9.9.»

16Cop rum, sum ta zə Zezu cu mun zu dan rum mi, ama kəri məni Zezu ze wə ri mbra' Ifray, handay dla' wa dan məni Ɗerwa Ifray in dan rum wa rum kə kwa məni handay gi zə rumu. 17Sôwâ daŋ' məni ke kə Zezu kəri məni mum ɗe Lazar wə rawti zra ɓay car num mbə mar, handay in dan kwa məni handay we nə ne kə sôwâ. 18Raw sôwâ mun i mum gi yew rum, zə rum, handay mbə ndewa kə rumu. 19Kul sôwâ Zuwif mə ɗe kə Farisiyen in kuni mbok nji: «I kar ri', kwa daŋ' məni namba gi cu gak gi kwa məsin mi: Sôwâ daŋ' wə ta zə rumu!»

Sôwâ məsin wə du sôwâ Grek wə keɓ Zezu

20Sôwâ Grek məsin kəta' wə du sôwâ məni mbə so Jeruzalem kədan handay bur Ifray wə du cer rumu. 21Handay ta hay' Filip (mum suk wə so Betsayda nya Galile) ɓay la' ne numu: «Bârî, namba wə wa' kədan namba kar Zezu.» 22Filip ta in dan rum ne kə Andre, ɓay handay hoɓ jak faŋ ta in dan rum ne kə Zezu. 23Zezu ɗam vun ndaya: «Ri məni Vay sumra' wə də fe mbra' um nə mbə mgbaŋ ni nə si. 24Na in mi ne, kəzini: I u ɗaw la' cu nde ta nya ɓay cim mi si, mum suk kə ɗaw um sara. Ama mum la' cim mi si, mum də dlər i u rawa. 25Swə məni wə bə tu rum, bə rum də mara. Ama swə məni wə sî tu rum wa nya məni nə, bə rum də ke kə nyî mə də hâ#Mat 10.39; 16.25; Mak 8.35; Luk 9.24; 17.33. 26Swə la' wə wa' kədan mum gi sin zə rin si, say bə rum ta zə rini. Ndəna', bə sin man də ke wə ri məni na wə də ke han nə ta'a. Ba man wə sâ' swə məni wə gi sin zə rumu.»

Zezu in dan wa mar umu

27«Mgbaŋ ni nə, vunduk rin par nana. Ɓay na də in ma su? Na də ini: Bəba, a siɗ nan wə du boni məni wə də mbə wa rin kə ri rum su? Ama, na mbə kədan na ce boni wə du ri rumu. 28Bəba, a mbra' semɗe ru.» Kəri rum, wor car mbə wafray ini: «Na mbra' semɗe rin si, ɓay na də um mbra' kəreme.» 29Raw sôwâ məni gay' wə han ɓay mun wor nə, handay ini: «Dləmbur buŋô na!» Sôwâ məsin du nday ini: «Vay sin Ifray mə wafray in dan ne numu!» 30Ama Zezu la' ne ndaya: «Wor nə cu in dan mbə wə zə rin mi, ama wə zə ri. 31Mgbaŋ ni nə, ri məni Ifray wə də ɓok dan wa sôwâ nya məni nə mbə day si. Mgbaŋ ni nə, Ifray wə də 'way jwə nya məni nə də rəka. 32Ɓay mə na, kəri məni sôwâ də man rew də fray, na də gi sôwâ daŋ' mbə hay' rini.» 33(Kə in dan rum, mum ta' vari mar məni mum wə də mara.) 34Raw sôwâ ɗam vun rumu: «Namba mun wə du ɗerwa dan dlay mba i Kris də ke kə i də hâ. La' ndəna' si, gi ma ha gak in i sôwâ də rew Vay sumra' də fray su? Sa nə Vay sumra' nə su#Nye 110.4; Esa 9.6; Eze 37.25; Dan 7.14?» 35Zezu ɗam vun ndaya: «Ri mə ɓu gwa' wə du ri kə ri kî ɓo. I ta də kofo kə ri məni hi kəta' kə ri mə ɓu nə, kədan ri mə ura' nə mbə wa ri mi. Zə swə məni wə ta wə ri mə ura', bə rum cu we ri məni mum wə ta də han nə mi. 36Zə rum, i ve ri mə ɓu nə kəri məni hi kəta' kə rum, kədan hi faŋ sôwâ mə ri mə ɓu.»

Sôwâ Zuwif cu ve Zezu mi

Kəki məni Zezu in dan rum, mum 'ya ta pe' seŋ kə ndaya. 37Ko kəri məni mum gi yew juk wə kor nday, handay cu ve num mi, 38kədan nyen mbi dan məni bə ka' dan mə ɗe kə Esaya ini:

«Bârî, sa nə ve dan in mba su?

Bârî ta' gbəgboŋ ne kə sa su#Esa 53.1?»

39Handay cu gak ve num mi zə Esaya in wə ri məsin kəreme:

40«Ifray dəŋâr i nday,

ɓay mum co' wa nday,

kədan i nday weri mi,

ɓay vunduk nday mun zu dan mi.

Ɓay kədan handay faŋ mbə hay' rin

kədan na nday car mi.»

41Esaya in ndəna', zə mum we mbra' Zezu, ɓay mum in dan wa rumu. 42Kə ndi nə daŋ', sôwâ juk wə du sum rôwâ mə du sôwâ Zuwif ve Zezu. Ama handay cu in dan rum təlak mi, zə handay cu wa' i kul sôwâ Zuwif mə ɗe kə Farisiyen nday 'way wə rawti so Ifray sôwâ Zuwif də rəka mi. 43Handay wə wa' mbra' mə sôwâ pâ mbra' mə Ifraya.

Dan in Zezu wə də ɓok dana

44Zezu ka' dana: «Swə məni ve nan, bə rum cu ve nan taw mi, ama mum ve swə məni sin nan nə ta'a. 45Swə məni we nan, bə rum we swə məni sin nan nə ta'a. 46Mə na, na mbə wə du sôwâ nya ce' ndə ri mə ɓu, kədan sa su daŋ' məni ve nan, bə rum cu suk wə du ri mə ura' mi. 47Swə la' mun dan man ɓay cu ta zə dan rum mi si, na cu kə məni ɓok dan wa rum mi, zə na cu mbə kədan na ɓok dan wa sôwâ nya mi, ama kədan na nday siɗi. 48Swə məni vaɗ nan ɓay cu ve dan man mi, bə rum kə bə ɓok dan wa rumu. Dan man məni na in nə kə məni wə də ɓok dan wa rum kə bəka ndo' nya. 49Zə na cu in dan kə wa tu rin mi, ama Ba man məni sin nan, mum kə tu rum ne vari dan məni na gak in ɓay ta' nə ne nana. 50Ɓay na we si, dan dlay məni mum ne vari rum nə wə ne nyî mə də hâ. Zə rum, dan məni na in, na in ce' ndə məni Ba man ne vari rum ne nana.»

Currently Selected:

Zaŋ 12: KMN

Highlight

Copy