Matiye 17
17
Zezu faŋwa tu
(Mak 9.2-13; Luk 9.28-36)
1Kəki rum bəka kanki', Zezu tle Piyer, kə Zakə, ɓay njər rum Zaŋ ɓay ur ta wa i igway' məni mbuɗ kə ɗaw ndaya. 2Mum faŋwa tu rum kor ndaya: Vuk rum təŋ kə wəɗi ce' ndə fəta, ɓay mbraw um faŋ mə ɓu kep kepe. 3Kəki rum, sum ta zə rum mə hinji' we Moyizə kə Eliya wə ge dan kə Zezu. 4Zə rum, Piyer la' ne kə Zezu: «Bârî, ɓay kədan namba ke tira, ha la' wa' si, na də kaw jew hinji'i: Ɗaw zə ru, ɗaw zə Moyizə, ɓay ɗaw zə Eliya.» 5Kəri məni mum wə in dan in ɓo, dləmbur mə wəɗi mbə kəmbo' nday, ɓay wor car mbə du dləmbur ini: «Mə ni nə Vay man məni na ba, na tuk kəɗam kə rumu. I mun vun rumu#Tzk 22.2; Nye 2.7!» 6Kəri məni sum ta zə rum mun wor rum, wəlok gi nday juk, ɓay handay kuduk ta nya ɓay cin vuk ta nya. 7Zezu mbə hay' nday, ɗak nday ɓay la' ne ndaya: «I car fray ye! I ne wəlok mi!» 8Zə rum, handay ra' i nday də fray, ama handay cu we swə ɗaw mi, say Zezu.
9Kəri məni handay wə dam wa i igway' mbə nya, Zezu dlay nday kə gbəgboŋo: «I in dan kwa məni hi we nə ne kə swə ɗaw mi, hâ bəka məni Ifray də par Vay sumra' mbə mara.» 10Sum ta zə Zezu faŋ ci vun rumu: «Zə mi sum pay zu dan dlay wə in i say Eliya də mbə cop su#Mal 2.2-3?» 11Mum ɗam vun ndaya: «Kəzin', Eliya də mbə cop kədan mum gila' kwa daŋ'ŋ. 12Ama na in mi ne, Eliya mbə si, ɓay sôwâ cu we i mum na mi, ama handay gi kwa məni handay wa' wə tu rumu. Ndəna' ta' Vay sumra' kə tu rum də ce boni wə ɓa ndaya.»
13Kəri rum, sum ta zə rum mun i mum wə in dan wa Zaŋ-Baptistə nday ne.
Zezu 'way gam wa vay mə nji
(Mak 9.14-29; Luk 9.37-43)
14Kəri məni handay mbə day wə ri məni raw sôwâ wə han, swə ɗaw mbə hay' Zezu. Mum kuduk nya kor rumu: 15Ɓay swə nə la' ne numu: «Bârî, a we ca wa vay man ri'i: Mum kə gam wa rum, ɓay mum wə ce boni juk zə gam nə um pla' də ku ɓay də mbi sem rawa. 16Na mbə kə rum hay' sum ta zə ru, ama handay cu gak car num mi.» 17Zezu ɗam dan kə ini: «Hi na, hi sôwâ mə kə ô kî, ɓay sôwâ mə bro'o! Na də suk kə ri hâ day ka su? Na də reɗ vunduk rin wa ri hâ day ka su? I mbə nan kə vay nə tira.» 18Zezu dlay gam nə kə gbəgboŋ, ɓay gam nə pâ mbə wa vay nə, ɓay mum car kə ri rum sara.
19Zə rum, sum ta zə Zezu mbə hay' rum 'yeŋ ɓay ci vun rumu: «Zə mi namba cu gak 'way gam rum mi su?» 20Zezu ɗam vun ndaya: «Zə ô mi wə kî. Na in mi ne, kəzin', hi la' ve Ifray ko kî ce' ndə i mafo' si, hi gak la' ne kə i igway' mə tira: Əŋ 'ya mbə ti də kəna, ɓay ta də 'ya. Kwa mə pâ wa ri cu də ke mi. [21Ama kədan 'way gam mə nda nay' nə, say kə o Ifray kə saŋ kwa tawa.#17.21 Ri ɗerwa rum cu wə du ɗerwa məni wây' cem cem məsin kuni mi.]»
Zezu in dan wa mar um kə pâ mbə mar um kəreme
(Mak 9.30-32; Luk 9.43-45)
22Fəta məsin, sum ta zə Zezu daŋ' ɓawa nji wə nya Galile, Zezu la' ne ndaya: «Sôwâ də ar Vay sumra' də ɓa sôwâ məsin, 23handay də um ci, ama kəki bəka hinji', Ifray də um par mbə mara.» Sum ta zə rum ɗik dan juku.
Ci vun wa dan po' grama so po' fur sôwâ Zuwif
24Kəri məni Zezu kə sum ta zə rum mbə day kuni so Kapernawum, sum ɓawa grama so po' fur sôwâ Zuwif mbə hay' Piyer ɓay ci vun rumu: «Bə ta' kwa mi cu po' grama so po' fur sôwâ Zuwif mi su#Psi 30.13; 38.26?» 25Piyer ɗam vun ndaya: «Awo, mum pəpo'o.» Kəri məni Piyer ze ta rawti so, Zezu ci vun rum kə dan copo: «Simoŋ, ha ɗik ma su? Sa kuni wə po' "duwanə" kə po' grama ne kə jwə nya su? Daw nya nday su? Ko sôwâ rəkway su?» 26Piyer ɗam vun rumu: "Sôwâ rəkwaya." Zezu ɗam vun rumu: «La' ndəna' si, daw nya cu po' mi. 27Ama kədan namba ɗənok vunduk sôwâ məni kuni mi si, a də vun mbi, a də ge kəlek də mbi, ɓay a tle keve məni ha də kawvun kofo, a ar vun rum ɓay ha də za' səlay han ɗawa. Səlay rum də nde i po' grama mə na kə mə ha. A tle səlay rum, ɓay a də po' grama wa mba kə ndi.»
Currently Selected:
Matiye 17: KMN
Highlight
Share
Copy
Want to have your highlights saved across all your devices? Sign up or sign in
Le Nouveau Testament et Psaumes en Peve © Alliance Biblique du Tchad, 2014.
