Matiye 18
18
Swə mə toŋ wə jwə Ifraya
(Mak 9.33-37; Luk 9.46-48)
1Kəri rum, sum ta zə Zezu mbə hay' rum ɓay ci vun rumu: «Sa nə də suk toŋ wə ri məni Ifray wə də suk jwə wa sôwâ um nə su?» 2Zezu ɗe vay nyêw ɓay cin um kor nday, 3ɓay la' ne ndaya: «Na in mi ne, kəzin', hi la' cu faŋwa kwa gi mi kədan hi faŋ ce' ndə dawre' mi si, hi cu də ze wə ri məni Ifray də suk jwə wa sôwâ um nə mi. 4Swə mə toŋ wə ri məni Ifray wə də suk jwə wa sôwâ um nə kə swə məni wə hom tu rum ɓay wə faŋ ce' ndə vay nyêw məni na. 5Ɓay swə məni ve vay nyêw ce' ndə vay məni nə zə semɗe rin, bə rum ve nana.»
Dan ɓu sôwâ nde du kwa mə bro'o
(Mak 9.42-48; Luk 17.1-2)
6«Swə məni ɓu vay nyêw ɗaw du daw məni ve nan kuni nde du kwa mə bro', pram sôwâ jew gway' vəna jewre bə rum ɓay tle num ge də ya mbi. 7Kəcik zə sôwâ nya, zə kwa məni wə ɓu sôwâ njay du kwa mə bro' kəta' wə hana! Swə cu gak tak kwa rum mi, ama kəcik zə swə məni mbə kə kwa ɓu rumu! 8Ɓa ru ko sem ru la' wû ɓu kədan ha nde du kwa mə bro' si, a hay nday ye, ɓay a pik nday də rəka seŋ kə ru! Pram zə ru kədan ha də ke kə nyî mə də hâ so Ifray kə rəɓo ko kə lem pâ məni ha də ke kə ɓa mə hoɓ, kə sem mə hoɓ ɓay də ze ri ku məni cu mar i mi kə ndi nə si. 9Ɓay i ru la' wû ɓu kədan ha nde du kwa mə bro' si, a par ye, ɓay a ɗâ də rəka seŋ kə ru, pram zə ru kədan ha də ke kə nyî mə də hâ kə i mə ɗaw pâ məni ha də ke kə i mə hoɓ ɓay də ze ri ku kə ndi nə si#Mat 5.29.»
Dan mə gəgan wa cime məni vi'i
(Luk 15.3-7)
10«I kaw wa ri kədan i jeɗ vay nyêw ɗaw du daw mə ni kuni mi, zə na in mi ne, sum sin Ifray mə wafray məni wə nday ji wə car kor Ba man mə wafray bəka daŋ'ŋ. [11Zə Vay sumra' mbə kədan mum siɗ sôwâ məni vi'i#18.11 Ri ɗerwa rum cu wə du ɗerwa məni wây' cem cem məsin kuni mi..]
12Hi ɗik ma su? Swə la' kə cime kis si, ɓay ɗaw du nday vi', bə rum cu də ar cime mə gu cefaɗew wa cefaɗew məsin wa ɗol kədan mum 'ya də keɓ cime məni vi' nə mi su? 13Na in mi ne: Mum la' za' cime rum si, mum də tuk kəɗam juk wa rum pâ mə gu cefaɗew wa cefaɗew məni cu vi' mi kuna. 14Ndəna' ta', Ba mi mə wafray cu bə i vay ɗaw du daw məni kuni nə vi' mi.»
Vay ba wû məni gi kwa mə bro' hay' ru
15«Vay ba wû la' gi kwa mə bro' hay' ru si, a də hay' rum, ɓay a ta' kwa mə bro' um ne numu. Ama a də hay' rum kə ɗaw ru. Mum la' mun vun ru si, ka ha siɗ vay ba wû#Luk 17.3. 16Ama mum la' cu mun vun ru mi si, a ɗe sôwâ məsin ɗaw ko hoɓ kə ru kərem kədan dan tum sem rum daŋ' nə də car kə vun sum we njeŋ dan rum hoɓ ko hinji' ce' ndə məni Ɗerwa Ifray ini. 17Ama mum la' cu mun vun nday mi si, a in dan rum ne kə kul sôwâ məni ve Kris mə ri rum, ɓay mum la' cu mun vun nday mi si, a kar num ce' ndə swə mə dan we Kris ko ce' ndə bə ɓawa kwa.»
Kwa məni hi wə tak kə kwa məni hi wə ar vari rumu
18Na in mi ne, kəzini: Kwa daŋ' məni hi jew dan rum wa nya, də jew wafray ta', ɓay kwa daŋ' məni hi ulay' wa nya, də ulay' wafray ta'a.
19«Na in mi ne ta', sôwâ hoɓ du ri wa nya la' kawvun kədan handay o kwa mi su daŋ' wə du o Ifray nday, mum də nday ne kwa rumu. 20Zə wə ri məni sôwâ hoɓ ko hinji' wə ɓawa kə semɗe rin, na kəta' wə du ndaya.»
Dan mə gəgan wa bə sin mə dan we ca
21Kəri rum, Piyer mbə hay' Zezu ɓay ci vun rumu: «Bârî, vay ba man la' wə gi kwa mə bro' hay' rin si, na də vrum kwa mə bro' um sem ma dak su? Sem seɗa' su?» 22Zezu ɗam vun rumu: «Cu sem seɗa' taw mi, ama hâ day sem guseɗa' vun nyem seɗa'a#Luk 17.3-4.» 23Zə rum, vari məni Ifray wə də suk jwə wa sôwâ um nə ra' nji kə dan jwə məsin məni wa' kədan mum kar bal səlay um məni wə ɓa sum sin umu. 24Kəri məni mum təŋ kə kar bal səlay rum, sôwâ mbə hay' rum kə swə məni ti bal um səlay mbu guɓ rawa. 25Swə nə cu kə kwa məsin kədan mum po' bal rum kə ndi mi, zə rum, bârî um ne vari ne kə sôwâ kədan kuni coɓ num ce' ndə bek, ɓay coɓ ma rum kə daw um ɓay kwa daŋ' məni mum kə ndi kədan po' bal rumu. 26Bə sin nə kuduk nya kor bârî um ɓay o numu: A reɗ vunduk ru wa rin ri', na də wû po' cete! 27Bârî nə ci' ca wa bə sin rum, mum vrum dan bal um ɓay ar num 'ya.
28«Bə sin nə pâ ɓay ta ndewa kə bây sin um məni ti bal um səlay kis, mum kaw jewre rum ɓay təŋ kə um kô'o. Mum la' ne numu: A po' bal mana! 29Bây sin um nə kuduk nya kor rum ɓay o numu: A reɗ vunduk ru wa rin ri', na də wû po'o! 30Ama mum cu mun mi, zawa, mum ge num ta so daŋgay' hâ ka mum po' bal rum si. 31Kəri məni sum sin məsin we kwa məni gi ndəna', handay ɗik dan dle tu si, ɓay handay ta in dan rum daŋ' ne kə bârî ndaya. 32Zə rum, bârî nə ɗe bə sin nə ɓay la' ne numu: Ha bə sin mə bro', na vrum dan bal wû cet, zə ha o nan kədan na gi ndəna'a. 33Ha ta', kəzə ha we ca wa bây sin wû ce' ndə məni na we ca wa ru. 34Bârî nə tle bak juk, ɓay mum sin bə sin nə ta so daŋgay' kədan mum ce boni han hâ ka mum po' bal um nə si cete.» 35Ɓay Zezu ndo' vun dan rum kə ini: «Ba man mə wafray də gi ndəna' hay' swə ɗaw ɗaw daŋ' du ri, ha la' cu vrum kwa mə bro' məni vay ba wû wə gi hay' ru kə vunduk ru daŋ' mi si na.»
Currently Selected:
Matiye 18: KMN
Highlight
Share
Copy
Want to have your highlights saved across all your devices? Sign up or sign in
Le Nouveau Testament et Psaumes en Peve © Alliance Biblique du Tchad, 2014.
