Kwidika 17
17
Menji akufuma mwilola
1Chipompelu chejima chawanyana kaIsarela chendeli munjila yawu, afumini muchinkalampata chaSini, hamateeku awu hamateeku awu, mwomwayilejeliyi Yehova, atuŋili chiimba chawu muRefwidimi. Kwadiŋi kwosi menji akunwa antuku.
2Antu amuzuŋesheli Mosi, nawu, Twinki menji kulonda tunwi. Mosi wayilili nindi, Mukunzuŋesheladi? #Kuhit 6:16; Mas 78:41Mukumwesekeladi Yehova?
3Antu kwenoku atiyili mpwila yamenji; antu amutobeleli Mosi, nawu, Watufumishililidi muEjipitu, walondeli kutujaha ninetu nianyanetu niyimuna yetu nampwila?
4Mosi wabileleli kudi Yehova, nindi, Awa antu nukuyila ŋahi? Keŋa aŋasi malola.
5Yehova wamwilili Mosi, nindi, Hitaku kumbidi yawantu, hitulaku niakulumpi awaIsarela, wusendi muchikasa cheyi #7:20nimukombu weyi wenowu weteli nachu kaloŋa, wuyi.
6Tiyaku, ami nukwimana hohana helola dakuHorebi kumesu eyi, eyi #Mas 78:15; 105:41; 1 Kor 10:4waketa ilola, mwakedika menji, kulonda antu akanwi. Dichi cheliliyi Mosi kumesu awakulumpi awaIsarela.
7Kwenoku watumbiluku ijina nindi, KuMasa, cheŋi nawa nindi, KuMeriba, nanochu chamuzuŋesheluwu anyana kaIsarela, nanochu chamwesekeluwu Yehova, nawu, Yehova tudi nindi mukachi ketu, tahindi nehi?
Chayifwomwenuwu aAmaleki
8Henohu dihenjiluwu #Kutach 36:12; Kuch 24:20; Kuhit 25:17; 1 Sam 15:3Amaleki, hiyakulwa nawaIsarela muRefwidimi.
9Mosi wamwilili Yoshuwa, nindi, Tutondenu amayala, wuyi wakalwi nawaAmaleki; kumadiki ami nakemana hewulu dampidi namukombu waNzambi muchikasa chami.
10Dichi Yoshuwa welili mwamulejeliyi Mosi, walwili nawaAmaleki; aMosi, naAroni, naHuri akandukili hewulu dampidi.
11Cholweliyi Mosi chikasa chindi kwiwulu, aIsarela emikili mushindu, chalepwiliyi chikasa chindi kwishina, Amaleki niwena emikili mushindu.
12Ilaŋa makasa aMosi alemeni; dichi anoneni ilola, amushililidu kwishina, washakaminuhu; Aroni naHuri amukwatilili makasindi kwiwulu, iwu mbadiyi, iwu mbadiyi; makasindi akola nikukola nakushika nihaholokeli itaŋwa.
13Yoshuwa wazeyesheli Amaleki niantu indi nawumwemu wampoku yakabali.
14Yehova wamwilili Mosi, nindi, Chumichi chisoneki mumukanda kulonda kwanuka nachu, wumuhitulukilumu Yoshuwa achitiyi; muloŋa ami namba kayijilumuna ji-i chikupu Amaleki mwishina dewulu, hiyamba kayanuka nawa cheŋuku.
15Mosi watuŋili kameŋa kakulambwila, hakutumbahu ijina, nindi, Yehova Diyi Mpandelu Yami.
16Muloŋa welili nindi, Yehova nasanyiki dehi, nindi Yehova wakalwa njita nawaAmaleki kumakiŋu ejima.
Currently Selected:
Kwidika 17: MWW04
Highlight
Share
Copy
Want to have your highlights saved across all your devices? Sign up or sign in
The Holy Bible in Lunda Ndembu © United Bible Societies, 2003.
