Kwidika 25
25
Nyilambu yaTabanaka
(Kwi 35:4-9)
1Yehova wahosheli naMosi,
2nindi, Kaleji anyana kaIsarela, anleteli mulambu wami, mwakantambwili mulambu kudi antu ejima anatiyi kuwaha kunyinka.
3Tiya mulambu wuwakatambula kudi wena, niwuru, nisiliva, niwuneŋu,
4niwanda wawuzeeli, niwawusombu, niwanda wuchinana nge-e, niwanda wawuwahi, nimavuji ampembi;
5niyitembi yanyikoku yayizamba, yakuloomba wulombu wuchinana, niyitembi yayikayi, ninyitondu yanyizenzi,
6nimanji enoŋu, ninyitondu yanunka mavumba amawahi yakwila nachu manji akuwayisha nachu, niyakwila nachu insensi yevumba dadiwahi;
7nitumalola twiyila, nitumalola twakupata chachiwahi mwifwodi, nimuchibwiiku chakuvwala hantulu.
8Akantuŋili malala, kulonda nishakami mukachi kawu.
9Mwejima munukukuleja, #Yil 7:44; Heb 8:2, 5muchesekelu chaTabanaka, nimwakwesekela yuma yejima yikwikalamu, dimu mumwakatuŋila.
Chimbaŋu
(Kwi 37:1-9)
10Akatuŋi chimbaŋu chamutondu wamuzenzi; mukuleha kwachu mita yimu, mukutoha kwachu mita 0.7, mukuzandama kwachu mita 0.7.
11Wakachibuti #Heb 9:4muwuru wakoseka to-o, wakachibuti nimukachi nihanzi, wakatuŋiluhu hewulu mukinkita wawuru kwi-ndo.
12Wakawumbi tuzeya twachu twawuru tuwana, wakatushili munyendu yachu yiwana, tuzeya tuyedi twakekali hakabavu kamu, tuzeya tuyedi hakabavu kakwawu.
13Wakasoŋi nyikambu yiyedi yanyitondu yanyizenzi, wakayibuti muwuru.
14Wakaloŋi nyikambu mutuzeya mumbavu jachimbaŋu, kulonda kutembeka nachu chimbaŋu.
15Nyikambu yakashakami mutuzeya twachimbaŋu; bayi akayifumisha kwokuku.
16Wakashi #Heb 9:4muchimbaŋu Malola aWunsahu inakakwinka.
17Wakatuŋi itanda daluwi dawuru wakoseka to-o, mukuleha kwadu mita yimu, mukutoha kwadu mita 0.7.
18Wakeli akerubi awuru ayedi; wakayichilili kunsa jiyedi jetanda daluwi.
19Wakeli kerubi wumu kunsa yimu, kerubi wumu kunsa yikwawu; mwakachili wuru wumu hohu niitanda daluwi niakerubi kunsa jadu jiyedi.
20Akerubi akatanjiki mpuula jawu hewulu, nakubuta #Heb 9:5hetanda daluwi nampuula jawu, akaditali mesu awu, mesu awakerubi akatali hetanda daluwi.
21Wakashi itanda daluwi hewulu dachimbaŋu, muchimbaŋu wakashumu Wunsahu wunakakwinka.
22Hewulu detanda daluwi, hakachi kawakerubi ayedi adi hewulu dachimbaŋu chaWunsahu, dihu hinakabulakenaŋa naneyi, hinakahanjekelaŋa naneyi nakutena yuma yejima yinakakwinka yakuleja anyana kaIsarela.
Mesa
(Kwi 37:10-16)
23Wakatuŋi mesa yamutondu wamuzenzi, mukuleha kwachu mita yimu, mukutoha kwachu mita 0.5, mukuzandama kwachu mita 0.7.
24Wakachibuti muwuru wakoseka to-o, wakatuŋiluku mukinkita wawuru kwi-ndo.
25Wakatuŋiluku nimwowelu kwi-ndo wakweseka muchikasa chakusamanesha, kunsa yamwowelu wachu wakatuŋiluku mukinkita wawuru kwi-ndo.
26Wakeli tuzeya twachu twawuru tuwana, wakashi tuzeya hamawombu awana adi kunyendu yachu yiwana.
27Tuzeya twakekali kwakwihi namwowelu kulonda hawushilu wanyikambu yakutembekela mesa.
28Nyikambu wakayili nanyitondu yanyizenzi, wakalamikuhu wuru, kulonda akasendi nachu mesa.
29Wakeli niyeŋa yachu, nitutuwa twachu, ninyilondu yachu, nimbashila jachu, kulonda kuhuŋujola nachu; wakayili nawuru wakoseka to-o.
30Wakanshili kumesu ami hamesa mafuku ejima, mankendi akutenteka kumesu aNzambi.
Inoŋu
(Kwi 37:17-24)
31Wakeli inoŋu dawuru wakoseka to-o, akadichila dakuchila, niitanda dadu dakwimena, niishina dadu, nimpasa jadu, nimahumba adu, ninkenu jadu, jejima jakuchila nawuru wumu hohu.
32Hambadi jadu hakediki nyitayi yitanu nawumu, nyitayi yisatu yenoŋu kumbadi yimu, nyitayi yisatu yenoŋu kumbadi yikwawu;
33akeli mpasa jafwana neyi nkenu jamutondu waamondi, jisatu kumutayi wumu, niihumba ninkenu; akeli nimpasa jafwana neyi nkenu jamutondu waamondi, jisatu kumutayi wukwawu, niihumba ninkenu; chochenochu dichu chakelawu nanyitayi yitanu nawumu yikwidika mwinoŋu.
34Mwinoŋu mwakelilumu mpasa jiwana jafwana neyi nkenu jamutondu waamondi, nimahumba aju, ninkenu jaju.
35Ihumba dimu kwishina danyitayi yiyedi, ihumba dimu kwishina danyitayi yiyedi, ihumba dimu kwishina danyitayi yiyedi, yanyitayi yitanu nawumu yikwidika mwinoŋu.
36Nimahumba ninyitayi yakekali nawuru wowumu hohu nenoŋu; dejima mudakumina dakuchila hohu, dawuru wakoseka to-o.
37Wakeli nimanoŋu adu, atanu nayedi; akabutuli manoŋu adu kulonda kutoŋeka chejeji kudidi.
38Ninzamba jawu, nituyeŋa twawu twakujima nachu, twakekali twawuru wakoseka to-o.
39Akadituŋi niyumiyi yejima na34 kg yawuru wakoseka to-o.
40Shinshikaku wakeli mwejima mwaya #Heb 8:5chifwikija chayu chiyakulejeluwu hampidi.
Currently Selected:
Kwidika 25: MWW04
Highlight
Share
Copy
Want to have your highlights saved across all your devices? Sign up or sign in
The Holy Bible in Lunda Ndembu © United Bible Societies, 2003.
