Kwidika 5
5
Matafwali akadi matahu akukolesha nachu
1Kufuma henohu aMosi naAroni eŋilili mwadiŋiyi Fwaro, amwilili nawu, Tiya chanahoshiyi Yehova, Nzambi yaIsarela, nindi, Yileki antu ami ayi akadyi chawija chami muchinkalampata.
2Fwaro welili nindi, Yehova hinyi mwaka nitiyi mwizu dindi, ninzi niyumbuku aIsarela? Ami hinamwiluka Yehovaku, niaIsarela hinakayumba kwamuku.
3Nawu, Nzambi yawaHeberu tunadimoni nindi. Atuleki mwani, tuyi njila yakwenda mafuku asatu muchinkalampata, twakamuketwili Yehova Nzambi yetu yimuna, mukunkulwayi wakatuletela chipupu indi kwiji njita.
4Mwanta waEjipitu wayilili nindi, Enu aMosi naAroni, muloŋanyi munayifumishi antu kunyidimu yawu? Yenu mwakasendi yisenda yenu.
5Fwaro nindi, Komana, antu amwituŋa anavuli dehi, ninenu himukuyinookesha kuyisenda yawu.
6Ifuku dodenodu Fwaro walejeli atulala twawantu, nitupitawu twawu,
7nindi, Bayi muyinka cheŋi antu matahu akwila nachu matafwali neyi chimwelaŋa dikaluku. Ayi akadikuŋwili awenawu matahu awu.
8Mwakayesekelaŋa chikonkwanyi chamatafwali mwomwelilaŋawu nachikonkwanyi chamatafwali chatachi; bayi muchikeheshaku; komana akatala; dichi chakudililawu, nawu, Tulekenu tuyi twakamuketwili Nzambi yetu yimuna.
9Yivulishilenu amayala nyidimu yawu, kulonda akabakani nayu, kulonda abuli kutiyilila mwaya mazu akutwamba.
10Atulala twawantu, niatupitawu twawu, edikili hanzi, ahosheli nawantu nawu, Tiyenu chanahoshiyi Fwaro, nindi, Hinukuyinka matahuku.
11Nindi, Yenu enu aweni mwakakeŋakeŋi matahu enu kumunayiwani kwoku, ninyidimu yenu hiyakayikeheshaku.
12Nochu antu amwaŋeli mwahita ituŋa daEjipitu dejima nakukuŋula ntotu afwanishi neyi matahu.
13Atulala ayihindesheli, nawu, Manishenu nyidimu yenu mwomweseka yikonkwanyi yenu, neyi chimwelilaŋa himwadiŋi namatahu.
14Ayeteli atupitawu twawanyana kaIsarela twashililuwu tulala twaFwaro kuyitala, ayihwili nawu, Indi yikonkwanyi yenu yamatafwali, nichahaloshi, nichalelu, munayikaŋenyidi kuyimanisha neyi chimwelilaŋa hakusambila?
15Atupitawu twawanyana kaIsarela ayili nakudila kudi Fwaro, nawu, Muloŋanyi wunatwili chenichi etu ambuŋeyi?
16Etu ambuŋeyi hiyanatwinki matahuku, hiyakutwila nawu, ilenu matafwali, ninetu ambuŋeyi anatweti; ilaŋa antu eyi diwu anatamishi, bayi etuku.
17Yena welili nindi, Enu mwasweja kukatala nankashi, dichi chimwelaŋa nenu, Tuleki tuyi twakamuketwili Yehova yimuna.
18Yenu kwenu mwakakalakali; matahu hiyakayinkawuku, nichikonkwanyi chamatafwali chiŋa muchimanisha hohu.
19Cheliluwu nawu, Bayi mukeheshaŋa matafwali enuku, chiŋa ifuku nichikonkwanyi chadu, ifuku nichikonkwanyi chadu, atupitawu twawanyana kaIsarela amweni chinatami dehi.
20Chafuminuwu mwaFwaro ayibulakeni aMosi naAroni, anemani munjila,
21ayilili nawu, Yehova ayitali, asompeshi, muloŋa munatununkishi dehi chatama nikudi Fwaro nikudi ambuŋindi, munayishili mumakasawu mpoku yakabali yakutujaha nachu.
Nzambi hakuyikana kuyikuula muwuduŋu
22Mosi wafuntili cheŋi kudi Yehova, welili nindi, Eyi Mwanta, awa antu wunayikoŋelidi chatama? Wantemesheladi?
23Saŋa nenjila kudi Fwaro nakuhosha mwijina deyi, yena kwakuyikoŋa awa antu chatama hohu; hela kuyipulwisha antu eyi hiwunayipulwishi nihantuku.
Currently Selected:
Kwidika 5: MWW04
Highlight
Share
Copy
Want to have your highlights saved across all your devices? Sign up or sign in
The Holy Bible in Lunda Ndembu © United Bible Societies, 2003.
