Kwidika 6
6
1Yehova wamwilili Mosi nindi, Ichi dinu wukumona chinukumwila Fwaro; wakayumbaku nachikasa chaŋovu hohu, wakayitemuna chakuyitemuna mwituŋa dindi nachikasa chaŋovu hohu.
2Nzambi wahosheli naMosi, wamwilili nindi, Ami Yami YEHOVA.
3Chinadimwekesheli kudi Abarahama, nikudi Isaka, nikudi Yakoba, nadimwekesheli neyi Nzambi Chinyaweji, ilaŋa hinadimwekesheli nejina dami daYehovaku.
4Natiyaŋeni nawu #Kutach 12:7; 15:18; 26:3-4; 28:4, 13chitiyaŋenu chami, nami nakayinka ituŋa daKenani, dodituŋa dazonkamenuwu, mwomu mwashakaminuwu chawenyi.
5Natiyi nichakwabawu anyana kaIsarela anakakejuwu aEjipitu muwuduŋu. Ami nanuki chitiyaŋenu chami.
6Dichi wukuhosha nawanyana kaIsarela, neyi, Yehova nindi, Ami yami Yehova, kuyisenda yawaEjipitu nakayifumishaku, nakayamwina kuwuduŋu wawu, nakayikuula nachikasa chakwolola, nakusompesha kwakweni kweneni hohu;
7nakayitambula mwakekala antu ami, ninami nakekala Nzambi yenu; mwakeluka nenu, ami yami Yehova Nzambi yenu wayifumishili mukusenda yisenda yawaEjipitu.
8Nakayitwala #Yosh 24:13; Mas 136:21-22mwituŋa dinasanyikilili Abarahama, naIsaka, naYakoba nami nakayinkadu, nakayinkadu denu, dakekala wuswana wenu; ami yami Yehova.
9Mosi wayilejeli anyana kaIsarela mwenomu, ilaŋa wena kwawu kumutiyilila Mosi nehi, muloŋa munyichima yawu jinayikumi dehi, nawuduŋu wawu wawukátu.
10Yehova wamwilili Mosi,
11nindi, Iŋilaku wuhoshi namwanta waEjipitu Fwaro, neyi, Yileki anyana kaIsarela afumi mwituŋa deyi.
12Mosi wahosheli kumesu aYehova, nindi, Yowe-e! Neyi anyana kaIsarela kuntiyilila nehi, indi Fwaro wakantiya mwaakanyi, ami nikweti kanwa kawudima!
Yisaka yaMosi naAroni
13Yehova wahosheli naMosi naAroni, wayinkeli mudimu wakuhosha nawanyana kaIsarela, niwakuhosha namwanta waEjipitu, Fwaro, wakuyifumisha anyana kaIsarela mwituŋa daEjipitu.
14Tiyenu atulamba akumavumu awu; anyana kaRubeni amayala, wedi waIsarela, iwu Hanoki, iwu Palu, iwu Hezeroni, iwu Karami, diyi yisaka yaRubeni.
15Anyana kaSimeyona amayala, iwu Yemuweli, iwu Yamini, iwu Ohadi, iwu Yakini, iwu Zohari, iwu Shawulu mwana kamumbanda wamuKenani, diyi yisaka yaSimeyona.
16Tiyenu majina awanyana kaLevi amayala mwomwavwalikililuwu, iwu Gereshoni, iwu Kohati, iwu Merari. Nyaka yahandiliyi Levi yashikili munyaka nkulakaji namakumi asatu nayitanu nayiyedi (137).
17Anyana kaGereshoni amayala, iwu Libini, iwu Shimeyi, mwomwekalila yisaka yawu.
18Anyana kaKohati amayala, iwu Amarama, iwu Izihari, iwu Heberoni, iwu Uziyeli. Nyaka yahandiliyi Kohati yashikili munyaka nkulakaji namakumi asatu nayisatu (133).
19Anyana kaMerari amayala, iwu Mahili, iwu Mushi. Diyi yisaka yawaLevi mwavwalikililuwu.
20Amarama wasumbwili Yokebedi muhelatata yindi, wamuvweleli niAroni niMosi. Nyaka yahandiliyi Amarama yashikili munyaka nkulakaji namakumi asatu nanyaka yitanu nayiyedi (137).
21Anyana kaIzihari amayala, iwu Kora, iwu Nefwegi, iwu Zikiri.
22Anyana kaUziyeli amayala, iwu Mishayeli, iwu Elizafwana, iwu Sitiru.
23Aroni wasumbwili Elisheba, mwana kaAminadabi, muhelaNahashoni; yena wamuvweleli iwu Nadabi, iwu Abihu, iwu Eleyazari, iwu Itamari.
24Anyana kaKora amayala, iwu Asiru, iwu Elekana, iwu Abiyasafwi; diyi yisaka yawaKora.
25Mwana kaAroni Eleyazari hadi anyana kaPutiyeli awambanda wasumbwiluhu wumu; yena wamuvweleli Fwinehasi. Awa diwu atulamba ahadi aLevi mwomwekalila yisaka yawu.
26Diwu wowu Aroni naMosi alejeliyi Yehova, nindi, Yifumishenu anyana kaIsarela mwituŋa daEjipitu, hayendu yawu, hayendu yawu.
27Diwu ahosheli naFwaro, mwanta wakuEjipitu, kulonda ayifumishi anyana kaIsarela muEjipitu; diwu wowu aMosi naAroni.
Aroni hakumuhoshelaku Mosi
28Chelili hefuku dahosheli Yehova naMosi mwituŋa daEjipitu,
29Yehova wahosheli naMosi, nindi, Ami yami Yehova; mwejima munakahosha naneyi dimu wakahosha naFwaro mwanta wakuEjipitu.
30Mosi wahosheli kumesu aYehova, nindi, Yowe-e! Ami #4:10hinatweshi kuhosha chalumbulukaku! Fwaro wakantiya mwaakanyi!
Currently Selected:
Kwidika 6: MWW04
Highlight
Share
Copy
Want to have your highlights saved across all your devices? Sign up or sign in
The Holy Bible in Lunda Ndembu © United Bible Societies, 2003.
