Kwidika 7
7
1Yehova wamwilili Mosi, nindi, Tala, nakubalumuni wikali neyi Nzambi kudi Fwaro, nimanakweyi Aroni wakekala kaprofwetu keyi.
2Wakahoshi mwejima munakakuleja; nimanakweyi Aroni akahoshi naFwaro, akamwili nindi, Yileki anyana kaIsarela afumi mwituŋa deyi.
3Ami nakachinchikisha muchima waFwaro, nakavulisha yinjikijilu yami nayihayamisha yami mwituŋa daEjipitu.
4Fwaro kwindi hakayitejaku, ninami nakakwata chikasa chami hetuŋa daEjipitu, nakedishamu yendu yawantu ami, anyana kaIsarela, nakayidisha mwituŋa daEjipitu nakusompesha kwakweni kwabadika.
5Chinakolola chikasa chami hetuŋa daEjipitu nakwidishamu anyana kaIsarela mukachi kawu, aEjipitu akeluka nawu ami yami Yehova.
6Mosi naAroni elili mwenomu. Mwomwayilejeliyi Yehova dimu mweliluwu.
7Nyaka yaMosi yashikili mumakumi atanu nasatu (80), nyaka yaAroni yashikili mumakumi atanu nasatu nayisatu (83), hahosheluwu naFwaro.
Mukombu waMosi, hiwukubalumuka hikapela
8Yehova wahosheli naMosi naAroni,
9nindi, Chakayihoshayi Fwaro, nindi, Nlejenu chihayamisha chenu, eyi wakamwili Aroni, neyi, Nonaku mukombu weyi, wuwunati hamaseki kumesu aFwaro kulonda wubalumuki kapela.
10Mosi naAroni eŋilili mwadiŋiyi Fwaro, elili mwomuna mwayilejeliyi Yehova; Aroni wanatili mukombu windi hamaseki kumesu aFwaro, nikumesu awambuŋindi, wabalumukili kapela.
11Fwaro niyena watambikili niakwamaana niakwakupanda, wowu #2 Tim 3:8-9atutepa amuEjipitu, niwena nawa elili mwomumu nawaŋa wawu.
12Wejima wawu anatili nyikombu yawu hamaseki, yabalumukili tupela. Ilaŋa mukombu waAroni waminyini nyikombu yawu.
13Muchima waFwaro wadikaŋili, #v4hayitejeluku, mwomwahosheliyi Yehova.
Chipupu chamashi
14Yehova wamwilili Mosi, nindi, Muchima waFwaro wunadikaŋi mbe, kwonti kwindi kuyileka antu.
15Wakayi kudi Fwaro habudidi, wakamuwana wudi nakuya kukaloŋa, wakemani kuchikumu chakaloŋa kulonda wakabulakani nindi, wakakwati muchikasa cheyi #4:2-3mukombu wabalumukili kapela.
16Wakamwili neyi, Yehova, Nzambi yawaHeberu, nantemeshi kudeyi, nindi, Yileki antu ami ayi akankalakeli muchinkalampata; hakwila eyi nihanu kwiteja nehi.
17Tiya chanahoshiyi Yehova, nindi, Tiya chuma chiwakeluka nachu neyi ami yami Yehova, ami nukweta menji adi mukaloŋa namukombu wudi muchikasa chami, akubalumuka mashi.
18Anshi adi mukaloŋa akufwa, nikaloŋa kakununka chatama, niaEjipitu akutiya kutama nankashi kunwa menji amukaloŋa.
19Yehova wamwilili Mosi, nindi, Mwili Aroni neyi, Sendaku mukombu weyi, wololi chikasa cheyi hamenji amuEjipitu, nihatuloŋa twawu twamaneni, nihatuloŋa twawu twanyanya, nihamajiya awu, nihayibweti yawu, kulonda abalumuki mashi; mwejima mwahita ituŋa daEjipitu mukwikala mashi hohu, nimujinsaba nimujinswaha.
20Mosi naAroni elili mwayilejeliyi Yehova; yena wanoneni mukombu, weteli menji adiŋi mukaloŋa kumesu aFwaro, nikumesu awambuŋindi; menji ejima adiŋi mukaloŋa abalumukili #Mas 78:44; 105:29mashi.
21Anshi adiŋi mukaloŋa afwili, kaloŋa kanunkili chatama, aEjipitu hiyatwesheli kunwa menji amukaloŋaku; mwejima mwahitili ituŋa daEjipitu mwadiŋi kwamashi hohu.
22Atutepa amuEjipitu niwena elili chochimu nawaŋa wawu; muchima waFwaro wachinchikili, hayitejeluku, mwomu mwahosheliyi Yehova.
23Fwaro wabalumukili, weŋilili mwitala dindi, hela chumochu hachishili kwindi kumuchimaku.
24AEjipitu ejima asempeli kwakwihi nakaloŋa kulonda akamoni menji akunwa, muloŋa menji amukaloŋa hiyatwesheli kuyinwaku.
25Mwahitili mafuku atanu nayedi nanohu heteliyi Yehova kaloŋa.
Currently Selected:
Kwidika 7: MWW04
Highlight
Share
Copy
Want to have your highlights saved across all your devices? Sign up or sign in
The Holy Bible in Lunda Ndembu © United Bible Societies, 2003.
