Kutachika 42
42
AnakwaYosefu hiyakuya kuEjipitu
1Yakoba watiyili nawu muEjipitu mudi tidiku. Yakoba wayilili anyanindi, nindi, Mudi nakuditaladi?
2Nindi, Ami natiyi nawu muEjipitu mudi tidiku. Yenuku mwakatulandili, twakahandi, twakabuli kufwa.
3AnakwaYosefu ikumi dawu ayili kuEjipitu akalandi tidiku.
4Ilaŋa Benjamini, mwanyikaYosefu, Yakoba hamutemesheli hamu nawanakwinduku, nindi, Chuma chatama chakamba kamuwana.
5Anyana kaIsarela ayili nakulanda hamu nawakwawu ayiluku, muloŋa nzala yadiŋi mwituŋa daKenani.
6Yosefu diyi wadiŋi mulopu wetuŋa; yena diyi wadiŋi nakulandisha kudi antu ejima amwituŋa. AnakwaYosefu ashikili, amubandaminini mahamawu hamaseki.
7Yosefu wamweni anakwindi, wayilukili, wadimwekesheli kudi wena neyi himuntu wacheŋi, wahosheli nawu chakola hohu, wayilili nindi, Enu munafumi kudihi? Nawu, Tunafumi mwituŋa daKenani, tunenzi nakulanda kudya.
8Yosefu diyi wayilukili anakwindi ilaŋa wena hiyamwilukili yenaku.
9Yosefu waanukili mwayiloteleliyi, hakuyila nindi, Enu muyakwakwendesha ituŋa; munenzi nakutala ituŋa chididi dakubula kukiŋewa.
10Wena hiyakumwila nawu, Nehi mwanta, etu ambuŋeyi tunenzi nakulanda kudya.
11Wejima wetu tuyanyana kamuntu wumu, tuyantu alala, etu ambuŋeyi hitunenzi nakwendesha ituŋaku.
12Hakuyila nindi, Nehi, chimunenjili munalondi kutala ituŋa chididi dakubula kukiŋewa.
13Wena nawu, Etu ambuŋeyi twekala amayala ikumi nayedi (12), tuyanyana kamuntu wumu hohu wamwituŋa daKenani; kabinda ketu wudi kwatata yetu, mukwawu wachanchaŋana dehi.
14Yosefu hakuyila nindi, Dichi chinayilili nami, Enu muyakwakwendesha ituŋa.
15Tiyenu mutwakayesekela, chahandayi Fwaro kwaamu, kunu himukufuma kwoku, chiŋa kabinda kenu nenzi kunu.
16Temeshenu mwinenu wumu akamuleti mwanyikenu, enu nawa mukushala munyonji, kulonda kweseka nachu mazu enu tutali neyi munahoshi mwalala. Mukunkulwayi dinu, chahandayi Fwaro kwaamu, yenu akwakwendesha hohu mwalala.
17Wayishili wejima wawu #Yil 16:23mwakasilaŋawu antu, mafuku asatu.
18Ifuku damuchisatu Yosefu wayilili nindi, Tiyenu mumukwila muhandi; muloŋa ami namutiyaŋa Nzambi woma;
19neyi enu muyantu alala, tukasi mwinenu wumu mukaleya mumudi, enu muyi kwenu mutwali tidiku yakudiisha antaŋa jenu adi nanzala,
20mwakaleti kunidami kabinda kenu, kulonda twakeluki netu munahoshi mwalala, kulonda mwakabuli kufwa. Dimu mweliluwu.
21Hiyakudiihula wumu namukwawu, nawu, Chalala tunabayi hansaŋu yamanakwetu, chitwamweni chatiyiliyi kutama mumuchima windi, chatulembeleliyi, etu kwonti kwetu kutiya, dihu hanafumi kumona lukadi ilu lutukumona.
22Rubeni hakuyila nindi, Ami hinayihosheli nami, Bayi mumwila kansi chatamaku? Enu kwenu kwonti kwenu kutiya. Talenu ntahi dinu, hitukukoola mashi indi.
23Wena kwiluka nawu Yosefu nachitiyi nehi; muloŋa hadiŋi mukwakuyibalumwina mazu hakachi.
24Washetumukili nakuyifutalela, hakudila nikudila; wabalumukili cheŋi kudi wena, hakuhosha nawu; hakwambulamu Simeyona, hakumukasa kumesu awu.
25Yosefu walejeli antu, nindi enzeshi tidiku muyuma yawu yakusendela, nindi ayifuntishili wejima wawu hamuntu hamuntu mali awu, iwu mumutokoma windi, iwu mumutokoma windi, ayinki niyakudya yakudiila munjila. Dichi cheliluwu.
26Atwikili ayimbulu yawu yisenda yawu yatidiku, hiyakuya.
27Hakaminuwu, wumu hakukasununa mumutokoma windi, nindi amwinki chimbulu chindi yakudya, hakumona mali indi mukanwa kamutokoma.
28Hakuyila anakwindi, nindi, Mali ami anamfuntishili; awa adi mumutokoma wami awa; #Yosh 2:11; 5:1; 7:5; Mas 22:14ninyichima yawu mwivumu puchi, hiyakuditala nakuzaala hohu, nawu, Ichi chuma chanatwiluwu kudi Nzambi hichumanyi?
29Ashikili kudi tata yawu Yakoba mwituŋa daKenani, amulejeli mwamwenuwu mwejima to-o,
30nawu, Yenowu muntu neli mulopu wetuŋa, watuhosha chakola hohu, watwila nindi tuyakwakwendesha ituŋa.
31Etu twamwila netu, Etu tuyantu alala, hituyakwakwendeshaku;
32twekala amayala ikumi nayedi (12), tuyanyana katata wumu; netu, wumu wachanchaŋana dehi, wakabinda lelu wudi kwatata yetu mwituŋa daKenani.
33Yenowu muntu neli mulopu wetuŋa, watwilili nindi, Tiyenu munukwilukila nami enu muyantu alala, shiyenuhu mwinenu wumu kudami, twalilenu antaŋa jenu yakudya, adi nanzala.
34Muyi mwakanleteli kabinda kenu; henaha dihu namba kelukila nami enu himuyakwakwendesha ituŋaku, nami komana muyantu alala; chochina nakayilubwila manakwenu, mwakalandujoli mwituŋa.
35Cheliluwu nawu asukuli nyitokoma yawu, kutala komana mafundawu amali adi munyitokoma yawu wejima wawu. Niwena nitata yawu chamwenuwu mafunda awu amali, atiyili woma.
36Tata yawu Yakoba hakuyila nindi, Ami munankonki anyanami. Yosefu kwosi, Simeyona kwosi, mutwali nawa niBenjamini! #Rom 8:31Yumiyi yejima yinankalili hohu.
37Rubeni hakuhosha natata yindi, nindi, Neyi nakabula kukuletelayi cheŋi, wakajaha anyanami wonsu ayedi; munyinki tuhu ami, nakakuletelayi cheŋi.
38Nindi, Mwanami himukuya ninduku, manakwindi wafwa dehi, washala kankawindi damunu; neyi chuma chatama chakamuwana munjila yimukuya, mwakashikija nsuki jami janvwi kukaluŋa nayihuŋu.
Currently Selected:
Kutachika 42: MWW04
Highlight
Share
Copy
Want to have your highlights saved across all your devices? Sign up or sign in
The Holy Bible in Lunda Ndembu © United Bible Societies, 2003.
