Kutachika 43
43
Kuya kuEjipitu kwamuchiyedi
1Nzala yisweja nikusweja mwituŋa.
2Chadiiluwu tidiku yejima yenjiluwu nayu kuEjipitu to-o, tata yawu hakuyila nindi, Yenu nawa cheŋi mwakatulandili tuyakudya.
3Yuda hakumwila nindi, Yenowu iyala watukumikili naŋovu, nindi, Chiŋa mwakenza nakabinda kenu, mukunkulwayi himwakanmona kumesu amuku.
4Neyi wukwiteja etu kuya nikabinda ketu, tukuya, twakakulandili yakudya;
5ilaŋa neyi kwonti kweyi yena kuya, hitukuyaku, muloŋa yenowu iyala watwilili nindi, Chiŋa mwakenza nikabinda kenu, mukunkulwayi himwakanmona kumesu amuku.
6Kuchinka Isarela nindi, Indi enu mwankoŋelelidi chatama mwaka mumuleji yenowu iyala nenu kunashali mwanyiketu mukwawu?
7Nawu, Yenowu iyala watwihujoleli nankashi ninsaŋu jetwetu, nijawantaŋa jetu, nindi, Tata yenu wudi kwoku tahindi? Mukweti manakwenu tahindi? Dichi twamulejeli munsaŋu oju; ochu twadi kwiluka ŋahi netu wukutwila nindi, Mwakenzaŋa nakabinda kenu?
8Yuda hakumwila tata yindi Isarela, nindi, kuminaku dakumwiteja kansi niyi nindi ami, ninetu tukunyamuka, tukuya, kulonda twakahandi, twakabuli kufwa, ninetu nineyi, nianyanetu anyanya.
9Neyi nafwi muloŋa wakekala wamami, wakamwihwila kudi ami; neyi nakabula kukuletelayi cheŋi, nakumulubula kudeyi, muloŋa wakekala wami hayanyaka.
10Neyi twabula kulaba, mutenowu mwaka twafunta dehi cheŋi kela dehi nikayedi.
11Tata yawu Isarela wayilili nindi, Neyi dimu munatoŋojoki, ilenu mwenimu; sendenu nyikabu yamwituŋa yayiwahi muyuma yenu yakusendela, mumutweli owu iyala yamukunkulu, nimasitiki, nituwuchi, nisitoraki, niladanumi, ninyimu, nimabuji aamondi.
12Sendenu nimali amaseka ayedi, mwakamutweli nimali ayifuntishililuwu mutunwa twanyitokoma yenu; hadaha chayihitili mumesu.
13Tambulenu mwanyikenu, nyamukenu, yenuŋa cheŋi kudi owu iyala;
14Nzambi #17:1Chinyaweji amwinki owu iyala muchima wakuyitiyila wushona, kulonda ayumbiluku nimanakwenu mukwawu niBenjamini. Neyi akunkonka anyanami, anankonki dehi kwawu.
15Awa amayala asendeli niyamukunkulu, nimali amaseka ayedi, niBenjamini, anyamukili, ayili kuEjipitu, emeni kumesu aYosefu.
16Yosefu chamweniyi anenzi niBenjamini, hakumuleja nhembi yetala dindi, nindi, Yitwali awa amayala kwitala, wujahi kanyama, wuloŋeshi yakudya, awa amayala nukudya nawu hachayili.
17Owu iyala welili mwamulejeliyi Yosefu. Owu iyala hakuyitwala awa amayala kwitala daYosefu.
18Awa amayala atiyili woma nanochu chayitweluwu kwitala daYosefu; nawu, Muloŋa wanana mali atufuntishililuwu munyitokoma yetu hakusambila, dichi chanatuleteluwu munu, kulonda amoni hakutwinkela muloŋa, atulotokeli, atukwati twili anduŋu jawu, atambuli niyimbulu yetu.
19Hiyakuswila kwakwihi nanhembi yetala daYosefu, hiyakuhoshela nindi kuchisu chetala kachi,
20nawu, Eyi mwanta, chitwenjili hakusambila twenjili netu twakalandi kudya;
21chitwashikili hamakaminu, hitukukasununa munyitokoma yetu, kukasumuka, mali etu awa mutunwa twanyitokoma yetu, wejima wetu hamuntu hamuntu, mali etu saŋa ekalila mwomu mwesekeleluwu; tunakuleteluwu cheŋi.
22Tunaleti nimali amakwawu nawa akulanda nachu yakudya; muntu washili mali etu munyitokoma yetu etu kwetu hitunamwilukuku.
23Yena nindi, Tulishenu tuhu nyichima mwivumu, bayi mutiya womaku; Nzambi yenu, Nzambi yatata yenu, diyi nayinki maheta munyitokoma yenu, ami mali enu natambwili. Hakuyiidishila niSimeyona.
24Owu iyala wayitweli awa amayala mwitala daYosefu, wayinkeli menji, awelesheli nyendu yawu; wayinkeli yimbulu yawu yakudya.
25Amuloŋesheleli Yosefu yamukunkulu, kulonda ayiwani hakwinzayi hachayili; muloŋa achitiyili nawu tukudiila kunu.
26Chenjiliyi Yosefu kwitala dindi, amutweleleli mwitala yamukunkulu yadiŋuwu nayu, amubandaminini mahamawu hamaseki.
27Wayiihwili mwashakaminawu, nindi, Tata yenu wudi chachiwahi, owu ipala mwateneni? Wudi kwoku, tahindi?
28Nawu, Kambuŋeyi tata yetu wudi chachiwahi, wudi kwoku. Anoŋamini nyitu yawu amubandaminini.
29Chafumbwiliyi mesu indi wamweni mwanyikindi Benjamini, asemukayi nindi, mama yawu wumu, nindi, Yeniwu diyi kabinda kenu mwateneni kudami, tahindi? Nindi, Nzambi #Kuch 6:24-26; Mas 67:1; Isa 30:18-19; 33:2akutoŋi mwanami.
30Yosefu hakunyakala muloŋa natiyi dehi muchima mwivumu bu-su hadi mwanyikindi, hakukeŋakeŋa kwakuya nakudilila, hakwiŋila mwitala damukachi, hakudililamu.
31Waweleli kumesu indi, wedikilumu cheŋi, waduŋumikili, hakwila nindi, Shenu yakudya hamesa.
32Amushilili yena kwakankawindi, niwena kwakankawawu, niaEjipitu, adiŋi nakudyayi nawu, kwakankawawu niwena, muloŋa aEjipitu hiyatwesheli kudya nawaHeberuku, muloŋa chenochu kudi aEjipitu hikushimana chikupu.
33Ashakamini kumesu indi, wawedi hohawukulumpi windi, wakabinda hohawansi windi, awa amayala adihayaminini.
34Wayitemesheleli yakudya yakumesa yindi, ilaŋa yakudya yaBenjamini yabadikili yawu wejima wawu katanu. Anwini, aluŋili nindi.
Currently Selected:
Kutachika 43: MWW04
Highlight
Share
Copy
Want to have your highlights saved across all your devices? Sign up or sign in
The Holy Bible in Lunda Ndembu © United Bible Societies, 2003.
