Kutachika 44
44
Lupasa lwasiliva mumutokoma
1Hakuleja ninhembi yetala dindi, nindi, Inzeshaku nyitokoma yanawa amayala kudya mwomwashikila ŋovu jawu jakusenda, yishili mali awu mutunwa twanyitokoma yawu wejima wawu.
2Shaku lupasa lwami, lwolupasa lwasiliva, mukanwa kamutokoma wakabinda kawu, nimali indi atidiku. Yena welili mwamulejeliyi Yosefu.
3Chikwelili to-o habudidi adishalikili nanawa amayala, hiyakuya, niyimbulu yawu hamu.
4Chafuminuwu hamukala, kanda ayi nikwakulehi, Yosefu hakumwila nhembi yindi, nindi, Nyamukaku, yilondeli awa amayala; chiwukuyiwana, kayili neyi, Enu anayili chachiwahi, indi enu munakoŋelidi chatama? Muneyilidi lupasa lwami lwasiliva?
5Hidilu lwanwinaŋayi mwanta wamuku? Hidilu lwahoŋaŋayi nachuku? Ichi chimuneli munakoŋi chatama kwaamu.
6Oyiwana nikuyiwana, hakuyihosha mazu awa.
7Wena hiyakumwila nawu, Mwanta nahoshelidi mazu awa? Etu ambuŋeyi kwila chuma chidi neyi ochu chinjila.
8Mali twaweni mutunwa twanyitokoma yetu wowu tunafumishi kwituŋa daKenani tunakuleteli cheŋi, indi tukwiya ŋahi mwitala damwanta weyi hela siliva hela wuru?
9Etu ambuŋeyi yetu awa, yowu wukukwata nalu, akamujahi tuhu kwindi, ninetu tukwikala kwetu anduŋu jamwanta.
10Yena nindi, Omu mumunahoshi, dimu tukwila; yowu tukukwata nalu wukwila nduŋu yami; ilaŋa enu amakwawu mukuyiŋa.
11Anyakeli, atulili nyitokoma yawu hamaseki wejima wawu, akasunwini munyitokoma yawu wejima wawu.
12Yena watalatalili, kutachikila kudi wedi, kukumishila kudi kabinda; lupasa aluweni mumutokoma waBenjamini.
13Hiyakutabola mahinawu akuvwala, hiyakutwika cheŋi yisenda hayimbulu yawu wejima wawu, hiyakufunta cheŋi kumukala.
14NiYuda nianakwindi ashikili kwitala daYosefu, yena wachidiŋi kwoku, hiyakudinata hamaseki kumesu indi.
15Yosefu hakuyila nindi, Chenichi chimunakoŋi hichumanyi? Enu komana kwiluka nenu muntu wudi neyi ami kutwesha kuhoŋa nehi?
16Yuda nindi, Ochu tukumwila mwanta netudi? Tukuhosha netudi? Tukudiyiŋisha ŋahi? Nzambi nasompololi dehi kuluwa kwetwetu ambuŋeyi. Tuneli dehi anduŋu jamwanta, ninetu ninona anakwatuwu nalupasa.
17Yena nindi, Ami kwila mwenomu chinjila. Yowu iyala anakwatuwu nalupasa diyi wukwikala nduŋu yami, ilaŋa enu diyilenu tuhu kwenu kudi tata yenu mumesu mwakuwunda.
18Yuda hakumuswila kwakwihi, nindi, Eyi mwanta wami, nleki ntahi mwani, ami kambuŋeyi, nihoshuhu kadizu kamu namwanta wami, bayi wusweja kunzuwila ami kambuŋeyuku, muloŋa eyi wudi neyi Fwaro.
19Mwanta wami watwihwili etu ambuŋindi, nindi, Enu mukweti hela tata yenu, hela manakwenu?
20Etu twamwakwili mwanta, twamulejeli netu, Tukweti tata yetu, hiipala, nimwanindi wakansi avwalayi hawushinakaji windi, himwana wanyanya; manakwindi wafwa dehi, mwivumu damama yindi munashali yena hohu, nitata yindi wamukeŋa.
21Eyi watwilili etu ambuŋeyi, neyi, Kamuletenu kunu kunidami, kulonda nakamumoni namesu ami.
22Etu twamulejeli mwanta, netu, Kansi hakutwesha kumushiya tata yinduku, neyi wukumushiya tata yindi, tata yindi wukufwa.
23Eyi watwilili etu ambuŋeyi, neyi, Chiŋa kabinda kenu mwakenza nindi hohu, mukunkulwayi himwakanmona cheŋi kumesu amuku.
24Chitwashikili kudi kambuŋeyi tata yami, twamushimwinini mazu amwanta.
25Tata yetu welili nindi, Yenu mwakatulandili cheŋi tuyakudya.
26Etu twelili netu, Hitukutwesha kuyaku; neyi kabinda tukuya nindi, tukuya; muloŋa hitukutwesha kumona kumesu anowu muntuku, chiŋa tudi nakabinda ketu.
27Kambuŋeyi tata yami watwilili nindi, Enu muneluki iŋodami wanvweleleli anyana amayala ayedi;
28wumu wafumini kudami, ami nelili nami, Chalala wadiika dehi. Nilelu hinamumona nawa cheŋuku.
29Neyi mukuntambula niniwu nawa, neyi chuma chatama chakamuwana, mwakanshikijila nsuki jami janvwi kukaluŋa nayihuŋu.
30Dichi dinu chitwakashika kudi kambuŋeyi tata yami chakadi kansi, chaneliyi muchima windi wunadikasili hamu namuchima wakansi mbe;
31chakamonayi kansi kwosi, wakafwa, ninetu ambuŋeyi twakashikija invwi jakambuŋeyi tata yetu kukaluŋa nayihuŋu.
32Muloŋa ami kambuŋeyi nadinka dehi kudi tata yami kwikala kapopu hamuloŋa wakansi, nami, neyi nakabula kukushikijilayi muloŋa wakekala wamami kudeyi tata yami hayanyaka.
33Dichi dinu mwani, anleki ami kambuŋeyi nishali kunu #Yow 15:13nihiŋi mudi yena, nili nduŋu yambala yamwanta wami, wumuleki kansi ayi nawanakwindi.
34Indi ami nukuya ŋahi kudi tata yami chakadi kansi? Nakenda kamona kutama kwakamonayi tata.
Currently Selected:
Kutachika 44: MWW04
Highlight
Share
Copy
Want to have your highlights saved across all your devices? Sign up or sign in
The Holy Bible in Lunda Ndembu © United Bible Societies, 2003.
