Kutachika 47
47
1Yosefu hakuya nakumuleja Fwaro, nindi, Nitata yami nianakwami anafumi dehi kwituŋa daKenani anenzi dehi, ninyikoku yawu, nimpembi jawu, niŋombi jawu, niyuma yawu yejima; adi mwituŋa daGosheni.
2Waambwiluhu anakwindi atanu hakuyishikija kudi Fwaro.
3Fwaro wayiihwili anakwindi, nindi, Mwakalakalaŋa mudimwinyi? Wena hiyakumwila Fwaro, nawu, Etu ambuŋeyi tudi atubiŋa, ninetu niankaka jetu.
4Hiyakumwila Fwaro, nawu, Tunenzi nakushakama mwituŋa; muloŋa kwosi kwakudiishila yimuna yetwetu ambuŋeyuku; muloŋa nzala yasweja dehi mwituŋa daKenani; dichi dinu mwani, atwiteji etu ambuŋeyi tushakami mwituŋa daGosheni.
5Fwaro walejeli Yosefu, nindi, Tata yeyi nawanakweyi anenzi dehi kudeyi;
6ituŋa daEjipitu odu; katuŋishi tata yeyi nawanakweyi haswejela ituŋa kuwaha; ashakami kwawu mwituŋa daGosheni; neyi hadi amayala wunamoni kubabala, yinki wukulumpi wakumudimu wayimuna yami.
7Yosefu wamwiŋijili tata yindi Yakoba, wamushili kumesu aFwaro; Yakoba hakumukiswila Fwaro nkisu.
8Fwaro hakumwihula Yakoba, nindi, Nyaka yeyi yiwunahandi yiŋahi?
9Yakoba hakumwila Fwaro, nindi, Nyaka yami yinakimbuki yinashiki munyaka nkulakaji namakumi asatu (130); nyaka #Mas 39:4; 89:47yinahandami yantesha hohu yatama, hiyinashiki munyaka yahandili ankaka jami hakimbukilaŋawuku.
10Yakoba hakumukiswila Fwaro nkisu, hakwidika mwadiŋiyi Fwaro.
11Yosefu watuŋishili tata yindi nawanakwindi, wayinkeli mpata yawu ayiheti yiikali yawu mwituŋa daEjipitu, hohaswejela ituŋa kuwaha, mwomwituŋa daRamesesa, mwomwahosheliyi Fwaro.
12Yosefu wadiishili nitata yindi, nianakwindi, niantaŋa jatata yindi ejima yakudya, mwomwahita majiku awu.
Yosefu nanzala yakapwelendendi
13Mwituŋa dejima mwadiŋi mwosi yakudya, muloŋa nzala yaswejeli nankashi, niituŋa daEjipitu niituŋa daKenani ayekeleli nanzala.
14Yosefu wakuŋwili mali ejima niadiŋi mwituŋa daEjipitu, nimwituŋa daKenani, natidiku yalandiluwu; Yosefu watweli mali mwitala daFwaro.
15Chamanini mali ejima mwituŋa daEjipitu nimwituŋa daKenani, aEjipitu ejima hiyakuya kudi Yosefu, nawu, Twinki yakudya, indi tufwili tuhu kumesu eyi? Mali etu anamani.
16Yosefu nindi, Letenu yimuna yenu. Neyi mali anamani nukuyinka yakudya nayimuna yenu.
17Atweli yimuna yawu kudi Yosefu; Yosefu wayinkeli yakudya yakuhimpa natuwalu, nanyikoku, nampembi, naŋombi, ninayimbulu. Wayihandishili nayakudya yakuhimpa nayimuna yawu yejima wena mwakowu.
18Chamanini wena mwakowu, ayili cheŋi kudi yena mwaka wamuchiyedi, hiyakumwila nawu, Hitukujinda mwantaku, mali etu anamani ejima to-o, niyimuna yejima yineli dehi yambala yamwanta; niyomwenindi mwanta namoni kwosi chuma chinashaluku, kwiji yowu nyijimba yetu nampata jetu hohu.
19Tukumini dakufwa tuhu, mesu eyi atutalaŋa, ninetu nimpata jetu? Tulandi ninetu nimpata jetu nayakudya, ninetu nimpata jetu twakela anduŋu jaFwaro; twinki nimbutu kulonda tuhandi, tubuli kufwa, mpata yakenda kela mahembi hohu.
20Dichi Yosefu wamulandilili Fwaro ituŋa daEjipitu dejima; muloŋa aEjipitu ejima alandishili mahawu nanzala yamwenuwu yaswejeli nankashi. Ituŋa delili dambala daFwaro.
21Hakwila antu wayituntulwilili munyikala kufumisha kunsa yaŋinza yaEjipitu yimu ndo-o nikunsa yikwawu.
22Mpata yawayikombeji hohu yoyabulili kulandayi; muloŋa ayikombeji ayanjaŋenenaŋa kudya kwawu kudi Fwaro, dichi wena adiilaŋa chesekelu chawu chayinkelaŋayi Fwaro, dichi chabulili kulandishawu mpata jawu.
23Yosefu wayilili antu, nindi, Lelu nayilandi dehi, ninenu muyantu aFwaro nimpata jenu jaFwaro; tambulenu mbutu jenu oju, mwakadimi.
24Chimwamba kashika hamwaka wakudya mwakaambulaŋa maseka atanu; dimu daFwaro, maseka awana enwenu aweni, ekali mbutu, iji jakudima, iji jakudya, nikwenwenu, nikwawantaŋa jenu, nikudya kwawanyanenu anyanya.
25Wena nawu, Wunatuhandishi; nkaka yetu atutoŋuhu mwani, tukwikala anduŋu jaFwaro.
26Yosefu washilumu nshimbi yakutena ituŋa daEjipitu, nikulelu yidi kwoku, yakwila nawu Fwaro wukudyaku iseka damuchitanu; yoyi mpata yawayikombeji hohu yoyabulili kubalumuka yaFwaro.
27Isarela washakamini mwituŋa daEjipitu, mwomwituŋa daGosheni, hiyakuhetelamu, hiyakusemununa, hiyakuvula nankashi.
28Yakoba washakamini mwituŋa daEjipitu nyaka ikumi nayitanu nayiyedi (17). Dichi mafuku aYakoba, yonyaka yahandiliyi, yashikili munyaka nkulakaji namakumi awana nayitanu nayiyedi (147).
29Ifuku dakukeŋa kufwayi Isarela hidikuya nakushika, hakutambika nimwanindi Yosefu, hakumwila nindi, Neyi wunantiyili luwi, shaku mwani, chikasa cheyi mwishina dekata dami, wakaŋilaŋa chachiwahi chakubula kutwamba. Bayi wakanjiika mwani, muEjipituku.
30Ilaŋa chinakakama tulu hamu nawatata jami, wakansendaŋa nakumfumisha mwituŋa daEjipitu, wakantwali #Yil 7:15-16nakunjiika kwayijiikawu wena. Yena nindi, Nakela mwomuwunahoshi.
31Yena nindi, Nsanyikili. Yena hakusanyika. Isarela #Heb 11:21yonoŋama nikunoŋama hamutu wakadidi.
Currently Selected:
Kutachika 47: MWW04
Highlight
Share
Copy
Want to have your highlights saved across all your devices? Sign up or sign in
The Holy Bible in Lunda Ndembu © United Bible Societies, 2003.
