Kutachika 48
48
Manase naEfweremi
1Chimwahitili yumoyu amulejeli Yosefu, nawu, Tata yeyi wakata; hakuya nawanyanindi mwayedi wawu, aManase naEfweremi.
2Amulejeli Yakoba, nawu, Mwaneyi Yosefu nenzi kudeyi. Yakoba hakudikolesha, hakushakama kwadiŋiyi kukadidi.
3Yakoba hakuhosha kudi Yosefu, nindi, Nzambi #17:1Chinyaweji wadimwekesheli kudami kuLuzi mwituŋa daKenani, wankiswilili nkisu,
4waŋilili nindi, Ami nakakwilisha nsemi, wakasemununa, nakakuvulisha, hadeyi hakafuma nyichidi yayivulu; ituŋidi nakayinkadu anyaneyi akahiŋa mudeyi, dakekali dawu dakudihetela hayanyaka.
5Ichi dinu awa anyaneyi ayedi awa, iwavweleli mwituŋa daEjipitu henohu kanda ninzi kudeyi muEjipituku, akwikala amami; aEfweremi naManase akekala amami neyi chaduwu aRubeni naSimeyona.
6Hakwila anyaneyi iwakalunjikaku akekala eyeyi; kuwuswana wawu akayitumba wowu majina awanakwawu.
7Hakwila ami kwami chinafumini kuPadani, Racheli wamfwilili mumesu, munjila mwituŋa daKenani, kwasheli kachintampu nakushika kuEfwarata; namujiikili mwomuna munjila yaya kuEfwarata, diku kuBetelemi.
8Isarela chamweniyi anyana kaYosefu, welili nindi, Wenawa hiyanyi ntahi?
9Yosefu wamwilili tata yindi, nindi, Diwu anyanami ananyinkiyi Nzambi kunu. Yena nindi, Yileti kunu kudami mwani, nukuyikiswila nkisu.
10Mesu aIsarela adiŋi ela dehi lwiidi nakukula, hatwesheli kwindi kumonaku. Wayishikijili kwakwihi, yena wayipwepujoleli nakuyikumbata.
11Isarela wamwilili Yosefu, nindi, Ami nelili nami hinamba kakumona cheŋi kumesuku, kwinza ichi Nzambi mwaka naŋiteji dehi kumona nianyaneyi.
12Yosefu wayiidishili mwadiŋuwu munkuma yindi, wabandamini niihama dindi heseki.
13Yosefu wayikwatili mwayedi wawu, Efweremi muchikasa chindi chachidiilu hakumutwala kuchikasa chaIsarela chachimunswa, Manase muchikasa chindi chachimunswa hakumutwala kuchikasa chaIsarela chachidiilu, hakuyishikija kwakwihi.
14Isarela hakwolola chikasa chindi chachidiilu, hakuchinaŋika hamutu waEfweremi, diyi kansi, chikasa chindi chachimunswa hakunaŋika hamutu waManase, wachilili nakuchiluka kumuchima, muloŋa Manase diyi wedi.
15Wamukiswilili Yosefu nkisu, nindi,
Nzambi kumesu indi #5:22kwendelaŋa atata jami niAbarahama niIsaka,
Diyi Nzambi #49:24; Mas 23:1; Isa 40:11wandiishaŋa nyaka yami yonsu yinahandi nakushika nikwifuku dalelu,
16Diyi kaŋelu wankuula kukutama kwejima,
Akiswili awa atwansi nkisu;
Akayitena nejina damami nimajina awatata jami Abarahama naIsaka;
Akasemununi hanu heseki akekali izaza.
17Chamweniyi Yosefu tata yindi hakunaŋika chikasa chindi chachidiilu hamutu waEfweremi, watiyili kutama, wakwatili chikasa chatata yindi kwiwulu nindi achifumishi kumutu waEfweremi achinaŋiki hamutu waManase.
18Yosefu hakumwila tata yindi, nindi, Bayi omuku tata, yeniwu diyi wedi, naŋikaku chikasa cheyi chachidiilu hamutu windi.
19Tata yindi wakolamini, nindi, Neluki, mwanami, neluki; niyena nawa wakela muchidi wawantu, niyena nawa wakela muneni, ilaŋa mwanyikindi diyi wakamubadika, nianyanindi akela nyunza yayeni yayivulu.
20Wayikiswilili nkisu dodena ifuku odu, nindi, Kudeyi kwokwakakiswilayi Isarela nkisu, nakwila nindi, Nzambi akwili wikali neyi chaduwu aEfweremi naManase. Washili Efweremi kumbidi, Manase wamukumishili munyima.
21Isarela wamwilili Yosefu, nindi, Yami nukufwa onu; ilaŋa Nzambi wakekala nanenu, wakayifuntisha cheŋi mwituŋa dawankaka jenu.
22Hakwila ami nakwinki mukandu wumu wunabuli kwinkahu anakweyi, diwu nayamukili aAmori nampoku yami yakabali, nawuta wami wamukunji.
Currently Selected:
Kutachika 48: MWW04
Highlight
Share
Copy
Want to have your highlights saved across all your devices? Sign up or sign in
The Holy Bible in Lunda Ndembu © United Bible Societies, 2003.
