Yohanes 13

Yesu klɔ afɔ na eƒe nusrɔ̃lawo

1Hafi Paska la naɖo la, Yesu nya be yeƒe ɣeyiɣi de be yeadzo le xexe sia me ayi Tɔ́ la gbɔ. Elɔ̃ ame siwo nye etɔ le xexea me. Elɔ̃ wo yi ɖase keke nuwuwu ke.

2Yesu kple eƒe nusrɔ̃lawo nɔ anyi le fiẽnuɖuƒe. Vɔ̃ɖitɔ la dee susu me na Yuda, si nye Simon Iskariot vi la xoxoxo be wòade Yesu asi. 3Ke Yesu nya be Tɔ́ la tsɔ nu sia nu de asi na ye. Enya be Mawu gbɔe yetso va eye Mawu gbɔ yim yegale. 4Azɔ etsi tsitre le nua ɖuƒe, ɖe eƒe awu da ɖi eye wòtsɔ tsiletse sa ɖe ali. 5Etrɔ tsi ɖe agba me, eye wòde asi eƒe nusrɔ̃lawo ƒe afɔkɔklɔ me. Etsɔ tsiletse si wòsa ɖe ali la tutu afɔ na wo. 6Esi wòɖo Simon Petro dzi la, Petro gblɔ na Yesu be: “Aƒetɔ, wòe aklɔ afɔ nama?” 7Yesu ɖo eŋu nɛ be: “Nu si wɔm mele la, màse egɔme haɖe o, ke emegbe la, àse egɔme.” 8Petro gblɔ nɛ be: “Ao, màklɔ nye afɔ akpɔ gbeɖe o!” Yesu ɖo eŋu nɛ be: “Ne nyemeklɔ afɔ na wò o la, màkpɔ gome aɖeke le gbɔnye o.” 9Simon Petro gblɔ nɛ be: “Aƒetɔ, ekema manye nye afɔ ɖeɖe o, ke boŋ klɔ nye asi kple ta hã!” 10Yesu gblɔ nɛ be: “Ame si le tsi la, megahiã ŋutikɔklɔ o; negbe afɔ ko wòaklɔ, #13.10: “Afɔ ko wòaklɔ” mele mawunyagbalẽ xoxo aɖewo me o. elabe eƒe afi sia afi ɖi xoxo. Miawo la, mia ŋuti ɖi, ke menye mi katãe o.” 11Yesu nya ame si lafia eyomemɔ, eya tae wògblɔ be: “Menye mi katã ŋutie ɖi o.”

12 # Luk 22.27. Esi Yesu klɔ afɔ na eƒe nusrɔ̃lawo vɔ la, egado awu eye wòɖabɔbɔ nɔ kplɔ̃a ŋu. Ebia wo be: “Miese nu si mewɔ na mi la gɔmea? 13Mieyɔam be Nufiala kple Aƒetɔ. Ele eme nenema tututu elabe eyae menye. 14Ke ne nye, miaƒe Nufiala kple Aƒetɔ, meklɔ miaƒe afɔ la, ekema edze be miawo hã miaklɔ afɔ na mia nɔewo. 15Kpɔɖeŋu wònye mena mi, be miawo hã miawɔ abe ale si mewɔe na mi la ene. 16#Mat 10.24; Luk 6.40; Yoh 15.20. Mele egblɔm na mi le nyateƒe me be ŋusẽ mele subɔla si wu eƒe aƒetɔ o, eye nenema ke ŋusẽ mele dɔla hã si wu ame si dɔe ɖo ɖa la o. 17Ke esi mienya nu siawo la, Mawu yra mi ne miewɔ wo dzi. 18#Ps 41.9. “Menye mi katã ŋuti mele glɔm ɖo o; menya ame siwo metia. Ke ele be mawunya sia nava eme be: ‘Ame si le abolo ɖum kplim la, tso ɖe ŋunye.’ 19Mele nya sia gblɔm na mi hafi wòava dzɔ, ale be ne eva dzɔ la, miaxɔe ase be nyee nye ame si li tegbee. 20#Mat 10.40; Mar 9.37; Luk 9.48; 10.16. Nyateƒe tututu tom mele na mi be ame sia ame si xɔ ame aɖe si medɔ la, nyee wòxɔ, eye ame sia ame si xɔm la, ame si dɔm ɖa lae wòxɔ.”

Yesu gblɔ eyomemɔfiafia ɖi

(Mat 26.20-25; Mar 14.17-21; Luk 22.21-23)

21Esi Yesu gblɔ nya siawo vɔ la, etsi dzi vevie le eɖokui me ale wòʋu eme gblɔ be: “Nyateƒe tututu tom mele na mi be mia dometɔ ɖeka ladem asi.” 22Nusrɔ̃laawo kpɔ wo nɔewo ŋkume eye wotsi yaa, elabe womenya wo dometɔ si tututu gblɔm Yesu le o. 23Nusrɔ̃laawo dometɔ ɖeka si Yesu lɔ̃na la, bɔbɔ nɔ Yesu gbɔ kpuie. 24Ale Simon Petro mia ŋku ɖee hegblɔ nɛ be: “Bia ame si gblɔm wòle lae.” 25Esi wòte ɖe Yesu ŋu alea ta la, ebi kɔ do ɖe eƒe akɔta eye wòbiae be: “Aƒetɔ, ame kae?” 26Yesu ɖo eŋu be: “Ame si maka abolo atɔ detsia me atsɔ na lae.” Ale esi wòka aboloa hetɔ detsia me la, etsɔe na Yuda, Simon Iskariot vi la. 27Esi wòxɔ aboloa la, Abosam ge ɖe eyama me. Ale Yesu gblɔ nɛ be: “Nu si wɔ ge nàla la, wɔe kaba.” 28Ame siwo le kplɔ̃a ŋu la dometɔ aɖeke menya nu si ta Yesu gblɔ nya sia nɛ ɖo o. 29Wo dometɔ aɖewo bu be esi wònye Yuda sie woƒe gakotokua le ta la, ɖewohĩ Yesu ɖe wògblɔ nɛ be neƒle nu si yewole tsɔtsɔ ge aɖu ŋkekenyui lae loo, alo ɖe wòbe netsɔ nane na ame dahewo. 30Azɔ esi Yuda xɔ aboloa la, edo go enumake. Zã do.

Se yeye la

31Esi Yuda do go la, Yesu gblɔ be: “Azɔ la, woɖe Amegbetɔ Vi la ƒe ŋutikɔkɔe fia, eye to eyama me la, woɖe Mawu ƒe ŋutikɔkɔe fia. 32Nenye be woɖe Mawu ƒe ŋutikɔkɔe fia le Amegbetɔ Vi la me la, ekema Mawu aɖe Amegbetɔ Vi la ƒe ŋutikɔkɔe afia le eya ŋutɔ ɖokui me enumake. 33#Yoh 7.34. Vinyewo, nyemaganɔ mia gbɔ eteƒe nadidi o. Miadim. Nya si megblɔ na Yudatɔwo va yi la, eya ke ko gblɔm mele na miawo hã fifia be: ‘Afi si meyina la, miate ŋu ava o.’ 34#Yoh 15.12, 17; Yoh I, 3.23; Yoh II, 1.5. Mele se yeye nam mi be: Milɔ̃ mia nɔewo. Ale si melɔ̃ mii la, miawo hã milɔ̃ mia nɔewo nenema ke. 35Ne mielɔ̃ mia nɔewo la, amewo katã ato esia me adze sii be nye nusrɔ̃lawo mienye.”

Yesu gblɔe ɖi be Petro agbe nu le ye gbɔ

(Mat 26.31-35; Mar 14.27-31; Luk 22.31-34)

36Simon Petro biae be: “Aƒetɔ, afi ka yim nèle?” Yesu ɖo eŋu be: “Afi si yim mele la, màte ŋu adze yonyeme ayi fifia o, ke emegbe la, àdze yonyeme.” 37Petro biae be: “Aƒetɔ, nu ka ta nyemate ŋu adze yowòme haɖe o? Maku ɖe tawò gɔ̃ hã.” 38Yesu ɖo eŋu be: “Àku ɖe tanyea? Nyateƒe tututu tom mele na wò be koklo maku atɔ hafi nàgbe nu le gbɔnye zigbɔzi etɔ̃ o.”

Currently Selected:

Yohanes 13: EB14

Highlight

Copy