Luka 21

Ahosi la ƒe nunana

(Mar 12.41-44)

1Yesu fɔ mo dzi, eye wòkpɔ kesinɔtɔwo wotsɔ woƒe nunanawo le nudzɔɖaka la me dem. 2Ekpɔ ahosi dahe aɖe hã si tsɔ ga si woɖuna la ƒe suetɔ kekeake ƒe eve pɛ va de eme. 3Yesu gblɔ be: “Mele egblɔm na mi le nyateƒe me be ahosi dahe sia na nu wu ame sia ame, 4elabe ame bubuawo katã la, nu gbogbo si le wo si la ƒe ɖe koe wova dzɔ. Ke eya tsɔ nu si katã dzi wòanɔ agbe ɖo la va na.”

Yesu ƒo nu le mawuxɔ la gbagbã ŋuti

(Mat 24.1-2; Mar 13.1-2)

5Ame aɖewo nɔ dze ɖom tso ale si woɖo atsyɔ̃ na mawuxɔ la kple kpe xɔasiwo kpakple nunana nyuiwo la ŋuti. 6Tete Yesu gblɔ be: “Miele nu siawo kpɔma? Ŋkeke li gbɔna, si me woakaka wo keŋkeŋ; kpeɖoɖo aɖeke matsi bubu dzi le afii o.”

Fuɖename kple yometitiwo

(Mat 24.3-14; Mar 13.3-13)

7Wobiae be: “Nufiala, ɣe ka ɣie nu sia adzɔ? Nu ka anye dzesi be egogo?” 8Yesu ɖo eŋu be: “Mikpɔ nyuie be womagakplɔ mi atrae o. Ame geɖewo atsɔ nye ŋkɔ ɖe nu ava gblɔ be: ‘Nyee.’ Alo woagblɔ be: ‘Ɣeyiɣi la de vɔ.’ Migadze wo yome o. 9Ne miese aʋawɔwɔwo kple zitɔtɔwo ŋkɔ la, migavɔ̃ o, elabe edze be nu siawo nadzɔ gbã; gake esiawo mefia be nuwuwu la ava enumake o.”

10Azɔ eyi edzi gblɔ be: “Dukɔwo lawɔ aʋa kple wo nɔewo, eye fiaɖuƒewo latsi tre ɖe wo nɔewo ŋuti. 11Anyigba aʋuʋu ŋɔdzitɔe le teƒewo; dɔ ato, eye dɔ vɔ̃ ava teƒeteƒewo. Ŋɔdzinuwo kple dzesi gãwo lado tso dziƒo. 12Gake do ŋgɔ na esiawo katã la, asi asu mia dzi, eye woati mia yome. Woakplɔ mi ayi ɖe ƒuƒoƒewo bene woadrɔ̃ ʋɔnu mi, ade mi gaxɔ me. Woahe mi ayi dufiawo kple mɔ́mefiawo gbɔ le tanye. 13Ke esia ana mɔnukpɔkpɔ mi be miaɖi ɖase. 14#Luk 12.11, 12. Milée ɖe tame be mehiã be miabu tame le nu si gblɔ ge miala la ŋuti do ŋgɔ o, 15elabe nye ŋutɔ mana nunya kple aɖe mi, ale be ne mieƒo nu la, nya siwo ado tso mia nu la, ana be ame aɖeke mate ŋu anɔ te ɖe mia nu, alo atsi tre ɖe mia ŋu o. 16Mia dzilawo kple mia nɔviŋutsuwo, miaƒe ƒometɔwo kple mia xɔlɔ̃wo gɔ̃ hã lade mi asi, eye woawu mia dometɔ aɖewo. 17Amewo katã alé fu mi le tanye; 18gake miaƒe taɖa ɖeka hã mabu o. 19Ne miedo dzi sesĩe la, miatsi agbe.

Yesu ƒo nu le Yerusalem gbagbã ŋuti

(Mat 24.15-21; Mar 13.14-19)

20 “Ne miekpɔ aʋakɔwo ɖe to ɖe Yerusalem la, ekema minyae be egbãɣi gogo. 21Mina ame siwo le Yudea la nasí ayi toawo dzi, ame siwo le dua titina la nado adzo, eye migana ame siwo le eƒe agbletawo la, nage ɖe eme o. 22#Hos 9.7. Elabe hlɔ̃biaɣi ɖo bene woawu nu siwo katã woŋlɔ ɖi la nu. 23Baba na funɔwo kple ame siwo le no nam wo viwo le ɣe ma ɣi me! Fukpekpe sesẽ ava anyigba dzi, eye tohehe dziŋɔ lava dukɔ sia dzi. 24Ame aɖewo latsi yi nu, woakplɔ ɖewo ayi aboyo mee. Ame siwo menye Yudatɔwo o la atu afɔ Yerusalem dzi, va se ɖe esime woƒe ɣeyiɣi nade.”

Amegbetɔ Vi la ƒe vava

(Mat 24.29-31; Mar 13.24-27)

25 # Yes 13.10; Xez 32.7; Yoel 2.31; Nyaɖ 6.12, 13. “Dzesiwo ado ɖe ɣe, ɣleti kple ɣletiviwo me. Le anyigba dzi la, dukɔwo avɔ̃, atɔtɔ, eye woatsi dzodzodzoe le atsiaƒu ƒe gbeɖeɖe kple eƒe agbodzedze ta. 26Dziƒowo ƒe ŋusẽwo aʋuʋu. Amewo avɔ̃, eye woatsi dzimaɖeɖi ʋuu aku ƒenyi le nu siwo gbɔna dzɔdzɔ ge ɖe xexea me dzi la ta. 27#Dan 7.13; Nyaɖ 1.7. Tete woakpɔ Amegbetɔ Vi la wòanɔ alilikpo me gbɔna kple ŋusẽ kpakple ŋutikɔkɔe gã. 28Ne nu siawo le dzɔdzɔm la, ekema mitsi tsitre ne miadzɔ ka; mifɔ ta dzi, elabe miaƒe agbexɔxɔ gogo.”

Nusɔsrɔ̃ tso gboti gbɔ

(Mat 24.32-35; Mar 13.28-31)

29Yesu do lo sia na wo be: “Mikpɔ gboti kple ati bubuwo katã ɖa. 30Ne wole aŋgba tom ko la, miawo ŋutɔ miekpɔnɛ be dzomeŋɔli gogo. 31Nenema ke miawo hã, ne miekpɔ nu siawo wole eme vam la, minyae be Mawu ƒe fiaɖuɖu la gogo. 32Mele egblɔm na mi le nyateƒe me be dzidzime sia nu mele yiyi ge, hafi nu siawo nava eme o. 33Dziƒo kple anyigba nu ava yi, gake nye nyawo ya nu mava yi akpɔ o.”

Ehiã be míanɔ ŋudzɔ

34 “Mikpɔ mia ɖokui dzi nyuie be nu tsu ɖuɖu, ahamumu kple dzitsitsi ɖe agbe sia me nuwo didi ŋuti nagaxɔ miaƒe susu me o. Ale be ʋɔnudrɔ̃gbe la magalíli mi, 35abe ale si mɔ́ ɖea nui ene la o; elabe alíli xexemenɔlawo katã. 36Eya ta minɔ ŋudzɔ, eye mido gbe ɖa bene miakpɔ ŋusẽ ato nu siwo katã gbɔna dzɔdzɔ ge la me, eye miava do ɖe Amegbetɔ Vi la ŋkume.” 37#Luk 19.47. Le ŋkeke me la, Yesu fiaa nu le mawuxɔ la me, ke le fiẽ me la, edzona yina ɖatsia Amito la dzi dɔna. 38Ŋdi kanya la, dukɔ la katã fɔna vaa egbɔ le mawuxɔ la me be yewoase eƒe nyawo.

Currently Selected:

Luka 21: EB14

Highlight

Copy