Luka 22

Nugbeɖoɖo ɖe Yesu ŋu

(Mat 26.1-5; Mar 14.1-2; Yoh 11.45-53)

1 # Mos II, 12.1-27. Abolo Maʋamaʋã Ŋkeke Nyui, si woyɔna be Paska la gogo. 2Nunɔlagãwo kple agbalẽfialawo nɔ dukɔ la vɔ̃m eya ta wonɔ ayemɔnu si dzi woato awu Yesu la dim.

Yuda lɔ̃ be yeafia Yesu yome mɔ

(Mat 26.14-16; Mar 14.10-11)

3Abosam ge ɖe Yuda, si woyɔna be Iskariot, nusrɔ̃la wui eveawo dometɔ ɖeka me. 4Ale wòyi ɖaƒo nu kple nunɔlagãwo kple mawuxɔdzikpɔlawo le ale si wòadee asi na wo la ŋuti. 5Dzi dzɔ wo, eye wodo ŋugbe nɛ be yewoana gae. 6Yuda lɔ̃ ɖe edzi, eye wònɔ mɔnu dim be yeade Yesu asi na wo le ameha la ƒe manyamanya me.

Yesu dzra ɖo na Ŋutitotonuɖuɖua

(Mat 26.17-25; Mar 14.12-21; Yoh 13.21-30)

7Abolo Maʋamaʋã Ŋkeke Nyui la ɖuɣi ƒe ŋkeke si dzi wòle be woawu Paskalẽvi la le la va ɖo. 8Ale Yesu dɔ Petro kple Yohanes ɖa be: “Miyi ɖawɔ Ŋutitotonuɖuɖu la ne míaɖu.” 9Wobia be: “Afi ka nèdi be míadzrae ɖo le?” 10Eɖo eŋu na wo be: “Ne miege ɖe dua me la, ame aɖe, si tsɔ tɔmedeze la ava do go mi. Mikplɔe ɖo yi ɖe aƒe si me wòage ɖo la me. 11Migblɔ na aƒea tɔ be: ‘Nufiala be míabia wò be: Afi ka amedzroxɔ si me nye kple nye nusrɔ̃lawo míaɖu ŋutitotonu la le?’ 12Afia xɔ gã aɖe mi le dziƒoxɔ dzi, si me xɔmenuwo le. Midzra afi ma ɖo.” 13Esi woyi la, wokpɔ nuawo, abe ale si Yesu gblɔe na wo ene la tututu, eye wodzra ɖo na Ŋutitotonuɖuɖu la.

Aƒetɔ ƒe fiẽnuɖuɖu la

(Mat 26.26-30; Mar 14.22-26; Kor I, 11.23-25)

14Esi ɣeyiɣia de la, Yesu bɔbɔ nɔ kplɔ̃ ŋuti kple amedɔdɔawo. 15Egblɔ na wo be: “Medi vevie ŋutɔ be maɖu Ŋutitotonuɖuɖu sia kpli mi hafi makpe fu, 16elabe mele egblɔm na mi be nyemegale eɖu ge akpɔ o, va se ɖe esime Mawu ƒe fiaɖuɖu la nava.” 17Azɔ Yesu tsɔ wainkplu, eye esi wòda akpe la, egblɔ be: “Mixɔ esia ne miamae ɖe mia nɔewo dome. 18Mele egblɔm na mi be tso azɔ heyina la, nyemegale waintsetse me tsi no ge akpɔ o, va se ɖe esime Mawu ƒe fiaɖuɖu la nava.” 19Azɔ etsɔ abolo, eye esi wòda akpe la, eŋe eme tsɔ na wo hegblɔ be: “ Esia nye nye ŋutilã.#22.19: Kpukpui wui asiekelia ƒe akpa evelia kple kpukpui bla evelia mele mawunyagbalẽ xoxo aɖewo me o. Wotsɔe na ɖe mia ta. Miwɔ esia miatsɔ aɖo ŋku dzinye.” 20#Yer 31.31-34. Nenema ke wòtsɔ kplu la na wo le nuɖuɖua megbe gblɔ be: “Kplu sia nye nubabla yeye si dzi wotsɔ nye ʋu si wokɔ ɖi le mia ta la ɖo kpee. 21#Ps 41.9. “Ke mikpɔ ɖa, ame si le deyem asi la ƒe asi le agba me dem kplim. 22Amegbetɔ Vi la le yiyim abe ale si woɖo ɖi nɛ la ene, gake baba na ame si dzi woato adee asi la!” 23Ke nusrɔ̃laawo de asi wo nɔewo biabia se me be yewo dometɔ ka gɔ̃e le nu sia wɔ ge mahã.

Nyaʋiʋli le ame vevitɔ ŋuti

24 # Mat 18.1; Mar 9.34; Luk 9.46. Ʋiʋli hã ɖo nusrɔ̃laawo dome be yewo dometɔ kae nye ame vevitɔ mahã. 25Ke Yesu gblɔ na wo be: “Ame siwo menye Yudatɔwo o la ƒe fiawo ɖua aƒetɔ ɖe wo dzi, eye woyɔa ame siwo kpɔ ŋusẽ ɖe wo dzi la be amenuvelawo. 26#Mat 23.11; Mar 9.35.#Mat 20.25-27; Mar 10.42-44. Gake miawo la, neganɔ nenema le mia dome o. Ame si nye ame vevitɔ le mia dome la, nezu abe suetɔ boŋ ene, eye ame si nye kplɔla la, nezu abe subɔla ene. 27#Yoh 13.12-15. Evɔ la, ame kae nye ame vevitɔ wu? Kplɔ̃ŋunɔla lae loo, alo kplɔ̃subɔla la yea? Ɖe menye ame si bɔbɔ nɔ kplɔ̃ ŋuti lae oa? Ke nye la, mele mia dome abe subɔla ene. 28“Mienɔ gbɔnye le nye tetekpɔwo katã me, 29eye abe ale si Tɔ́nye ɖoe ɖi be mava ɖu fiae ene la, nye hã meɖoe ɖi na mi 30#Mat 19.28. be miaɖu nu, ano nu le nye kplɔ̃ ŋuti le nye fiaɖuƒe la me. Miabɔbɔ nɔ fiazikpuiwo dzi, adrɔ̃ ʋɔnu Israel-to wui eveawo.”

Yesu gblɔe ɖi be Petro agbe nu le ye gbɔ

(Mat 26.31-35; Mar 14.27-31; Yoh 13.36-38)

31 “Simon, Simon, kpɔ ɖa, Satana di be yeagbɔ mi abe ale si wogbɔa lu ene. 32Gake medo gbe ɖa ɖe tawò be wò xɔse nu nagatsi o; ke wò la, ne ètrɔ gbɔ va la, do ŋusẽ nɔviwòwo.” 33Petro gblɔ nɛ be: “Aƒetɔ, mele klalo ayi ɖe gaxɔ me, alo aku gɔ̃ hã kpli wò.” 34Yesu xɔ edzi be: “Petro, mele egblɔm na wò be koklo mele atɔ ku ge egbea hafi nàsẽ nu zi etɔ̃ be yemenyam o.”

Gakotoku, mɔzɔkotoku kple yi

35 # Mat 10.9, 10; Mar 6.8, 9; Luk 9.3; 10.4. Azɔ Yesu bia eƒe nusrɔ̃lawo be: “Esi medɔ mi, eye gakotoku, mɔzɔkotoku kple afɔkpa menɔ mia si o la, ɖe nane hiã mia? Woɖo eŋu be: “Naneke mehiã mí o.” 36Egblɔ na wo be: “Ke azɔ la, ame si si gakotoku le la, netsɔe. Nenema ke mitsɔ mɔzɔkotoku hã, eye ne yi mele ame aɖe si o la, nedzra eƒe awu ne wòaƒlee. 37#Yes 53.12. Elabe mele egblɔm na mi be ele be mawunya si woŋlɔ ɖi le ŋutinye be, ‘Wobui ɖe vɔ̃wɔlawo dome’ la nava eme to dzinye. Elabe nu si woŋlɔ ɖi le ŋutinye lae le eme vam.” 38Nusrɔ̃laawo gblɔ be: “Aƒetɔ, kpɔ ɖa, yi eve le afii!” Yesu gblɔ na wo be: “Enyo.”

Yesu do gbe ɖa le Amito la dzi

(Mat 26.36-46; Mar 14.32-42)

39Yesu do go azɔ yi ɖe Amito la dzi, abe ale si wòwɔnɛ ene, eye nusrɔ̃laawo hã le eŋuti. 40Esi wòɖo teƒea la, egblɔ na wo be: “Mido gbe ɖa, bene miagage ɖe tetekpɔ me o.” 41Emegbe la, edzo le wo gbɔ yi ŋgɔ vie, eye wòdze klo do gbe ɖa gblɔ be: 42“Tɔ́nye, ne èlɔ̃ la, ɖe fukpekpekplu sia ɖa le gbɔnye; gake menye nye lɔlɔ̃nu o, ke boŋ wò lɔlɔ̃nu neva eme.” [ 43Mawudɔla aɖe tso dziƒo ɖe eɖokui fiae hedo ŋusẽe. 44Exa nu, eye wòʋli vevie ŋutɔ. Egado gbe ɖa kple moveviɖoɖo wu, eye eƒe fifia zu abe ʋukɔwo ene le gegem ɖe anyigba.] 45Esi wòdo gbe ɖa vɔ hetsi tsitre la, eva nusrɔ̃laawo gbɔ, eye wòkpɔ wo le alɔ̃ me, elabe nuxaxa na wogbɔdzɔ. 46Egblɔ na wo be: “Nu ka ta miele alɔ̃ dɔm? Mifɔ miado gbe ɖa bene miagadze tetekpɔ me o.”

Yesu léle

(Mat 26.47-56; Mar 14.43-50; Yoh 18.3-11)

47Esi Yesu gale nu ƒom la, ameha aɖe va do. Ame wui eveawo dometɔ ɖeka si woyɔna be Yuda la le ŋgɔ na wo. Yuda te ɖe Yesu ŋu be yeagbugbɔ nu nɛ. 48Ke Yesu biae be: “Yuda, nugbugbɔ nètsɔ le Amegbetɔ Vi la dem asia?” 49Esi nusrɔ̃la siwo le Yesu ŋu la kpɔ nu si le dzɔdzɔ ge la, wobiae be: “Aƒetɔ, mída yia?” 50Tete wo dometɔ ɖeka da yi nunɔlagã la ƒe dɔla hekpa eƒe ɖusime to. 51Yesu gblɔ be: “Dzudzɔ nu ma! Mina mɔ wo!” Yesu ka asi dɔla la ƒe to ŋu, eye wòda gbe le eŋu. 52Azɔ Yesu gblɔ na nunɔlagãwo, mawuxɔdzikpɔlawo kple amegã siwo va be yewoalée la be: “Kpo kple yie mietsɔ do ɖe dzinye abe adzodala menye enea? 53#Luk 19.47; 21.37. Gbe sia gbe menɔ mawuxɔ la me kpli mi, gake miebe yewoalém o. Ke miaƒe ɣeyiɣi kple vivitimeŋusẽe nye esia.”

Petro gbe nu le Yesu gbɔ

(Mat 26.57-58, 69-75; Mar 14.53-54, 66-72; Yoh 18.12-18, 25-27)

54Wolé Yesu, eye wokplɔe yi ɖe nunɔlagã la ƒeme. Petro kplɔ wo ɖo, le megbe ʋĩi. 55Wodo dzo ɖe xɔxɔnu, eye wobɔbɔ nɔ egbɔ. Petro nɔ anyi ɖe wo dome. 56Nyɔnudɔla aɖe kpɔe le anyinɔƒe le dzoa ƒe keklẽ me. Ekpɔe dũu gblɔ be: “Ame sia hã nɔ egbɔ.” 57Ke Petro sẽ nu gblɔ be: “Nyɔnu, nyemenyae o!” 58Le ɣeyiɣi kpui aɖe megbe la, ame bubu aɖe kpɔ Petro, eye wògblɔ be: “Wò hã, wo dometɔ ɖeka nènye!” Ke Petro be: “Ŋutsu, menye nyee o!” 59Anɔ abe gaƒoƒo ɖeka megbe ene la, ame bubu aɖe va te gbe ɖe edzi gblɔ be: “Nyateƒee, ame sia hã nɔ egbɔ elabe Galileatɔ wònye!” 60Ke Petro ɖo eŋu be: “Kpɔ ɖa, ŋutsu, nyemenya naneke le nya ma ŋu o!” Petro mekpɔ ɖe nu le nya la me hafi koklo ku atɔ o. 61Aƒetɔ la trɔ kpɔ Petro dũu. Tete Petro ɖo ŋku Aƒetɔ la ƒe nya si wògblɔ nɛ la dzi be: “Hafi koklo naku atɔ egbe la, àgbe nu le gbɔnye zigbɔzi etɔ̃.” 62Petro do yi xexe, eye wòfa avi vevie.

Woɖu fewu le Yesu ŋu, eye woƒoe

(Mat 26.67-68; Mar 14.65)

63Ame siwo si me Yesu le la, ɖu fewu le eŋuti, eye woƒoe. 64Wobla mo nɛ hebiae be: “Ame kae ƒo wò, yɔe na mí!” 65Wodzui, gblɔ nya baɖa geɖewo ɖe eŋu.

Yesu le dumegãwo ŋkume

(Mat 26.59-66; Mar 14.55-64; Yoh 18.19-24)

66Esi ŋu ke la, dumegãwo, nunɔlagãwo kple agbalẽfialawo va ɖi anyi, eye wokplɔ Yesu va woƒe takpekpe la me hegblɔ nɛ be: 67“Nenye wòe nye Kristo la la, gblɔe na mí.”

Yesu gblɔ na wo be: “Ne megblɔe na mi hã la, miele exɔ ge ase o, 68eye ne mebia nya mi hã la, miele eŋu ɖo ge nam o. 69Gake tso esia dzi heyina la, Amegbetɔ Vi la anɔ anyi ɖe Mawu Ŋusẽtɔ la ƒe ɖusime!” 70Wo katã wogblɔ be: “Ekema wòe nye Mawu Vi laa?” Yesu ɖo eŋu na wo be: “Miawoe le egblɔm be nyee!” 71Wogblɔ azɔ be: “Ɖasefo aɖe gahiã mí fifiaa? Míawo ŋutɔ míesee tso eƒe nu me!”

Currently Selected:

Luka 22: EB14

Highlight

Copy