ڢَارَوَ 31
31
يَعْڧُوبَ يَا غُدُ دَغَ وُرِنْ لَبَنْ
1يَعْڧُوبَ كُوَ يَاجِ ثٜىٰوَ یَیَنْ لَبَنْ مَظَا سُنَ ثٜىٰ وَ «يَعْڧُوبَ يَا ݣُوشِ أَرْزِڧِنْ بَابَنْمُ؞ أَيْ، دُكْ أَرْزِڧِنْسَ دَغَ وُرِنْ بَابَنْمُ نٜىٰ يَڢِتُواْ؞» 2يَعْڧُوبَ يَا كُمَ لُورَ ثٜىٰ وَ لَبَنْ يَا ثَنْجَ حَلِنْسَ ذُوَا غَرٜىٰشِ؞ 3سَيْ يَهْوٜىٰهْ يَثٜىٰ وَ يَعْڧُوبَ «كَكُواْمَ ڧَسَا تَكَاكَنِّنْكَ، وَجٜىٰنْ دَنْغِنْكَ؞ نِے كُوَ ذَنْ كَسَنْثٜىٰ تَرٜىٰدَكَيْ؞»
4سَبُواْدَ حَكَ يَعْڧُوبَ يَعَيْكَ عَكَٰوُاْ مَاتَنْسَ رَحِيلَةُ دَ لَيْعَتُ أَدَاجِنْ دَيَكٜىٰ كِيوُانْ دَبُّواْبِنْسَ؞ 5سَيْ يَثٜىٰ مُسُ «نَغَ ثٜىٰوَ بَابَنْكُ يَثَنْجَ حَلِنْسَ ذُوَا غَرٜىٰنِ؞ عَمَّا دُكْدَهَكَ اللَّهْ نَبَابَنَ يَنَ تَرٜىٰدَنِ؞ 6كُنْ سَنْ ثٜىٰوَ نَيِ وَبَابَنْكُ حِدِمَ دَ دُكَنْ ڧَرْڢِينَ؞ 7عَمَّا دُكْدَهَكَ بَابَنْكُ يَا ثُوثٜىٰنِ؞ يَا ثَنْجَ لَادَنَ سَوْ غُواْمَ، عَمَّا اللَّهْ بَيْ يَرْدَ مَسَ يَيِ مِنِ رَوْنِبَ؞ 8عِدَنْ يَا ثٜىٰ، ‹تُواْ، دُكَنْ دَبُّواْبِے مَاسُ طِغُواْ طِغُواْ نٜىٰ لَادَنْكَ،› سَيْ دُكَنْ دَبُّواْبِنْ سُحَيْڢِ مَاسُ طِغُواْ طِغُواْ؞ عِدَنْ كُمَ يَثٜىٰ، ‹مَاسُ ذَانِ ذَانِ نٜىٰ لَادَنْكَ،› سَيْ دُكَنْ دَبُّواْبِنْ سُحَيْڢِ مَاسُ ذَانِ ذَانِ؞ 9تَهَكَ اللَّهْ يَطَوْكِ دَبُّواْبِنْ بَابَنْكُ يَبَانِ؞
10«أَ لُواْكَثِنْ طَوْكَرْ ثِكِنْ دَبُّواْبِے، نَيِ مَڢَرْكِ؞ نَغَ ثٜىٰوَ بُنْسُرَيْ وَطَنْدَ سُكٜىٰيِنْ بَرْبَرَ سُنَدَ ذَانِ ذَانِ دَ طِغُواْ طِغُواْ؞ 11مَلاَىِٕكَنْ اللَّهْ يَيِ مَغَنَ دَنِے أَمَڢَرْكِنْ يَثٜىٰ، ‹يَعْڧُوبَ!› نَا أَمْسَ، ‹غَا نِے نَنْ!› 12سَيْ يَثٜىٰمِنِ، ‹كَدُوبَ، دُكَنْ بُنْسُرَيْ وَطَنْدَ سُكٜىٰ بَرْبَرَ سُنَدَ طِغُواْ طِغُواْ دَ ذَانِ ذَانِ؞ نَسَا وَنَّنْ يَڢَرُ حَكَ دُواْمِنْ إِنَ غَنِنْ دُكْ أَبِنْدَ لَبَنْ يَكٜىٰيِ مَكَ؞ 13نِنٜىٰ اللَّهْ وَنْدَ يَبَيَّنَ أَغَرٜىٰكَ أَ بٜىٰتٜىٰلْ، عِنْدَ كَكٜىٰٻٜىٰ دُوڟٜىٰنْ تُنَاوَا تَوُرِنْ ظُبَ مَسَ مَنْ ظَيْتُنْ، عِنْدَ كُمَ كَيِ ضَنْڟُوَا أَغَرٜىٰنِ؞ يَنْذُ سَيْ كَيِشِرِ كَكُواْمَ ڧَسَرْدَ عَكَ حَيْڢٜىٰكَ؞› »#ڢَارْ 28.18-22
14رَحِيلَةُ دَ لَيْعَتُ سُكَ أَمْسَ سُكَثٜىٰ «أَيْ، بَامُ دَسَوْرَنْ أَبِنْ غَادُواْ دَغَ وُرِنْ بَابَنْمُ؞ 15يَنَيِ دَمُو كَمَرْ مُو بَڧِينٜىٰ؞ يَاسَيَرْ دَمُو، كُمَ يَنْذُ يَا كَشٜىٰ دُكَنْ كُطِنْ دَ عَكَبَاشِ عَكَنْمُ؞ 16دُكَنْ دُوكِيَرْ نَنْ دَ اللَّهْ يَكَرْٻَ دَغَ وُرِنْ بَابَنْمُ، تَامُثٜىٰ دَ یَیَنْمُ؞ كَيِ دُكْ أَبِنْدَ اللَّهْ يَڢَطَا مَكَ؞»
17سَيْ يَعْڧُوبَ يَتَاشِ يَسَا یَیَنْسَ دَ مَاتَنْسَ عَكَنْ رَاڧُمَ؞ 18يَݣُوشِ دُكَنْ دَبُّواْبِنْسَ دَ دُكَنْ كَايَنْسَ وَطَنْدَ يَتَارَ أَ ڢَدَّنْ أَرَمْ، دُواْمِنْ سُكُواْمَ وُرِنْ بَابَنْسَ إِسْحَٰڧَ عَڧَسَرْ كَنْعَنَ؞
19أَ لُواْكَثِنْ دَ وَنَّنْ يَڢَرُ، لَبَنْ يَاتَڢِے دُواْمِنْ يَ أَسْكٜىٰ غَاشِنْ تُمَكِنْسَ، رَحِيلَةُ كُوَ تَاشِغَ تَاسَاثِ غُمَكَنْ بَابَنْتَ؞ 20يَعْڧُوبَ كُمَ يَارُوطِ لَبَنْ مُتُمِنْ أَرَمْ دَيَكٜىٰ بَيْ نُونَ مَسَ ذَيْغُدُوبَ؞ 21تَهَكَ، يَعْڧُوبَ يَغُدُ دَ دُكَنْ أَبِنْدَ يَكٜىٰدَشِ دَ غَغَّاوَا؞ يَڧٜىٰتَرٜىٰ كُواْغِنْ يُڢِرٜىٰتِسْ، يَنُڢِ تَيَنْكِنْ تُدَّنْ غِلٜىٰيَدْ؞
لَبَنْ يَا بِے بَايَنْ يَعْڧُوبَ
22أَ رَانَ تَ عُكُ عَكَ ڢَطَا وَ لَبَنْ ثٜىٰوَ يَعْڧُوبَ يَغُدُ؞ 23سَيْ يَݣُوشِ مُتَنٜىٰنْسَ سُكَبِے يَعْڧُوبَ؞ أَ رَانَ تَبَݣَويْ سُكَ غَمُ دَ يَعْڧُوبَ عَيَنْكِنْ تُدَّنْ غِلٜىٰيَدْ؞ 24عَمَّا اللَّهْ يَا بَيَّنَ غَ لَبَنْ مُتُمِنْ أَرَمْ ثِكِنْ مَڢَرْكِ دَ دَرٜىٰ يَثٜىٰ مَسَ «كَلُورَ ڢَا دَ مَغَنَرْ دَ ذَاكَيِ دَ يَعْڧُوبَ، كُواْ مَيْݣَوْ كُواْ مَرَرْݣَوْ؞»
25لَبَنْ كُوَ يَاغَمُ دَ يَعْڧُوبَ يَايِنْ دَ يَعْڧُوبَ يَكَڢَ ذَنْغُوانْسَ عَبَبَّنْ تُدُ؞ لَبَنْ كُوَ يَكَڢَ نَاسَ ذَنْغُواْ عَيَنْكِنْ تُدَّنْ غِلٜىٰيَدْ؞ 26لَبَنْ يَثٜىٰ «يَيَ كَيِ حَكَ؟ كَرُوطٜىٰنِ كَݣُوشِ یَیَنَ مَاتَا كَمَرْ وَطَنْدَ عَكَ ڨُوثٜىٰ عَيَاڧِ! 27دُوانْمٜىٰ كَغُدُ أَ عَسِرْثٜىٰ، كَرُوطٜىٰنِ، بَكَڢَطَا مِنِبَ؟ أَيْ دَ نَسَلَّمٜىٰكَ دَ مُرْنَ تَرٜىٰدَ وَاڧُواْڧِ دَ كِطِنْ تَمْبُرَ دَ نَغَرَايَ؞ 28دُوانْمٜىٰ كُمَ كَهَنَنِ دَامَرْ يِوَجِيكُواْكِنَ دَ یَیَنَ مَاتَا بَنْݣُونَ دَ سُمْبَ؟ أَبِنْدَ كَيِ وَوَنْثِنٜىٰ! 29إِنَدَ إِيكُواْ إِنْيِ مَكَ رَوْنِ، عَمَّا اللَّهْ نَبَابَنْكَ يَيِ مَغَنَ دَنِے أَدَرٜىٰنْ جِيَ ثٜىٰوَ إِنْ لُورَ دَ مَغَنَرْ دَ ذَنْيِ دَكَيْ، كُواْ مَيْݣَوْ كُواْ مَرَرْݣَوْ؞ 30كُواْدَيَكٜىٰ كَغُدُ سَبُواْدَ كَنَ مَرْمَرِ سُواْسَيْ كَكُواْمَ غِدَنْ بَابَنْكَ، عَمَّا دُوانْمٜىٰ كَسَاثِ غُمَكَنَ؟»
31سَيْ يَعْڧُوبَ يَأَمْسَا وَ لَبَنْ يَثٜىٰ «سَبُواْدَ نَجِڟُواْرُواْ، غَمَا نَايِ ڟَمَّنِ ذَاكَ ڨُوثٜىٰ یَیَنْكَ مَاتَادَغَ هَنُّونَ دَ ڧَرْڢِے؞ 32عَمَّا دُكْ وَنْدَ كَسَامٜىٰشِ دَ غُمَكَنْكَ، ذَاعَ كَشٜىٰشِ؞ أَغَبَنْ مُتَنٜىٰنْمُ، كَنُونَ دُكَنْ أَبِنْدَ يَكٜىٰ نَاكَ أَوُرِينَ، سَيْ كَطَوْكَ؞» يَعْڧُوبَ كُوَ بَيْسَنْ ثٜىٰوَ رَحِيلَةُ تَاسَاثِ غُمَكَنْبَ؞
33سَيْ لَبَنْ يَشِغَ تٜىٰنْتِنْ يَعْڧُوبَ يَبِنْثِكَ، يَڢِتَ يَشِغَ نَ لَيْعَتُ، يَڢِتَ يَشِغَ نَبَيْوَ بِيُ مَاسُ حِدِمَ، عَمَّا بَيْسَامِ كُواْمٜىٰبَ؞ دَ يَڢِتَ دَغَ تٜىٰنْتِنْ لَيْعَتُ، سَيْ يَشِغَ تٜىٰنْتِنْ رَحِيلَةُ؞ 34أَشٜىٰ، رَحِيلَةُ تَا ݣُوشِ غُمَكَنْ غِدَنْ لَبَنْ تَسَ عَڧَرْڧَشِنْ وَنِ أَبِنْ ذَمَ عَكَنْ رَاڧُمِ، تَذَوْنَ عَكَيْ؞ لَبَنْ يَبِنْثِكَ كُواْعِنَ عَتٜىٰنْتِنْتَ، عَمَّا بَيْسَامِ غُمَكَنْ بَ؞ 35سَيْتَثٜىٰ وَ بَابَنْتَ «بَابَ، كَدَ كَيِڢُشِے دَنِے يَدَّ بَنْتَاشِبَ، غَمَا إِنَ ثِكِنْ أَلْعَادَرْ مَاتَا؞» يَا كُوَ بِنْثِكَ، عَمَّا بَيْسَامِ غُمَكَنْ غِدَنْبَ؞
36سَيْ يَعْڧُوبَ يَيِ ڢُشِے يَظُبَاوَ لَبَنْ مَغَنَ؞ يَثٜىٰ «مٜىٰنٜىٰنٜىٰ لَيْڢِينَ؟ وَثٜىٰ دُواْكَاثٜىٰ نَكَرْيَ دَ كَبِے بَايَنَ دَ ذَاڢِ حَكَ؟ 37كُواْدَيَكٜىٰ كَبِے ثِكِنْ دُكَنْ كَايَانَ، تُواْ، عَثِكِنْ دُكَ، مٜىٰكَسَامُ وَنْدَ يَكٜىٰ نَغِدَنْكَ؟ أَجِيٜىٰ أَنَنْ أَغَبَنْ مُتَنٜىٰنَ دَ مُتَنٜىٰنْكَ، دُواْمِنْ سُيَنْكٜىٰ شَرِيعَ ڟَكَانِنْمُ بِيُ؞ 38ثِكِنْ شٜىٰكَرُ عَشِرِنْدَ نَيِ دَكَيْ، تُنْكِيَرْكَ كُواْ عَكُيَرْكَ بَسُ كُواْ يِبَرِنْ ثِكِيبَ؞ بَنْكُمَ ثِنْيٜىٰ كُواْ ضَغُوانْ غَرْكُنَنْكَبَ؞ 39دَبَّرْ دَ نَمُواْمِنْ دَاجِ سُكَ ثِنْيٜىٰ، بَانَ كَٰوُاْ مَكَ، نِے نَكَنْ طَوْكِ نَوْيِنْ هَسَرَرْ؞ كَكَنْ نٜىٰمِ دَغَ هَنُّونَ كُواْوَنٜىٰ أَبِنْدَ عَكَ سَاتَا، كُواْ دَرَانَ كُواْ دَدَرٜىٰ نٜىٰ؞ 40سَوْ دَيَوَ نَكَنْشَا ذَاڢِنْ رَانَ دَ رَانَ دَ كُمَ سَنْيِ دَ دَرٜىٰ، حَرْ بَرْثِ يَٻَثٜىٰ دَغَ عِدَنُونَ؞ 41حَكَ يَكَسَنْثٜىٰ أَدُكَنْ وَطَنَّنْ شٜىٰكَرُ عَشِرِنْدَ نَيِ أَغِدَنْكَ؞ نَيِ شٜىٰكَرَا غُواْمَشَا حُطُ إِنَ عَيْكِ دُواْمِنْ إِنْ عَوْرِ یَیَنْكَ مَاتَا بِيُ؞ نَيِ شٜىٰكَرَا شِدَ دُواْمِنْ دَبُّواْبِنْكَ؞ كَايِ تَثَنْجَ لَادَنَ حَرْ سَوْ غُواْمَ؞ 42دَاعَثٜىٰ اللَّهْ نَبَابَنَ، اللَّهْ نَ إِبْرَٰهِيمْ، اللَّهْ مَيْ بَنْ ڟُواْرُواْ نَ إِسْحَٰڧَ بَايَ تَرٜىٰدَنِ دَ تُنْتُنِ كَسَلَّمٜىٰنِ حَنُّنْ وُاْڢِ؞ عَمَّا اللَّهْ يَغَ وَهَلَاتَ دَ عَيْكِنْ حَنُّوَنَ، غَاشِ يَا ڟَاوَتَا مَكَ جِيَ دَ دَرٜىٰ؞»
يَرْجٜىٰجٜىٰنِيَ ڟَكَانِنْ يَعْڧُوبَ دَ لَبَنْ
43سَعَنً لَبَنْ يَأَمْسَ وَ يَعْڧُوبَ يَثٜىٰ «أَيْ، مَاتَنْكَ یَیَنَ نٜىٰ، یَیَنْسُ جِيكُواْكِنَ نٜىٰ، غَرْكُنَنْ دَبُّواْبِنَّنْ مَا غَرْكُنَنَ نٜىٰ؞ دُكْ أَبِنْدَ كَغَنِ أَنَنْ نَوَنٜىٰ؞ عَمَّا يَوْ أَݣَويْ وَنِ أَبِنْدَ ذَنْعِيَيِ غَمٜىٰدَ یَیَنَ مَاتَا، كُواْ كُوَ یَیَنْ دَ سُكَ حَيْڢَ نٜىٰ؟ 44تُواْ، يَنْذُ كَذُواْ مُيِ يَرْجٜىٰجٜىٰنِيَ ڟَكَانِنْمُ، مُو بِيُ؞ بَرِ كُمَ تَذَمَ شَيْدَ ڟَكَانِينَ دَكَيْ؞» 45سَيْ يَعْڧُوبَ يَطَوْكِ دُوڟٜىٰ يَكَڢَ، يَذَمَ دُوڟٜىٰنْ تُنَاوَا؞ 46سَيْ يَعْڧُوبَ يَثٜىٰ وَمُتَنٜىٰنْسَ «كُتَارَ دُوَڟُو؞» سُكَ كُوَ تَرَ دُوَڟُو تُلِ؞ سُكَثِ عَبِنْثِ أَوُرِنْ تُلِنْ دُووَڟُنْ دَ عَكَ تَارَ؞ 47سَيْ لَبَنْ يَكِرَا وُرِنْ يٜىٰغَرْ سَهَدُتَ،#31.47 يٜىٰغَرْ سَهَدُتَ: دَ يَرٜىٰنْ أَرَمَيَ مَعَنَرْ سُونَنَّنْ عِتَثٜىٰ تُلِنْ شَيْدَ؞ يَعْڧُوبَ كُمَ يَكِرَا شِ غَلٜىٰيٜىٰدْ؞#31.47 غَلٜىٰيٜىٰدْ: دَ إِبْرَانِيَنْثِ مَعَنَرْ سُونَنَّنْ عِتَثٜىٰ تُلِنْ شَيْدَ؞ 48لَبَنْ يَثٜىٰ «تُلِنْ دُووَڟُنَّنْ شَيْدَثٜىٰ ڟَكَانِنْكَ دَنِے يَوْ؞» سَبُواْدَ حَكَ عَكَ كِرَا وُرِنْ غَلٜىٰيٜىٰدْ؞ 49عَكَ كُمَ كِرَا تُلِنْ دُووَڟُنْ مِظْڢَ،#31.49 مِظْڢَ: دَ إِبْرَانِيَنْثِ يَدَّ عَكٜىٰ ڢَطِنْ وَنَّنْ سُونَ، عَكَنْ جِيشِ كَمَرْ «دَغَ وُرِنْ نٜىٰ ذَاعَ سَا عِدُواْ»؞ غَمَا لَبَنْ يَاثٜىٰ «بَرِ يَهْوٜىٰهْ يَسَا عِدُواْ ڟَكَانِينَ دَكَيْ، سَعَدَّ بَا مَا غَنِنْ جُونَ؞ 50عِدَنْ كَوُلَڧَنْتَ یَیَنَ مَاتَا، كُواْ كُوَ كَعَوْرِ وَطَنْسُ مَاتَا عَكَنْسُ، كُواْدَيَكٜىٰ بَابُوَنِ تَرٜىٰدَمُو، تُنَ ڢَا، اللَّهْ شَيْدَ نٜىٰ ڟَكَانِينَ دَكَيْ؞» 51لَبَنْ يَكُمَثٜىٰ وَ يَعْڧُوبَ «دُوبِے وَنَّنْ تُلِنْ دُوَڟُو، دُوبِے كُمَ وَنَّنْ دُوڟٜىٰنْ تُنَاوَا وَنْدَ نَكَڢَ ڟَكَانِينَ دَكَيْ؞ 52تُلِنْ دُووَڟُنَّنْ شَيْدَثٜىٰ، وَنَّنْ دُوڟٜىٰنْ تُنَاوَا كُمَ شَيْدَثٜىٰ ثٜىٰوَ بَذَنْ ڧٜىٰتَرٜىٰ وَنَّنْ تُلِنْ دُوَڟُو ذُوَا وُرِنْكَ دَ نُڢِنْ مُغُنْتَا بَ؞ كَيْ مَا بَذَاكَ ڧٜىٰتَرٜىٰ وَنَّنْ تُلِنْ دُوَڟُو دَ وَنَّنْ دُوڟٜىٰنْ تُنَاوَا ذُوَا وُرِينَ دَ نُڢِنْ مُغُنْتَا بَ؞ 53بَرِ اللَّهْ نَ إِبْرَٰهِيمْ، اللَّهْ نَ نَهُوارْ، اللَّهْ نَبَابَنْسُ، يَيَنْكٜىٰ شَرِيعَ ڟَكَانِنْمُ؞» سَيْ يَعْڧُوبَ يَيِ ضَنْڟُوَا دَ سُونَنْ اللَّهْ مَيْ بَنْ ڟُواْرُواْ نَبَابَنْسَ إِسْحَٰڧَ؞ 54سَيْ يَعْڧُوبَ يَيَنْكَ دَبَّ يَمِيڧَ هَدَايَ عَكَنْ بَبَّنْ تُدُنْ، يَكِرَا مُتَنٜىٰنْسَ سُثِ عَبِنْثِ؞ بَايَنْدَ سُكَثِ، سَيْ سُكَ ݣُونَ عَكَنْ بَبَّنْ تُدُنْ؞ 55وَشٜىٰغَرِ دَ سَسَّڢٜىٰ سَيْ لَبَنْ يَتَاشِ يَسُمْبَثِ جِيكُواْكِنْسَ دَ یَیَنْسَ مَاتَا، يَسَا مُسُ أَلْبَرْكَ؞ سَعَنً يَيِ بَنْݣُونَ دَسُو يَكُواْمَ غِدَا؞
Currently Selected:
ڢَارَوَ 31: hauAS
Highlight
Share
Copy
Want to have your highlights saved across all your devices? Sign up or sign in
Hausa Common Language Ajami Bible © The Bible Society of Nigeria, 2020
