Psom 33
33
Anou sant louanz Lesegner Bondie
1Tou ki viv dan drwatir
sant for-for zot lazwa dan LESEGNER.
Li bon sant so louanz tou dimounn ki obeir li.
2Dir mersi LESEGNER ar lagitar;
selebre li ar lamizik lor sitar.
3Sant sante ki zorey pa finn ankor tande;
zwe bann instriman ar talan e kriy zot lazwa.
4Parol LESEGNER zot vre;
tou seki li fer, zot parfe dan so fidelite.
5LESEGNER kontan tou seki drwat ek zis;
So lamour infini prezan partou lor later.
6LESEGNER ti kree liniver par so parol;
par souf so labous li ti donn nesans soley, lalinn ek zetwal.
7Li ramas tou dilo dan enn sel plas;
li met tou bann losean dan enn ladig imans.
8Later antie bizin ador LESEGNER!
Tou bann abitan dan lemond bizin ena gran respe divan li!
9Li pronons parol, li kree lemond;
Li donn lord, liniver pran nesans.
10LESEGNER kas plan bann diferan popilasion;
Li anpes zot realiz zot bann proze.
11Me LESEGNER so plan li res valab touletan;
so proze li res vivan eternelman.
12Enn nasion li ere kan LESEGNER limem so Bondie,
enn pep li bienere si LESEGNER finn swazir li kouma so prop dibien.
13Depi lesiel LESEGNER
get limanite anba;
14depi so tronn lao
li obzerv tou bann abitan lor later.
15Limem ki ti form zot leker
e li kone tou seki zot fer.
16Enn lerwa pa gagn lager zis parski
so larme gran ek for;
enn solda pa gagn laviktwar
zis parski li fizikman for;
17bon seval pa ase pou amenn laviktwar;
zis so lafors pa ase pou sov so kavalie.
18LESEGNER vey lor bann ki ena respe pou li;
bann ki fer konfians so lamour infini.
19Li anpes lamor koste
e li nouri zot, mem kan lafaminn pe fer ravaz.
20Avek lespwar nou atann lor LESEGNER;
li protez nou e li ed nou.
21Limem ki donn lazwa ki dan nou leker,
nou ena konfians dan Bondie ki sin.
22SEGNER, donn nou touletan to lamour infini
parski nou lespwar li zis dan twa.
Currently Selected:
Psom 33: KMNT
Highlight
Share
Copy
Want to have your highlights saved across all your devices? Sign up or sign in
Nouvo Testaman Kreol Morisien Harmonisation NTPS KM © Bible Society of Mauritius, 2021.
