Psom 34
34
Louanz pou bonte Bondie
Enn Psom David. Devan lerwa Abimelek, David fer sanblan li fou. Lerla Abimelek ti pous li. Letan David finn ale li konpoz sa Psom la.
1Touletan mo pou remersie LESEGNER;
zame mo pa pou aret sant so louanz.
2Mo pou loue li pou tou seki li finn fer;
bann ki dan soufrans, ekout mwa
e ki lazwa ranpli zot leker.
3Ansam ar mwa anou proklam grander LESEGNER;
anou sant ansam laglwar LESEGNER.
4Mo ti dimann LESEGNER vinn ed mwa
e li ti reponn, li ti balie prop tou mo bann angwas.
5Bann ki fer li konfians zot dan bien;
zot pena laont lor zot figir.
6Enn malere kriy osekour; LESEGNER finn tann li,
e finn sov li dan tou so detres.
7So bann anz kanp otour
bann ki respekte LESEGNER,
e li sov zot.
8Goute e gete kouma LESEGNER li bon.
Bienere bann ki swazir so proteksion.
9Zot tou zot bizin onor LESEGNER
parski bann ki obeir so instriksion
zame pa pou mank nanye.
10Bann dimounn pwisan kapav konn lafin ek laswaf,
me bann ki obeir LESEGNER
pou touletan gagn seki zot bizin.
11Vini zenes, koste kot mwa;
les mo montre zot kouma respekte LESEGNER.
12To anvi viv bien?
To anvi viv lontan dan lazwa?
13Alor aret koz lemal;
aret koz manti.
14Evit lemal e fer dibien;
fer zefor pou ki lape fleri partou.
15LESEGNER protez bann ki dan bon sime
e li ekout zot douler;
16LESEGNER deteste bann ki dan lemal
e ler zot mor zot disparet dan memwar bann dimounn.
17Bann ki dan bon sime apel osekour, LESEGNER tann zot,
li tir zot dan zot langwas.
18LESEGNER li touletan pre ar seki pe perdi kouraz;
li replant lespwar kot lespwar finn mor.
19Dimounn ki obeir Bondie fer fas boukou traka
me LESEGNER delivre li dan tousala;
20li vey lor tou lezo dimounn-la,
pa enn sel pou brize.
21Lemal li detrir bann ki fer lemal;
bann ki ayir bon dimounn zame zot pou sape.
22LESEGNER pou touletan sov so pep;
bann ki al ver li pou gagn so proteksion
e pa pou gagn kondanasion.
Currently Selected:
Psom 34: KMNT
Highlight
Share
Copy
Want to have your highlights saved across all your devices? Sign up or sign in
Nouvo Testaman Kreol Morisien Harmonisation NTPS KM © Bible Society of Mauritius, 2021.
