Psom 38
38
Lapriyer enn dimounn malere
Enn Psom David. Enn ofrand pou remersiman.
1SEGNER, mem to ankoler, pa kondann mwa;
malgre to gran koler, pa pini mwa.
2To bann fles finn pers-pers mwa,
to lame finn abat lor mwa.
3Akoz to koler, mo ena douler partou;
akoz mo pese, maladi fann dan tou mo lezo.
4Mo pe nwaye dan kaskad pese;
fardo-la tro lour pou sarye.
5Akoz mo prop betiz
mo blesir santi pi, pe fer infeksion;
6mo korde ar douler,
tout lazourne mo dan lapenn.
7Lafiev pe bril mwa;
pena lasante dan mo lekor.
8Mo pena lafors. Mo kas-kase.
Mo leker pe soufer, mo nek plengne.
9Segner, to kone ki mo bann dezir ete.
To tann mwa plengne ar douler;
10mo leker bat for-for;
mo gagn febles
e mo trouv som.
11Kamarad ek vwazin pa koste ar mwa
akoz mo infeksion;
mem mo fami pa frekant mwa.
12Seki anvi touy mwa, pe met piez partou;
bann ki pe rod fer mwa ditor, menas pou kas-kas mwa;
zot pas zot letan konplote.
13Mo kouma bann sourd, nepli tann bien;
mo lalang amare, pa kapav koze.
14Mo kouma enn dimounn ki nepli tande,
mo pa kone ki pou reponn.
15Mo finn met mo lespwar an twa, SEGNER;
twa Segner, mo Bondie, to pou exos mo lapriyer.
16Mo priye, “Pa les mo lennmi gagn lokazion riy mwa;
pa les zot pran plezir trouv mwa glise ek tonbe.”
17Mo lafin bien pre;
douler fer mwa korde.
18Mo konfes mo fot
mo regret mo pese.
19Mo bann lennmi paret bien for.
Parmi, boukou ayir mwa san rezon.
20Bann ki retourn lemal pou lebien
akiz mwa parski mwa mo finn swazir bon sime.
21Pa abandonn mwa, SEGNER;
Mo Bondie pa res lwin ar mwa.
22Pa tarde pou ed mwa, Segner, mo Sover.
Currently Selected:
Psom 38: KMNT
Highlight
Share
Copy
Want to have your highlights saved across all your devices? Sign up or sign in
Nouvo Testaman Kreol Morisien Harmonisation NTPS KM © Bible Society of Mauritius, 2021.
