Psom 39
39
Konfesion enn dimounn malere
Pou sef koral. Pou Yedoutoun. Enn Psom David.
1Mo ti dir, “Mo pou fer atansion seki mo fer;
atansion mo fer pese ar seki mo dir;
dan prezans move dimounn
mo pa pou dir nanye.”
2Mo ti ferm mo labous
mem kan ti ena bon kiksoz pou dir.
Me mo douler ti ogmante
3e traka ti touf mwa.
Plis mo reflesi, plis mo lespri trouble;
mo oblize dimande,
4“SEGNER, komie letan mo pou viv?
Dir mwa komie letan reste.
Lerla mo pou kone ki lavi bien kourt.”
5Bann zour ki ena pou viv larzer lame.
Mo lavi antie pa reprezant gran soz pou twa.
Lavi dimounn li zis enn ti labriz,
6dimounn ale vini kouma enn lonbraz.
Tou seki nou fer pa vo nanye;
nou ramas enn fortinn
me pa kone kisann-la pou erite.
7Aster-la, SEGNER, ki ena pou mo atann?
Mo finn met mo lesperans an twa.
8Delivre mwa dan tou mo bann pese,
pa les bann ti-lespri sikann mwa.
9Mo ferm mo labous! Refiz koze!
Mo kone ki twa ki finn azir koumsa.
10Aret tap lor mwa!
To bann kou pe tir mo lavi.
11To koriz ek disiplinn bann imin pou zot pese,
to ronz zot trezor kouma enn insek ronz enn fri.
Lavi dimounn li zis enn ti labriz.
12Ekout mo lapriyer, SEGNER;
tann mo douler kriye;
vinn ed enn malere ki pe soufer.
Kouma tou mo bann anset, mo enn etranze,
mo vizit kot twa li bien kourt.
13Donn mwa inpe repi,
pou mo regagn enn sourir,
avan mo gran depar.
Currently Selected:
Psom 39: KMNT
Highlight
Share
Copy
Want to have your highlights saved across all your devices? Sign up or sign in
Nouvo Testaman Kreol Morisien Harmonisation NTPS KM © Bible Society of Mauritius, 2021.
