Psom 40
40
Anou sant louanz Lesegner
Pou sef koral. Enn Psom David.
1Mo ti atann, atann mem, sekour LESEGNER;
Li ti ekout mwa e li ti tann mwa kriye.
2Li ti tir mwa depi dan trou lamor;
fer mwa sap dan marekaz san fon,
li ti poz mo lipie lor enn baz solid,
danze napa koste, la kot mo marse.
3Li ti montre mwa enn nouvo sante;
montre mwa sant louanz Bondie.
Boukou pou konpran, pou montre respe,
e pou met zot konfians dan LESEGNER.
4Bienere bann ki fer konfians LESEGNER,
zot ki rezet idolatri
ou ki refiz swiv bann fos bondie.
5Zot vremem boukou, SEGNER, mo Bondie,
bann mirak ek bann mervey ki to finn fer pou nou.
Pena to segon!
Mo anvi rakonte, rakonte mem,
me konte fini, ankor ena mervey pou rakonte.
6To pa bizin ofrand ek sakrifis;
to finn donn mwa zorey pou tande.
To pa bizin sakrifis ki bril zanimo
ouswa sakrifis pou lav pese.
7Lerla mo dir, “Ala mo la Bondie!
Dan liv sakre mo trouv seki finn ekrir pou mwa.
8Mo ena boukou plezir obeir to volonte, Bondie.
Mo finn grav to lalwa dan mo leker.”
9Dan lasanble kot to pep ti reini
mo ti fer deklarasion ki LESEGNER finn sov nou.
Nanye pa pou fer mwa aret proklam for-for sa laverite-la;
10mo pa finn gard nouvel to delivrans la zis pou mwa.
Mo finn koz ki to fidel e ki to sov nou,
mo pa finn kasiet to lamour infini e to lwayote
dan lasanble tou bann fidel.
11Pa refiz mwa to konpasion, SEGNER,
ki to lamour infini ek to laverite
touletan protez mwa.
12Traka partou otour mwa,
tro boukou pou konte.
Mo bann pese finn anvayir mwa,
zot anpes mwa trouv kler.
Zot plis ki seve lor mo latet
zot fer mwa perdi kouraz.
13Sov mwa, SEGNER,
SEGNER, degaze ed mwa.
14Ki bann ki pe rod mo lamor
plonz dan laont ek konfizion;
bann ki dezir trouv mo maler,
fer zot konn defet ek imiliasion;
15bann ki sikane ek moke
fer zot gout defet e zot labous ferme.
16Bann ki vinn ver twa,
donn zot lazwa ek boner!
Bann ki kontan twa kouma zot Sover,
pou touletan dir, “LESEGNER pli gran ki tou!”
17Mo feb ek pov, Segner,
me zame to finn bliye mwa.
Tomem mo sover, mo liberater,
mo Bondie, pa tarde pou ed mwa!
Currently Selected:
Psom 40: KMNT
Highlight
Share
Copy
Want to have your highlights saved across all your devices? Sign up or sign in
Nouvo Testaman Kreol Morisien Harmonisation NTPS KM © Bible Society of Mauritius, 2021.
