Psom 42
42
DEZIEM LIV PSOM
(Psom 42—72)
Lapriyer enn dimounn an-exil
Pou sef koral. Instriksion ki sorti dan fraternite Kore.
1Parey kouma serf rod dilo kler larivier,
mwa mo rod to prezans, mo Bondie.
2Mo swaf pou Bondie, Bondie vivan.
Kan mo pou kapav rant dan to lakaz
pou prezant mwa devan twa, pou ador twa?
3Lanwit-lizour mo plore;
zis larm ki plin mo vant.
Letansa mo bann lennmi persiste dir,
“Kot to Bondie ete?”
4Mo leker segne ler mo rapel lepase
kan ansam dan lafoul nou ti al ver lakaz Bondie;
kan mo ti pe gid laprosesion lor bon sime.
Nou ti telman ere letan nou ti pe sant for-for
nou rekonesans ek nou lazwa!
5Kifer mo tris koumsa?
Kifer traka touf mwa?
Mo bizin met mo lesperans dan Bondie
parski mo pou loue li ankor,
mo Protekter e mo Sover.
6La kot mo ete an-exil, mo leker soufer
alor mo re-pans twa,
7la kot kouran, vag ek kaskad dilo
depi Montagn Ermon ek Mizar
devers dan Larivier Zourdin
e vir-vir mwa anba-lao.
8Lizour LESEGNER donn mwa so lamour infini touletan
pou ki aswar mo kapav sant louanz mo Bondie
e priye li, limem mo lavi.
9Mo dir Bondie, mo protekter,
“Kifer to finn abandonn mwa?
Kifer mo bizin kontinie soufer
persekision mo lennmi?”
10Mo soufer ziska mo lezo fermal,
kan bann adverser insilte mwa,
kan zot persiste dir,
“Kot to Bondie ete?”
11Kifer mo tris koumsa?
Kifer traka touf mwa?
Mo bizin met mo lesperans dan Bondie
parski mo pou loue li ankor,
mo Sover e mo Bondie.
Currently Selected:
Psom 42: KMNT
Highlight
Share
Copy
Want to have your highlights saved across all your devices? Sign up or sign in
Nouvo Testaman Kreol Morisien Harmonisation NTPS KM © Bible Society of Mauritius, 2021.
