Psom 45
45
Sante pou maryaz rwayal
Pou sef koral, dapre sante lis. Instriksion ki sorti dan fraternite Kore. Enn sante damour.
1Mo leker deborde ar zoli parol
ler mo konpoz sa poem-la pou mo lerwa.
Parol poetik koule kouma lank
dan plim enn ekrivin ki konn so metie.
2Parmi tou bann zom, ala ou gayar Segner!
Ou stil koze ena elegans.
Alor Bondie finn touletan beni ou.
3O lerwa pwisan, met lepe dan sintir
e montre ou grander ek ou pouvwar.
4Kouma enn gran lerwa, mars ver laviktwar
pou defann laverite, limilite e lazistis.
Ou pwisans pou demontre bann gran aksion.
5Ou fles pwint transpers leker ou lennmi;
bann tribi tom dan ou lipie.
6Rwayom ki Bondie finn donn ou
li pou regne pou touletan.
Ou diriz ou pep dan lazistis;
7ou kontan lazistis;
ou deteste seki move.
Akoz sa Bondie, ou Bondie,
finn swazir ou,
e finn aroz lor ou latet delwil benediksion,
lonksion ki okenn lezot lerwa pa finn resevwar.
8Ou linz parfime ar parfin rar, lalwes e kanel;
bann artis diverti ou dan sato dekore ar lor ek ivwar.
9Bann fidoner ki dan lakour rwayal
zot bann prinses renome;
adrwat ou tronn ou bieneme pe diboute;
so linz ek so bizou garni ar meyer lor ki existe.
10Nouvel marye, ekout mwa bien!
Bliye ou nasion ek ou fami.
11Lerwa atire par ou bote;
akoz li ou segner,
rann li loner e obeir li.
12Lepep Tir pou donn ou boukou kado;
bann ki ena fortinn pou fer tou pou fer ou plezir.
13Laprinses dan sato! Get kouma li zoli!
So manto brode ar difil lor.
14Bann fidoner finn akonpagn li,
amenn li kot lerwa;
so manto manifik li kouler larkansiel.
15Lazwa ek boner akonpagn prosesion rwayal.
16O segner lerwa, ou bann garson pou kontinie ou regn;
ou pou fer zot vinn bann prins lor antie later.
17Mo sante pou fer ou nom seleb zenerasion apre zenerasion,
ziska lafin letan tou bann pep pou sant ou laglwar.
Currently Selected:
Psom 45: KMNT
Highlight
Share
Copy
Want to have your highlights saved across all your devices? Sign up or sign in
Nouvo Testaman Kreol Morisien Harmonisation NTPS KM © Bible Society of Mauritius, 2021.
