Psom 44
44
Enn lapriyer pou proteksion
Pou sef koral. Instriksion ki sorti dan fraternite Kore.
1Ar nou prop zorey nou finn tande, Bondie,
nou gran-dimounn finn rakont
bann gran mirak ki to ti fer
dan zot lepok, letan lontan:
2ki manier to ti depouy bann nasion ki swiv idol
pou donn to pep zot later;
ki manier to ti pini bann pep infidel
pou fer pep ki ti swiv twa epanouir.
3Pa kapav dir ki to pep ti gagn pei
ar lafors zot lepe;
zot pa ti gagne akoz zot larme ti for.
Zot ti gagne gras-a to pwisans ek to lafors;
zot ti gagne par lalimier to prezans,
parski to kontan zot.
4Tomem mo lerwa e mo Bondie;
se twa ki donn laviktwar to pep;
5gras-a twa nou lennmi gagn defet;
gras-a twa nou kraz nou adverser.
6Mo pa fer konfians mo zarm;
pa mo lepe ki pou donn mwa laviktwar.
7Me to kraz nou lennmi;
to kouver nou adverser ar laont.
8Akoz sa nou pou sant to louanz
e nou touzour pou dir twa mersi.
9Pourtan to finn rezet nou ek imilie nou;
to nepli mars ar nou bann larme.
10To les bann-la bat nou;
to les nou lennmi depouy nou.
11To les nou kouma mouton dan labatwar;
to les zot dispers nou lwin, parmi lezot nasion.
12To finn vann nou pou dipin-diber,
koumadir nou pa vo nanye.
13Nou enn size insilt parmi lezot nasion.
Ala zot sikane! Ala zot riye!
14Partou nou enn size ki fer riye;
nou lennmi boufonn nou, mepriz nou.
15Lanwit-lizour mo maler li divan mwa,
ek laont kouver mo fron
16letan mo tann insilt e blasfem
parski bann lennmi pe rod tir vanzans.
17Tousala finn ariv nou.
Pourtan nou pa finn bliye twa!
Pourtan nou pa finn kas lalians ki existe ant twa ek nou!
18Nou leker pa finn bliye twa,
nou pa finn kit larout ki to finn trase.
19To finn kraz nou dan dezer, pei zanimo sovaz;
to abandonn nou dan marenwar.
20Si koumadir nou ti bliye nou Bondie
e priye enn bondie etranze
21to ti pou may nou anplin
parski to konn nou panse profon.
22Akoz nou lamour pou twa,
pe trenn nou kouma mouton,
pe amenn nou labatwar.
23Ayo Segner, leve! Kifer to pe dormi?
Leve! Pa abandonn nou!
24Pa zwe kasiet ar nou!
Pran kont nou soufrans ek nou douler!
25Nou finn tom an gran dan lapousier;
nou pe ranpe dan later.
26Lev twa, vinn ed nou!
Sov nou akoz to lamour infini.
Currently Selected:
Psom 44: KMNT
Highlight
Share
Copy
Want to have your highlights saved across all your devices? Sign up or sign in
Nouvo Testaman Kreol Morisien Harmonisation NTPS KM © Bible Society of Mauritius, 2021.
