Psom 78
78
Lesegner Bondie ek so pep
Instriksion Asaf.
1Ekoute mo pep, ekout mo lansegnman.
Ekout bien seki mo ena pou dir!
2Mo pou servi parabol pou mo koze,
mo pou explik bann parol ki ena sekre, ki sorti bien lontan,
3ki nou finn tande, ki ti kone,
ki nou gran-dimounn ti rakont nou.
4Nou pa pou kasiet sa nou bann zanfan;
nou pou koz sa ar zenerasion ki pe vini,
tou bann mervey LESEGNER, e so pouvwar,
e bann aksion extraordiner ki li finn akonpli.
5Li finn donn so instriksion desandan Zakob,
li finn etabli lalwa pou lepep Izrael.
Li ti dir nou bann anset
ansegn so lalwa ar zot bann zanfan
6afin ki konesans la li transmet depi enn zenerasion
ziska enn lot zenerasion ki pa finn ankor ne.
7Koumsa nouvo zenerasion
pou met zot lespwar dan Bondie,
touletan rapel so travay
e obeir so komannman.
8Fode pa zot vinn kouma zot gran dimounn lontan
ki ti teti ek dezobeisan,
parski zot leker pa ti ferm,
e zot lwayote ti mins anver Bondie.
9Tribi Efraim, arme ar zarm pwisan,
zot sove ler lager eklate.
10Zot bliye zot lalians ar Bondie;
zot refiz obeir so lalwa.
11Zot bliye tou seki li finn fer;
zot bliye bann mirak ki zot ti trouve ar zot de lizie.
12Divan lizie zot bann zanset Bondie
ti fer bann gran mirak dan Zoan dan Lezip.
13Li ti ouver enn pasaz dan lamer e fer zot pase;
dilo ti diboute lor de kote, kouma de miray.
14An plin zour li ti servi enn niaz pou gid zot;
aswar li ti servi enn lalimier dife.
15Li ti fann ros an de dan dezer
e li ti fer dilo sourse depi profonder later.
16Enn rwiso ti sorti dan ros
e dilo ti koule kouma larivier.
17Zot pa ti aret fer pese kont Bondie
e dan dezer zot ti revolte kont seki Pli Lao.
18Zot ti rod teste so lafors.
Zot ti insiste gagn manze pou satisfer zot lanvi.
19Zot koz kont Bondie ler zot dir,
“Eski Bondie kapav donn nou manze dan dezer?
20Vremem li ti tir dilo dan ros,
me eski li kapav donn nou dipin?
Eski li kapav donn nou laviann pou manze?”
21LESEGNER ti amer ler li ti tann zot rabase.
So lakoler ti anflame kont Zakob,
so lakoler ti monte kont Izrael,
22parski zot pa ti ena konfians dan li
e zot ti nepli krwar ki li pou sov zot.
23Pourtan li ti komann niaz lao,
li ti ouver laport lesiel
24pou les lamann tom lor zot,
plin zot vant ar lagrin dible ki sorti dan lesiel.
25Bann imin ti manz nouritir ki anz manze
e Bondie ti donn zot tou an abondans.
26Li ti fer divan Les leve dan lesiel;
par so pwisans li ti fer divan Lesid soufle;
27li ti avoy laviann, osi abondan ki lapousier,
e otan zwazo kouma disab lor laplaz,
28ki ti tom omilie kot zot ti kanpe,
partou otour zot lakaz.
29Tou dimounn ti rasazie ar manze; zot ti satisfe.
Bondie ti donn zot seki zot ti oule.
30Me avan ki zot reisi satisfer zot dezir,
manze ti ankor dan zot lagorz,
31lakoler Bondie lev kont zot,
li ti touy bann zom pli for,
bann meyer zenn Izrael tonbe.
32Pa krwar sa ti sanz zot! Zot ti kontinie zot pese.
Zot ti kontinie pa krwar dan so aksion manifik.
33Enn kout soufle, Bondie ti tengn zot lavi
e zot lavi ti fini dan lafreyer.
34Sak fwa li ti touy de-trwa, leres ti vinn ver li;
zot ti repanti e zot ti priye Bondie.
35Lerla zot ti koumans rapel ki Bondie ti zot protekter;
ki Bondie Pli Lao ti touletan delivre zot.
36Zot ti flat Bondie ar zot labous,
zot lalang ti koz manti ar li.
37Zot pa ti lwayal ar Bondie;
zot ti fini bliye zot lalians ar li.
38Me Bondie ti ena konpasion pou so pep;
li ti pardonn zot pese
e li pa ti avoy lamor lor zot.
Plizier fwa li ti tini so lakoler
e li ti kontrol so laraz.
39Li ti rapel zot febles parski zot ti zis bann imin mortel
ki ti kouma enn ti labriz ki soufle avan li tengn net.
40Komie fwa dan dezer zot ti met so lotorite odefi;
komie fwa zot ti ranpli so leker ar sagrin.
41Tanzantan zot ti teste Bondie,
zot ti provok Bondie ki Sin, ki Izrael adore.
42Zot ti bliye so gran pwisans,
zot bliye zour ki li ti delivre zot depi zot lennmi;
43e li ti fer so bann aksion etonan
dan Zoan dan Lezip.
44Larivier dilo ti vinn larivier disan,
akoz sa bann Ezipsien pa ti kapav bwar;
45enn niaz mous ti desann lor zot ar maladi;
enn larme krapo ti rann zot lavi bien difisil.
46Sotrel ti detrir plantasion;
prodwi zot travay ti fini ar sotrel.
47Lagrel ti touy karo rezin;
pie fig sovaz ti griye ar freser.
48Lagrel ti touy zanimo;
bann troupo ti viktim lafoud.
49Bondie larg enn koler intans lor bann-la,
detres, laraz, ek ostilite,
enn gran group anz avek enn mision destriksion.
50Li pa ti kontrol ditou so laraz;
li pa ti epargn personn lamor,
me li ti les lapes fer so travay destriksion.
51Li ti touy premie garson
dan sak fami dan Lezip.
52Apre sa, li ti diriz so pep pou sorti laba kouma enn troupo,
kouma enn bon berze li gid zot atraver dezer.
53Li ti amenn zot ver sekirite e zot lafreyer ti disparet.
Parkont bann vag lamer ti monte, al kraz lor lennmi lepep.
54Li ti amenn zot dan so domenn sakre,
lor montagn ki li ti konkerir.
55Li ti sas bann nasion divan zot,
li ti partaz later-la ar bann tribi Izrael
sakenn so par, pou konstrir zot lakaz.
56Me zot ti teste Bondie Pli Lao,
zot rebel kont li e pa obeir so komannman.
57Zot pran move sime parey kouma zot bann anset.
Zot ti parey kouma enn zarm kase ki kapav fer tret.
58Zot ti provok li letan zot servi landrwa sakre bann payin.
Zot fer li ankoler letan zot al apre bann idol.
59Bondie ti nepli kapav tini;
li ti rezet so pep net.
60Li ti abandonn so tabernak dan Silo
ki limem ti swazir pou li kapav viv parmi nou bann imin.
61Li ti les lennmi pran kof sign so pwisans,
so laglwar e so mazeste ti al an kaptivite.
62Li ti sitan ankoler
ki li ti les lennmi touy so pep.
63Zennzan ti mor dan lager;
zennfi pa ti reisi konn sante maryaz.
64Bann pret ti sibir lamor violan
e zot vev pa ti mem kapav fer dey.
65Finalman Lesegner leve, kouma kikenn ki sorti dan somey,
kouma enn dimounn ki sort dan soulezon.
66Li bat so lennmi ki oblize sove,
li imilie zot; zot tom dan laont pou touzour.
67Me li ti rezet desandan Zozef;
Li pa ti swazir tribi Efraim.
68Li ti prefer tribi Zide
e Montagn Sion ki li ti extra kontan.
69Se dan sa plas la ki li ti konstrir so Tanp
parey kouma so lakaz dan lesiel.
Anplis li ti fer li telman solid
ki li ti pou reziste ravaz letan.
70Answit li ti swazir David kouma so serviter;
li ti tir li dan patiraz
71kot li ti pe vey so troupo
e ti fer li vinn lerwa Izrael,
berze lepep Bondie.
72David ti okip zot avek enn leker san repros,
e li ti diriz so pep ar boukou talan ek sazes.
Currently Selected:
Psom 78: KMNT
Highlight
Share
Copy
Want to have your highlights saved across all your devices? Sign up or sign in
Nouvo Testaman Kreol Morisien Harmonisation NTPS KM © Bible Society of Mauritius, 2021.