Psom 80
80
Segner Bondie, beni nou pei
Pou sef koral, dapre sante lis, enn Alians. Enn Psom Asaf.
1Ekout nou, Berze Izrael,
twa ki gid bann desandan Zozef kouma enn troupo.
Lor to tronn, lao bann seribin, revel twa
2devan bann tribi Efraim, Benzamin ek Manase.
Servi to lafors
e vinn sov nou.
3Re-donn nou nou lafors lontan, O Bondie!
Fer lalimier to prezans ekler nou
pou nou gagn delivrans.
4SEGNER Bondie Toupwisan,
komie letan ankor to pou refiz ekout lapriyer to pep?
5To finn met sagrin dan nou lasiet manze
e to finn ranpli nou goble ar larm.
6To les nou vinn lasours dispit ar bann nasion vwazin;
to pe les nou lennmi insilte nou.
7O Bondie Toupwisan, re-donn nou nou lafors lontan!
Fer lalimier to prezans ekler nou
pou nou gagn delivrans.
8To ti amenn enn boutir rezin depi Lezip;
to ti farous bann lezot tribi
pou plant li dan zot later.
9To ti netway enn bout terin
pou permet li pouse.
So rasinn ti rant dan profonder later
e li ti fane partou.
10So lonbraz ti tale partou lor kolinn;
so bann brans ti depas mem bann gran pie sed.
11Li ti kontinie peple ziska Mediterane,
ale mem ziska larivier Efrat.
12Kifer to finn kraz so miray protekter?
Aster ninport kisann-la ki pase
kapav kokin rezin;
13koson maron vinn fer ravaz ladan,
e toutsort zanimo sovaz manz so bourzon.
14Get nou kote, O Bondie Toupwisan!
Depi lao, get ki pe ariv nou;
vinn sov sa lavign la.
15Vinn sov to pie rezin ki to ti plante;
zenn pie rezin ki zordi finn vinn sitan for gras-a to swin.
16Bann lennmi finn met dife ar li, zot finn koup li.
Diriz to lakoler kont zot e detrir zot.
17Prezerv ek protez lepep ki to finn swazir;
nasion ki to finn fortifie pou grandi.
18Alor nou pa pou kit twa ankor,
re-donn nou lavi e nou pou invok to nom.
19Re-donn nou nou lafors lontan, O SEGNER Bondie Toupwisan!
Fer lalimier to prezans ekler nou
pou nou gagn delivrans.
Currently Selected:
Psom 80: KMNT
Highlight
Share
Copy
Want to have your highlights saved across all your devices? Sign up or sign in
Nouvo Testaman Kreol Morisien Harmonisation NTPS KM © Bible Society of Mauritius, 2021.