Psom 83
83
Enn lapriyer pou demann detrir lennmi
Enn sante. Enn Psom Asaf.
1Bondie, pa res dan silans koumsa,
Pa res trankil, san fer nanye, O Bondie!
2Get laba! To lennmi pe azite,
e bann ki ena laenn pou twa pe organiz revolt.
3Zot pe konplote kont to pep;
zot pe prepare an sekre kont bann zanfan ki to bien kontan.
4Zot pe dir, “Anou detrir zot kouma enn nasion;
anou efas Izrael lor map.”
5Zot tom dakor
e zot marye-pike kont twa.
6Bann Edomit, bann Ismaelit, bann Moabit, bann zanfan Agar,
7bann pep Gebal, Amon, Amalek,
Filisi ek bann abitan Tir
finn fer koalision.
8Bann Asirien, enn alie for bann Amon ek bann Moab, desandan Lot,
finn vinn donn enn koudme li osi.
9Tret zot kouma to ti tret bann Madianit,
bann Sisera ek bann Zabin kot larivier Kison.
10To ti dezarm zot dan Enndor
e to ti les zot kadav vinn fimie lor later.
11Fini zot bann sef kouma to ti fini
Oreb ek Zeeb;
exterminn zot dirizan
kouma to ti exterminn
12Zeba ek Zalmouna ki ti dir,
“Nou pou akapar later Bondie pou nou.”
13Bondie, fer zot fane kouma lapousier,
kouma lapay ki divan sarye.
14Parey kouma dife detrir lafore;
kouma laflam alim flan montagn
15fer zot sove, ale ar to ravaz Tanpet;
terifie zot ar to rafal siklonn.
16Kouver zot ar laont, O SEGNER
ziska zot oblize rekonet to grander.
17Fini zot dan imiliasion ek lafreyer pou touletan
e fer ki zot mor dan dezoner.
18Fer zot realize ki se twa ki SEGNER
e zis twa ki Pli Lao lor liniver.
Currently Selected:
Psom 83: KMNT
Highlight
Share
Copy
Want to have your highlights saved across all your devices? Sign up or sign in
Nouvo Testaman Kreol Morisien Harmonisation NTPS KM © Bible Society of Mauritius, 2021.