Zenez 14
14
Abram al sekour Lot
1Dan sa lepok la, Amrafel, lerwa Sinear, Aryok, lerwa Elasar, Kedorlaomer, lerwa Elam, ek Tidal, lerwa Goim fer lalians. 2Zot al lager kont Bera, lerwa Sodom, Birsa, lerwa Gomor, Sinab, lerwa Adma, Semeber, lerwa Seboim ek lerwa Bela, setadir Soar. 3-4Pandan 12 an, sa sink lerwa la ti finn soumet divan lerwa Kedorlaomer ek so bann alie. Me treziem lane, zot fer enn revolt. Zot rasanble zot bann larme dan vale Sidim, ki zordi rekouver ek Lamer-Mort.#14:3-4 An Ebre: “Lamer Disel”. Sa lamer la telman sale, nanye pa kapav viv ladan. Ala kifer Kedorlaomer ek so bann alie finn lev lager kont zot. 5Enn an apre ki revolt ti finn koumanse, Kedorlaomer ek so bann alie koumans atake. Lor zot larout, zot bat bann Refait dan Asterot-Karnaim. Zot bat osi bann Zouzit dan lavil Am, ek bann Emit dan laplenn Kiriataim. 6Apre sa zot bat bann Onit dan zot bann kolinn dan Seir. Zot pourswiv bann Onit ziska El-Parann, pre ar dezer. 7Lerla zot retourn dan Enn-Mispat, setadir Kades. Zot ravaz bann teritwar Amalesit, e zot bat bann Amorit ki res dan Asasonn-Tamar. 8Lerlamem, bann lerwa Sodom, Gomor, Adma, Seboim ek Bela, setadir Soar, ek zot bann larme, desann dan vale Sidim. 9Zot konbat kont Kedorlaomer, lerwa Elam, Tidal, lerwa Goim, Amrafel, lerwa Mezopotami, ek Aryok, lerwa Elasar. Sink lerwa kont kat lerwa. 10Ena boukou pwi goudron dan vale Sidim. Lerwa Sodom ek lerwa Gomor sove, e zot tom dan pwi goudron. Bann ki reysi sape al kasiet dan bann montagn. 11Kedorlaomer ek so bann alie ranport laviktwar. Zot pran bann rises ek bann rezerv nouritir dan Sodom ek Gomor. 12Lot, neve Abram, pe res dan Gomor. Bannla fer li prizonie. Zot amenn li ek tou seki li posede.
13Enn zom reysi sape. Li vinn anons sa nouvel la Abram ki enn Ebre. Sa letan la, Abram pe kanpe kot bann gran pie Mamre, enn Amorit. Mamre frer Eskol ek Aner. Touletrwa finn fer enn lalians avek Abram. 14Kouma Abram tann nouvel ki bann lennmi finn amenn so neve Lot kouma prizonie, li rasanble so bann pli bon gerye. Ena antou 318. Abram ek so bann zom pourswiv bann lennmi ziska Dann. 15Li diviz so bann zom an-plizir group. Zot atak bann lennmi aswar. Abram ek so bann zom ranport laviktwar. Zot pourswiv bann lennmi ziska Oba, dan Nor Damas. 16Abram ramenn tou bann rises ki bann lennmi ti pran. Li ramenn osi so neve Lot, tou bann fam, ek tou lezot prizonie.
Abram gagn benediksion Melkisedek
17Abram finn ranport enn gran viktwar lor lerwa Kedorlaomer ek so bann alie. Ler li retourne, lerwa Sodom vinn zwenn li dan vale Save, setadir vale Lerwa. 18Melkisedek, lerwa Salem, amenn dipin ek divin. Li enn pret ki servi Bondie Treo. 19Li beni Abram e li dir:
“Abram, Bondie Treo#14:19 An Ebre: “El Elyon”. beni twa,
Limem Kreater lesiel ek later;
20Glorifie Bondie Treo.
Li finn livre to bann lennmi dan to lame.”
Lerla Abram donn Melkisedek 10 poursan bann rises ki li finn amene. 21Apre sa, lerwa Sodom dir Abram: “Donn mwa mo bann dimoun, me gard tou leres pou twa.” 22Me Abram reponn li: “Mo finn fer serman divan LESEGNER, Bondie Treo, ki finn kre lesiel ek later. 23Mo pa pou pran nanye seki pou twa, ni enn brin difil, ni enn lase sandalet. Koumsa, to pa pou kapav dir: ‘Mo finn fer Abram vinn ris.’ 24Mo pa pou pran nanye, exsepte bann nouritir ki mo bann zom finn manze. Les mo bann alie, Aner, Eskol ek Mamre pran zot par, zotmem.”
Currently Selected:
Zenez 14: KMOTPOR
Highlight
Share
Copy
Want to have your highlights saved across all your devices? Sign up or sign in
Kreol Morisien OT Portions © Bible Society of Mauritius, 2020.
