Zenez 15
15
Bondie fer enn lalians ek Abram
1Enn zour, LESEGNER koz avek Abram dan enn vizion e dir li: “Abram, pa bizin per! Momem to Protekter. Mo pou donn twa enn gran rekonpans.” 2Abram reponn: “A Segner BONDIE, ki to pou donn mwa? To konn bien ki mo pena zanfan. Eliezer ki sorti Damas pou vinn mo eritie. 3To pa finn donn mwa zanfan. Akoz sa, mo domestik Eliezer ki finn ne dan mo lakaz, limem pou vinn mo eritie.” 4LESEGNER dir Abram: “Non, pa sa zom la ki pou vinn to eritie, me to prop disan. To prop garson ki pou vinn to eritie.” 5Li fer Abram sorti deor e li dir li: “Lev to lizie lao, e get lesiel. Kont bann zetwal si to kapav. To bann desandan pou vinn boukou kouma bann zetwal dan lesiel.” 6Abram met so konfians dan LESEGNER. Akoz sa LESEGNER rekonet li kouma enn zom zis.
7Li dir Abram: “Momem LESEGNER ki finn fer twa sorti dan Our, pei bann Kaldeen. Mo pe fer twa vinn propriyeter sa pei la.” 8Abram dir li: “Segner BONDIE, kouma mo pou kone si sa pei la pou vinn pou mwa?” 9LESEGNER reponn li: “Amenn enn zenis, enn sev, ek enn belie 3 an sakenn. Amenn osi enn tourtrel ek enn zenn pizon.” 10Abram obeir LESEGNER. Li ouver bann zanimo la ande. Li met sak lamwatie vizavi so lot lamwatie. Me li pa ouver bann zwazo. 11Bann votour desann pou manz kadav bann zanimo la, me Abram farous zot.
12Ler soley kouse, Abram gagn enn somey lour. Enn nwarte ki fer per antour li. 13Lerla, LESEGNER dir li: “Abram, to bann desandan pou al res dan enn pei etranze. Bann abitan sa pei la pou tret zot kouma esklav. Bannla pou fer dominer ar zot pandan 400 an. 14Me sa pep ki pou tret zot kouma esklav la pou gagn mo pinision. Lerla to bann desandan pou kit sa pei la avek boukou rises. 15Twa, Abram, to pou viv bien lontan, e to pou mor anpe dan to vieyes. 16Apre kat zenerasion#15:16 Kat zenerasion pe fer referans 400 an ki desandan Abram pou dan enn pei etranze. Get verse 13. to bann desandan pou retourn isi. Lerla, mo pou pini bann Amorit. Asterla zot pese pankor vinn ase grav pouki mo pous zot lor zot later.”
17Soley finn kouse e fer bien nwar. Enn sel kou, enn resipian lafime ek enn flanbo paret. Zot laflam ek lafime pas ant bann lamwatie zanimo ki Abram finn ouver. 18Sa zour la, LESEGNER fer enn lalians avek Abram. Li dir li: “Mo pou donn to bann desandan sa pei la antie, depi larivier Lezip ziska gran larivier Efrat. 19Mo pou donn zot teritwar bann Kenit, bann Kenizit, bann Kadmonit, 20bann Itit, bann Perizit, bann Refait, 21bann Amorit, bann Kananeen, bann Girgasit ek bann Zebizit.”
Currently Selected:
Zenez 15: KMOTPOR
Highlight
Share
Copy
Want to have your highlights saved across all your devices? Sign up or sign in
Kreol Morisien OT Portions © Bible Society of Mauritius, 2020.
