Zenez 19
19
Pese bann abitan Sodom
1Ler pre pou aswar, de anz la ariv Sodom. Lot pe asize pre kot lantre lavil. Kouma li trouv zot, li leve e li al zwenn zot. Li prostern divan zot ziska so figir tous later. 2Lerla li dir zot: “Mo sipliy zot, fer mwa loner vinn kot mwa, zot serviter. Zot ava lav zot lipie e dormi dan mo lakaz zordi. Dime gramatin zot ava lev boner pou kontign zot larout.” Zot reponn: “Non, nou pou pas lanwit lamem, lor laplas piblik.” 3Me telman Lot insiste, zot fini par aksepte so linvitasion. Li kwi dipin san levin e li prepar enn bon repa. Lerla zot manze. 4Zot pankor al dormi, kan bann zom lavil Sodom vinn antour lakaz Lot. Zot tou vini, depi pli zenn ziska pli vie. 5Zot kriye Lot e zot dir: “Kot sa bann zom ki finn vinn kot twa la? Amenn zot isi pou nou viol zot.”
6Lot sorti deor, e li ferm laport deryer li. 7Li dir zot: “Mo sipliy zot, mo bann frer, pa fer sa pese orib la. 8Mo ena de tifi ki ankor vierz. Mo pou amenn zot isi. Zot ava fer seki zot anvi avek zot. Me pa tous sa bann zom la. Mo bann invite sa, mo bizin protez zot.” 9Bannla reponn: “Sorti la ale do! Tomem to enn etranze isi e to oule fer lalwa? Taler twa ki pou pey lepokase.” Zot pous Lot avek violans, e zot vini pou defons laport. 10Me sa de invite la ris Lot dan lakaz, e zot ferm laport. 11Lerla zot fer tou bann zom ki deor vinn aveg; depi pli piti ziska pli gran. Personn pa kapav trouv laport.
Lot ek so fami kit Sodom
12De anz la dimann Lot: “Kisannla ki res kot twa ankor? Eski to ena zann, garson, tifi oubien enn lot fami dan lavil? Fer zot tou sove ale. 13LESEGNER finn avoy nou pou detrir lavil. Bann akizasion kont bann abitan Sodom bien grav.” 14Lot degaze al get so bann pretan-zann, e li dir zot: “Degaze kit lavil ale, LESEGNER pou detrir li.” Me bannla pran sa an badinaz.
15Kan pre pou lizour, de anz la pres Lot pou ale. Zot dir li: “Leve, pran to fam ek to de tifi ale, sinon zot pou mor ansam ek bann abitan lavil.” 16Lot ankor pe ezite, me LESEGNER finn deside pou sov zot lavi. Alor de anz la ris zot par lame, e kondir zot andeor lavil. 17Kan zot ariv andeor lavil, de anz la dir zot: “Ale, sov zot lavi. Pa vir deryer e pa aret okennpar. Al kasiet dan montagn, sinon zot pou mor.” 18-19Lot reponn: “Segner, mo rekonet ki zot finn azir bien avek mwa, zot serviter. Zot finn fer mwa enn gran faver e zot finn sap mo lavi. Me nou pa pou gagn letan ariv lor montagn avan ki sa maler la tape. Nou pou riske mor. 20Get laba ena enn ti lavil. Li pa lwin e nou pou kapav sove al laba. Mo pa dimann zot gransoz: Permet nou al laba pou sap nou lavi.” 21Enn parmi dir li: “Dakor, mo fer twa sa faver la osi. Mo pa pou detrir sa ti lavil la. 22Degaze al kasiet laba. Mo pa pou kapav fer nanye tanki zot pa ansekirite laba.” Pou sa rezon la, finn apel sa lavil la Soar, ki vedir tipti.
Bondie detrir Sodom ek Gomor
23Soley pe leve kan Lot ek so fami ariv Soar. 24LESEGNER fer enn lapli souf ek dife tom lor Sodom ek Gomor. 25Li detrir sa bann lavil la ek zot bann abitan. Li detrir osi tou bann plantasion dan sa rezion la. 26Fam Lot get deryer e li vinn enn stati disel.
27Boner gramatin, Abraam al dan landrwa kot li ti koz avek LESEGNER. 28Li zet enn regar dan direksion Sodom, Gomor ek bann landrwa dan lezanviron. Li trouv zis lafime ki pe monte depi dan laplenn, parey kouma kan lerb sek finn pran dife.
29Kan Bondie desid pou detrir bann lavil dan sa rezion la, Lot ti pe res laba. Me Bondie pa finn bliye promes ki li ti fer Abraam. Akoz sa, li sov Lot dan sa maler la; li epargn so lavi.
Lorizinn bann Moabit ek bann Amonit
30Lot gagn per pou res dan Soar. Li kit lavil la e li al dan montagn ek so de tifi. Zot res dan enn lagrot laba. 31Enn zour, pli gran tifi la dir ek so ti-ser: “Nou papa pe vinn vie, e pena enn zom par isi pou marye avek nou dapre koutim. 32Anou soul nou papa ar divin. Lerla, nou ava dormi avek li. Koumsa, nou ava gagn enn desandan atraver nou papa.” 33Sa swar la, zot fer zot papa bwar divin ziska li sou. Lerla, premie tifi la dormi avek li. Lot pa konn nanye ki pe pase. 34Landime, premie tifi la dir so ti-ser: “Yerswar mo ti dormi avek nou papa. Anou donn li divin ankor aswar. Lerla, to ava al dormi avek li. Koumsa, nou toulede kapav gagn enn desandan pou nou papa.” 35Sa swar la ankor, zot fer zot papa bwar divin ziska li sou. Lerla, pli zenn tifi la al dormi avek li. Lot pa konn nanye ki pe pase.
36Alor, toulede tifi tom ansint pou zot papa. 37Pli gran tifi la gagn enn garson, e li apel li Moab. Limem anset bann Moabit. 38Pli zenn tifi la osi gagn enn garson, e li apel li Ben-Ami. Limem anset bann Amonit.
Currently Selected:
Zenez 19: KMOTPOR
Highlight
Share
Copy
Want to have your highlights saved across all your devices? Sign up or sign in
Kreol Morisien OT Portions © Bible Society of Mauritius, 2020.
