Zenez 20
20
Abraam ek Sara kot Abimelek
1Abraam kit landrwa kot li pe reste, e li al dan direksion dezer Negev. Li res inpe letan ant Kades ek Sour. Apre sa li al res Gerar kouma enn etranze. 2Abraam dir tou dimoun ki Sara so ser. Alor, Abimelek, lerwa Soar, fer amenn Sara kot li. 3Me aswar, Bondie averti Abimelek dan enn rev e dir li: “To pou mor, parski sa fam ki to finn amenn kot twa la, li enn fam marye.” 4Abimelek pankor gagn relasion avek Sara. Alor, li dir: “Segner, mo pep ek mwa, nou inosan. Kifer to pou detrir nou? 5Abraam, limem, finn dir mwa ki Sara so ser. Sara osi finn dir mwa ki Abraam so frer. Mo pa finn fer nanye demal. Mo konsians trankil.” 6Bondie kontign koz avek li dan so rev e dir li: “Wi, mo kone to inosan. Akoz sa mo pa finn les twa tous li. Mo finn anpes twa fer sa pese la. 7Asterla, rann Abraam so fam. Li enn profet; li ava priye pou twa pouki to pa mor. Me si to refiz rann li so fam, to pou mor, twa ek to pep.”
8Abimelek leve bien boner gramatin. Li fer apel tou so lantouraz e li rakont zot tou seki finn pase. Bannla gagn extra per. 9Lerla, Abimelek fer apel Abraam, e li dimann li: “Kifer to finn fer sa avek nou? Mo pa finn fer twa nanye demal. Me twa, to finn oule fer mwa ek mo pep komet enn gran pese. To pa ti bizin fer enn zafer parey ar mwa. 10Ki finn pas dan to latet pou to fer sa?” 11Abraam reponn li: “Mo ti krwar ki personn pena respe pou Bondie isi. Mo ti per tansion zot touy mwa pou pran mo fam. 12Anplis, vremem li mo ser. Nou ena mem papa, me pa mem mama. Akoz sa mo finn kapav marye avek li. 13Depi ki Bondie finn donn mwa lord pou kit lakaz mo papa, mo finn dimann Sara enn faver: ‘partou kot nou ale, dir ki mo to frer.’” 14Apre sa, Abimelek rann li so fam. Anmemtan, li donn li mouton ek bef, serviter ek servant. 15Abimelek dir Abraam: “To bienveni dan mo pei. To kapav res kot to anvi.” 16Lerla, Abimelek dir Sara: “To trouve, mo finn donn to frer 1,000 pies larzan. Sa enn prev divan tou dimoun ki to inosan dan sa zafer la. Personn pa pou kapav blam twa.”
17-18LESEGNER ti finn fer tou bann fam dan fami Abimelek vinn steril akoz seki ti finn ariv Sara. Me Abraam priye Bondie pou zot. Lerla Bondie pardonn Abimelek. So madam ek bann lezot fam finn kapav regagn zanfan.
Currently Selected:
Zenez 20: KMOTPOR
Highlight
Share
Copy
Want to have your highlights saved across all your devices? Sign up or sign in
Kreol Morisien OT Portions © Bible Society of Mauritius, 2020.
