Zenez 23
23
Abraam aste enn tonbo pou Sara
1Sara viv ziska 127 an. 2Lerla li mor dan Kiriat-Arba, setadir Hebron, dan pei Kanaan. Abraam fer dey so fam Sara e li plor so lamor. 3Ariv enn ler, li lev kot lekor so fam e li al koz avek bann Itit. 4Li dir zot: “Mo pe viv kouma enn etranze parmi zot. Vann enn bout terin avek mwa. Mo pou fer enn tonbo pou anter mo fam.” 5Bann Itit reponn li: 6“Misie, ekout nou, silteple! To enn gran sef parmi nou. Personn pa pou refiz twa enn tonbo pou anter to fam. To kapav anter li dan nou meyer tonbo.” 7Abraam leve e li prostern li divan bann Itit, bann abitan sa landrwa la. 8Lerla li dir zot: “Si vremem zot dakor ki mo anter mo fam isi, ekout mwa. Koz avek Efron, garson Soar, pou mwa. 9Dir li donn mwa kavern Makpela ki pou li e ki trouv dan bout so terin. Mo pou pey li pri ki sa koute divan zot tou. Koumsa, mo ava posed sa terin la e mo ava fer enn tonbo laba.” 10Efron lamem parmi bann Itit. Zot finn zwenn avek Abraam kot laport lavil. Lerla Efron reponn Abraam divan tou bann Itit. 11Li dir: “Misie, ekout mwa, silteple! Dan prezans mo pep, mo fer twa kado sa terin la ek so kavern. To kapav anter to fam laba.”
12Abraam prostern ankor enn fwa divan zot. 13Lerla li dir Efron divan zot tou: “Ekout mwa, silteple! Mo pou donn twa pri ki sa terin la koute. Aksepte mo propozision, lerla mo pou anter mo fam laba.” 14-15Efron reponn: “Misie, ekout mwa! Sa terin la vo zis 400 Sekel#23:14-15 Sa lepok la, enn sekel ti vo saler enn zourne travay.. Ant mwa ek twa, sa pa gransoz. Al anter to fam.” 16Abraam tom dakor avek Efron. Li pez larzan valer 400 Sekel dapre pwa ki bann marsan ti pe servi. Li donn Efron sa larzan la divan tou dimoun. 17-18Alor, terin Efron, so kavern ek tou seki ena lor la, vinn pou Abraam. Terin la trouv dan Makpela ki dan les Mamre. Sa pase dan prezans bann Itit ek tou dimoun ki finn rasanble kot laport lavil. 19Lerla, Abraam anter so fam Sara dan kavern ki trouv lor terin Makpela. Terin la pa lwin ek Mamre, setadir Ebron, dan pei Kanaan. 20Terin la ti pou bann Itit, me Abraam finn aste li avek zot e li fer enn kavo laba.
Currently Selected:
Zenez 23: KMOTPOR
Highlight
Share
Copy
Want to have your highlights saved across all your devices? Sign up or sign in
Kreol Morisien OT Portions © Bible Society of Mauritius, 2020.
