Nya ǹ dín 12
12
Zaaki dɛ ka Piɛrɛ kũ boo
1Bɛa biikoo kɛ lɛ li, kii Erɔdi ná a giala kɔ á Lawa a sɔmɔ minin tɛnɛn nɔmiɛ. 2Á ZAÃ ǹ dɔɔ̃ngiĩ Zaaki dɛ ka gɔya sa nɛ á gã. 3A bɛ́ á yɛ mà Zuifun foo kɔɔ̃n kɔ bɛa sii lɛ gɔ́ɔ̃ nɛ, á minin kaa Piɛrɛ dɔ a kuĩ ganaa. *Yɔ bùbaã buuru zɔ́n waáraa nɛ. 4#BBN 12.1-27. A bɛ́ á ǹ kaa a kũ ganaa, á da kòso-n, á sɔraasi kuru sii da a lɛduə̃ ganaa, kuru gogoonmaa lɛ n min sii. A na á goã a yiri ni, bɛ̀ *kiɛ̃mala ǹ zɔ́n kiɛ̃, a kiri kuru la zaman yɔrɔ-a. 5Piɛrɛ bɛ́ kòso-n, Lawa a sɔmɔ minin kɛn man nə́ goã Lawa nyankoe a lɛa parsiini.
Piɛrɛ a diɛ boo
6A na á goã ka biɛ̃ nɛ Erɔdi n die kiri kuri Piɛrɛ la. Bɛa tèlò kɛ lɛ nɛ, Piɛrɛ na á goã nyuù we sɔraasi min paa bii ni, fɔlɔ biɛ màn paa ná a ganaa, sɔraasin kɔsɔn dɔn nə́ doa-n kòso lɛ a kiɛnlɛ-a. 7Sɛnɛ, bǎã goon ne gɔrɔ, Dɛnaa a lon a dia dí-a wole daa, á kion lɛ gɔ́ɔ̃ fulu ka foaãnɛ. Lon a dia dí-a wole lɛ nə́ n gɔn tɔ Piɛrɛ kolo ne, a ná a yii kaa, á pɛ nɛ: «Yoo lon.»
Fɔlɔ biɛn mɛnɛn bɛ́ Piɛrɛ gɔn-a, bɛn nə́ fore. 8Lon a dia dí-a wole lɛ pɛ-n doo: «N maabɛlɛ yii, n nə n kɔsɔn wɔ.»
Piɛrɛ bɛ lɛ zɛnaa. Lon a dia dí-a wole lɛ wusoo á pɛ nɛ: «N dɔnkɛ wɔ, n kɔ ma kio lɛ.»
9Piɛrɛ soo a kio, bɛ̀ a n taasɛ mà asɛ nə n narɛ, a goã doɛ̃ mà lon a dia dí-a wole kɛ a daa kɛ n taãn lɛa wa. 10Lon a dia dí-a wole lɛ laanka Piɛrɛ kiɛ̃, ǹ nə́ sɔraasin kuru binaa kɛ na, ǹ ná a paabaa ǹ wɔ na. Bɛ kio, ǹ nə́ dɔ fɔlɔ kiɛnlɛ kɛ ganaa, kiɛnlɛ mɛn bɛ́ dia-n kiwi gɔ́ɔ̃ la. Bɛa kiɛnlɛ lɛ nə́ n bũ a din ganaa ǹ nyɛɛnɛ. Ǹ bɛ́ ǹ nə́ soo, ǹ nə́ woo dɔ ziin kɔn la kuru ǹ bǎã bibinaa kɛ nɛ. Bɛa bǎã lɛ-n gɔrɔ lon a dia dí-a wole lɛ nə́ n bɔ Piɛrɛ li. 11A yiri daa a din li yǎa á tɔ́n pɛ: «Má a giala ma sisia kəni. Dɛnaa din na á ná a lon a dia dí-a wole dia taãn-taãnɛ, á daa masɛ si Erɔdi laanka Zuifun la, Zuifun mɛnɛn bɛ́ n yii diɛ masɛ a kiri-kurii la.»
12Piɛrɛ yii bɛ́ á toɛ̃, á woo ZAÃ ǹ dan Mariya a piɛ, ZAÃ mɛn bɛ́ ǹ nə́ bíi Marki. Zaman gigiã na á goã bɛa kion lɛ nɛ Lawa nyankoe. 13A bɛ́ á kiɛnlɛ dɛ, nɛlɔ dí-nyali goon ne, a tɔ n Roda, bɛ daa n nyəə. 14Á Piɛrɛ lɛn dɔ̃. A din bǎã-n gɔrɔ, nyɛnyɛɛ toa á kiɛnlɛ bũ wa. Á woo wɔ kion ka baa nɛ, á pɛ mà Piɛrɛ tá kiɛnlɛ-a. 15Kion gɔ́ɔ̃ dɛnan lɛn mà nɛlɔ lɛ mìi paǹ nə yui la?
A dɔ bɛ́ n lɛ laɛ, ǹ nə́ tɔ́n pɛ: «Lon a dia dí-a wole mɛn bɛ́ a lɛduə̃li lɛa, a n die bɛ biɛ goɛ̃ nɛ.»
16Bɛa biikoo kɛ lɛ din tumaa li, Piɛrɛ na á goã kiɛnlɛ lɛ dii. Nyɔɔbaa nɛ ǹ nə́ tɔ́n kiɛnlɛ bũ. Ǹ bɛ́ ǹ nə́ woo yaa Piɛrɛ din lɛa, á ǹ tɔwaa parsiini. 17Piɛrɛ nə́ n gɔn yiɛ ǹ nɛ, mà ǹ nə n lɛ tã. Dɛnaa bɛ́ á bɔ kòso-n lɔn, á bɛ laakalaa ǹ nɛ. A ná a boo gɔn nyɔmɔɔ ka kɛ nɛ: «Ka wo bɛ pɛ Zaaki laanka dɔɔ̃nɔn manɛ.»
Bɛ kio, á zii kũ á woo kɛ kɔsɔ ganaa.
18Lɛ̀ bɛ́ á waa, sɛ-pɛ gigiã bɔ sɔraasin li. Maǹ nə́ goã nɔ̀n diɛ Piɛrɛ kɛ a dɔ ǹ bǎã li. 19Erɔdi minin kaa a ganaa mà ǹ ga li, sɛnɛ, ǹ boo la ǹ nə yɛ wa. Á ǹ kaa a ganaa, mà ǹ nɔ̀n da sɔraasin lɛn la taãn-taãnɛ, á tɔ́n pɛ mà ǹ da ǹ nɛ ǹ nə ǹ dɛ.
Erɔdi a gɛ̀ boo
Erɔdi dinmaa bɔ Zudee gána nɛ á woo Sezaaree kiwi, á biikoo kɔ́n zɛnaa walan. 20Zia baraa kɔ́n na á goã a laanka Tiiri ka Sidɔn kiwi minin bii ni. Bɛa kiwin lɛn minin nə́ n lɛ kaa kun ǹ nə́ woo bɔ Erɔdi li. Maǹ nə́ kii lɛ a kion gɔ́ɔ̃ dí-nyali Balaatusu lɛ pii, ǹ nə́ n doa kɔn nɛ, mà ǹsɛn man giɛ zia lɛ a nya ka minbuiinbaa-n li. Sonbore, bɛa minin kɛn lɛn gána a màn-bii na á goã boe kii kɛ wɔ nɛ.
21Ǹ lɛawaa mɛn bɔ, bɛ́ dɔ, Erɔdi ná a kii mɔnaan wɔ, á giã kii dankan nɛ, á boo dadaran diɛ zaman nɛ. 22Bɛa biikoo li, zaman lɛ nə́ n lɛ dɛ á pɛ: «Minbuiin nɛ lɛn bie ke wa koe! Lawa kɔ́n lɛn nɛ!»
23Sɛnɛ, a din bǎã-n gɔrɔ, Dɛnaa a lon a dia dí-a wole Erɔdi dɛ á duwəə tán, nyuunun nə́ kaa-n gɔrɔ ǹ nə́ soɛ̃. Erɔdi gã bɛa gòã lɛ ganaa, a giala a gugurubaa kɔ Lawa la wa.
24Lawa a boo lɛ sɛ na á goã n diɛ wɔlɔ la woe.
25Barnabaasi laanka Sooli wo Zeruzalɛmu dí mɛn-a, bɛa yɔrɔ bɔ kio, ǹ nə́ wusoo ǹ nə́ woo piɛ. Ǹ nə́ woo ka ZAÃ nɛ, ǹ bɛ́ ZAÃ mɛn bíi Marki.
Currently Selected:
Nya ǹ dín 12: SCE2013
Highlight
Share
Copy
Want to have your highlights saved across all your devices? Sign up or sign in
San Catholic Edition Bible © Bible Society of Burkina Faso, 2013.
